Ioane 11:1-57
11 Tau ta be ia gorere, ena ladana be Lasaro, bona ia be Betania amo, iena taihudia Maria bona Mareta danu be unai hanua dekenai idia noho.
2 Oibe, unai Maria ese bonana namo dehorona amo Lohiabada ena aena ia dahua bona ena huina amo ia hakaukaua, ena tadikaka Lasaro be ia gorere.
3 Unai dainai ena taihudia ese Iesu dekenai hereva idia siaia, idia gwau: “Lohiabada e, itaia! Oi ura henia bada tauna be ia gorere.”
4 To Iesu be unai ia kamonai neganai, ia gwau: “Inai gorere ena dokona be mase lasi, to Dirava dekenai hairai ia henia, vadaeni Dirava ena Natuna be unai dala ai idia hanamoa diba.”
5 Iesu ese Mareta, ena taihuna, bona Lasaro ia lalokau henidia.
6 To Iesu ese Lasaro ena gorere sivaraina ia kamonai neganai, ia noho gabuna ai dina ma rua ia noho.
7 Unai murinai ena hahediba taudia dekenai ia gwau: “Iudea dekenai ita giroa lou be namo.”
8 Hahediba taudia be ia dekenai idia gwau: “Rabi* e, vanegai sibona Iudea taudia be dala idia tahua nadi amo oi idia hodoa, ma unuseniai do oi giroa lou, a?”
9 Iesu ia haere, ia gwau: “Dina ta ena diari negana be hora 12, ani? Bema ta be dina ena diari lalonai ia raka, gau ta do ia bampaia lasi, badina inai tanobada ena diari ia itaia.
10 To bema tau ta be hanuaboi ai ia raka, gau ta do ia bampaia, badina diari be ia dekenai ia noho lasi.”
11 Unai gaudia ia gwauraia murinai, ma ia gwau: “Iseda turana Lasaro be ia mahuta noho, to unuseni do lau lao bona ia do lau hanogaia.”
12 Unai dainai hahediba taudia be ia dekenai idia gwau: “Lohiabada e, bema ia mahuta, ia be do ia namo.”
13 Iesu ese Lasaro ena mase ia herevalaia. To idia laloa ia be mahuta ai ia laga-ani karana ia herevalaia.
14 Unai neganai, Iesu be idia dekenai ia hereva hedinarai, ia gwau: “Lasaro ia mase vadaeni.
15 Bona lau be umui dainai lau moale badina lau be unuseniai lau noho lasi, to hari emui abidadama do ia goada. Vadaeni ia dekenai ita lao be namo.”
16 Unai dainai Toma, ia idia gwauraia Hekapa, be hahediba taudia ma haida dekenai ia gwau: “Ita danu ita lao be namo, unai amo ia ida do ita mase.”
17 Vadaeni Iesu ia ginidae neganai, ia davaria Lasaro be guria gabuna lalonai dina hani ia noho vadaeni.
18 Betania be Ierusalema kahirakahira, ena daudau be kilomita toi bamona.
19 Mareta bona Maria edia tadikaka ia mase dainai, Iuda taudia momo be idia dekenai idia mai, idia hagoadaia totona.
20 Mareta ia kamonai Iesu ia mai neganai, ia lao ia hedavari henia totona, to Maria be ruma dekenai ia helai noho.
21 Vadaeni Mareta be Iesu dekenai ia gwau: “Lohiabada e, bema oi be iniseniai oi noho, egu tadikaka be do ia mase lasi.
22 To hari danu lau diba, Dirava dekenai oi noia gaudia ibounai be Dirava ese oi dekenai do ia henia.”
23 Iesu be ia dekenai ia gwau: “Emu tadikaka do ia toreisi lou.”
24 Mareta be ia dekenai ia gwau: “Lau diba dina gabediai do ia toreisi lou.”
25 Iesu be ia dekenai ia gwau: “Toreisi lou be lau bona mauri be lau. Lau ia abidadama henia tauna, ena be ia mase, to do ia mauri lou.
26 Bona idia mauri noho bona lau idia abidadama henia taudia ibounai be do idia mase lasi, lasi momokani. Unai oi abia dae, a?”
