Ioane 10:1-42
10 “Umui lau hamaoroa momokani, mamoe edia magu ena iduara amo ia vareai lasi, to dala ma ta amo ia daekau bona vareai tauna be henaohenao bona dadidadi tauna.
2 To iduara amo ia vareai tauna be mamoe naria tauna.
3 Iduara naria tauna ese unai tauna totona iduara ia kehoa, mamoe be ena gadona idia kamonai, bona ena mamoe edia ladana ia boiria bena murimuri dekenai ia hakaudia lao.
4 Ena mamoe iboudiai ia abia raka-lasi murinai, idia vairanai ia raka lao, bona mamoe be ia murinai idia raka, badina ena gadona idia diba.
5 Mamoe be idau tauna murinai do idia raka lao lasi, to ia amo do idia heau siri, badina idau taudia edia gadona idia diba lasi.”
6 Iesu be idia dekenai unai parabole ia gwauraia, to ia herevalaia gaudia edia anina idia diba lasi.
7 Unai dainai Iesu be ma ia gwau: “Umui lau hamaoroa momokani, lau be mamoe edia iduara.
8 Guna idia mai bona egu ladana idia gaukaralaia koikoi taudia ibounai be henaohenao bona dadidadi taudia, bona mamoe ese idia kamonai henidia lasi.
9 Lau be iduara, lau amo ia raka vareai tauna be do ia mauri, bona do ia vareai bona raka-lasi bona rei gabuna do ia davaria.
10 Henaohenao tauna be ia mai kava lasi, to ia be mamoe henaoa, alaia, bona hadikaia ore totona ia mai. Lau mai, unai amo idia ese mauri idia abia diba bona do idia mauri ela bona hanaihanai.
11 Lau be mamoe naria tauna namona,* mamoe naria tauna namona ese ena mauri be ena mamoe totona do ia henia.
12 Mamoe naria totona idia abia tauna be mamoe naria tauna lasi, bona mamoe be iena lasi, vadaeni uda sisia ia itaia neganai, mamoe ia rakatania bona ia heau boio bena uda sisia ese mamoe ia dadia bona ia luludia gabu idauidau dekenai,
13 badina ia be gaukara tauna sibona bona mamoe ia laloa lasi.
14 Lau be mamoe naria tauna namona, egu mamoe lau diba bona egu mamoe be lau idia diba,
15 Tamana be lau ia diba bona lau be ia lau diba hegeregerena. Bona egu mauri* be mamoe totona do lau henia.
16 “Bona lau be mai egu mamoe ma haida, idia be inai magu lalonai lasi, idia danu do lau mailaia bona idia ese egu gadona do idia kamonai, bona idia be mamoe serina tamona ai do idia lao, bona mamoe naria tauna be tamona.
17 Unai dainai Tamana ese lau ia lalokau henia, badina lau ese egu mauri lau henia, mauri lau abia lou totona.
18 Tau ta ese lau amo egu mauri ia kokia lasi, to sibona egu ura dainai egu mauri lau henia, bona lau be mai egu siahu egu mauri lau henia totona, bona mai egu siahu lau abia lou totona. Unai hahegani be egu Tamana amo lau abia.”
19 Unai hereva dainai, Iuda taudia huanai heiriheiri ia vara.
20 Idia momo idia gwau: “Ia be mai ena demoni bona ia kavakava. Dahaka dainai ia umui kamonai henia?”
21 Ma haida idia gwau: “Inai be demoni ese ia abia tauna ena hereva lasi. Demoni ese matakepulu taudia edia matana ia kehoa diba lasi, ani?”
22 Unai nega ai Ierusalema dekenai dubu hahelagaia ariana idia karaia. Unai be keru negana,
23 bona Iesu be dubu helaga lalonai Solomona ena dehe ai ia raka loaloa.
24 Unai dainai Iuda taudia ese ia idia hagegea bona ia dekenai idia hereva matamaia, idia gwau: “Do ai daradara noho ela bona edena negai? Bema oi be Keriso, ai dekenai oi gwauraia hedinarai.”
25 Iesu ese ia haere henidia, ia gwau: “Umui lau hamaoroa vadaeni to umui abia dae lasi. Lauegu Tamana ena ladanai lau karaia noho gaukaradia ese lau idia gwauraia hedinarai.
26 To umui abia dae lasi, badina umui be egu mamoe lasi.
27 Lauegu mamoe ese egu gadona idia kamonai, bona idia lau diba bona idia be egu murinai idia raka.
28 Bona lau ese idia dekenai mauri hanaihanai lau henia bona idia be do idia mase ore lasi vaitani, bona egu imana amo ta ese idia do ia dadia lasi.
29 Lauegu Tamana ese lau dekenai ia henia gaudia ese ma gau ibounai idia hereaia, bona Tamana ena imana amo ta ese idia ia dadia diba lasi.
30 Lau bona Tamana be tamona.”*
31 Iuda taudia be nadi idia abia isi lou, ia idia hodoa totona.
32 Iesu be idia ia haere henia, ia gwau: “Tamana ese ia henia gaukaradia momo be umui vairanai lau hahedinaraia. Edena gaukara dainai umui ura lau umui hodoa?”
33 Iuda taudia ese idia haere henia, idia gwau: “Gaukara namona ta dainai oi ai hodoa gwauraia lasi, to Dirava ena ladana oi hadikaia dainai ai ura oi ai hodoa, badina ena be oi be taunimanima ta, to oi be oi sibona dirava ta ai oi halaoa.”
34 Iesu ese ia haere henidia, ia gwau: “Umui emui Taravatu ai inai idia torea, ani? ‘Lau gwau: “Umui be dirava.” ’
35 Bema Dirava ena hereva ese ia gwauraia dika taudia be ia ese ia gwauraidia ‘dirava,’ bona Toretore Helagadia be ta ese ia haidaua diba lasi,
36 vadaeni, edena bamona umui be lau, oibe, Tamana ese ia hahelagaia bona tanobada dekenai ia siaia tauna dekenai umui gwau, ‘Oi ese Dirava ena ladana oi hadikaia’ badina lau gwau, lau be Dirava ena Natuna?
37 Bema lau be egu Tamana ena gaukara lau karaia lasi, lau umui abidadama henia lasi.
38 To bema unai lau karaia noho, ena be lau umui abidadama henia lasi, namona be unai gaukara umui abia dae, unai amo do umui laloparara bona do umui diba noho, Tamana be lau ida ia hakapua bona lau be Tamana ida lau hakapua.”
39 Unai dainai idia ura ia idia dogoatao lou, to idia amo ia siri.
40 Vadaeni ma ia lao Ioridane unai kahanai, guna Ioane ese bapatiso ia karaia gabunai, bona unuseniai ia noho.
41 Bona taunimanima momo be ia dekenai idia mai, bona idia hereva matamaia, idia gwau: “Oibe, Ioane be toa ta ia karaia lasi, to Ioane ese inai tauna dainai gau momo ia gwauraia, bona unai hereva ibounai be momokani.”
42 Bona unuseniai momo ese ia idia abidadama henia.