27 Mareta be ia dekenai ia gwau: “Oibe Lohiabada, lau abia dae oi be Keriso, Dirava ena Natuna, tanobada dekenai do ia mai Tauna.”
28 Bona unai ia gwauraia murinai, ia lao bona ena taihuna Maria ia boiria, bona gado maragina dekenai ia gwau: “Hadibaia Tauna be ia noho vadaeni bona ia ura oi ia hereva henia.”
29 Maria be unai ia kamonai neganai, ia toreisi haraga bona Iesu dekenai ia lao.
30 Oibe, Iesu be hanua lalonai ia do vareai lasi, to ia be Mareta ese ia hedavari henia gabuna ai ia do noho.
31 Unai dainai Maria hagoadaia totona ruma lalonai idia noho Iuda taudia, idia itaia Maria be ia toreisi haraga bona ia raka-lasi. Idia ese ia idia badinaia, idia laloa ia be guria gabuna dekenai ia lao, ia taitai totona.
32 Vadaeni Maria be Iesu ia noho gabuna dekenai ia ginidae bona Iesu ia itaia neganai, ena aena badinai ia goru diho, bona ia dekenai ia gwau: “Lohiabada e, bema oi be iniseniai oi noho, egu tadikaka be do ia mase lasi.”
33 Vadaeni Iesu ese Maria bona ia ida idia mai Iuda taudia idia taitai ia itaia neganai, ena lalona ia hisihisi bada bona ia lalohekwarahi,
34 bona ia gwau: “Edeseniai ia umui guria?” Ia dekenai idia gwau: “Lohiabada e, oi mai bona oi itaia.”
35 Vadaeni Iesu ena mata ranu ia diho.
36 Unai dainai Iuda taudia idia hereva matamaia, idia gwau: “Itaia, ia ese Lasaro ia lalokau henia bada!”
37 To idia haida idia gwau: “Inai tauna ese matakepulu tauna ena matana ia kehoa, to inai tauna ena mase ia koua diba lasi, a?”
38 Vadaeni Iesu ena lalona be ia hisihisi bada, bona guria gabuna dekenai ia lao. Oibe, inai guria gabuna be kohua ta, bona nadi ta ese ia koua.
39 Iesu ia gwau: “Nadi umui kokia.” Mareta, mase tauna ena taihuna, be ia dekenai ia gwau: “Lohiabada e, ena tauanina be ia bonana vadaeni, badina hari be dina namba foa.”
40 Iesu be ia dekenai ia gwau: “Oi lau hamaoroa vadaeni, bema oi abidadama, Dirava ena hairai do oi itaia, ani?”
41 Vadaeni nadi idia abia siri. Iesu be guba ia itaia bona ia gwau: “Tamagu e, oi lau tanikiu henia badina lau oi kamonai henia.
42 Momokani, lau diba oi be hanaihanai lau oi kamonai henia, to lau idia hagegea hutuma dainai lau hereva, unai amo do idia abia dae oi ese lau oi siaia.”
43 Unai gaudia ia gwauraia murinai, ia boiboi badabada, ia gwau: “Lasaro e, oi raka-lasi!”
44 Ia mase vadaeni tauna ia raka-lasi, bona ena aena bona imana dekenai idia kumia dabua idia do noho, bona dabua ta be ena vairana ia koua. Iesu be idia dekenai ia gwau: “Ia amo dabua umui ruhaia bona umui rakatania.”
45 Unai dainai Maria dekenai idia mai Iuda taudia momo ese Iesu ia karaia gauna idia itaia bona ia idia abidadama henia.
46 To idia haida be Farisea taudia dekenai idia lao bona Iesu ia karaia gauna be idia dekenai idia herevalaia.
47 Vadaeni dubu biagudia bona Farisea taudia ese Sanhedrin* taudia idia haboua bona idia gwau: “Dahaka do ita karaia, badina inai tauna ese toa momo ia karaia?
48 Bema ia dekenai gau ta ita karaia lasi, idia ibounai ese ia do idia abidadama henia, bona Roma taudia do idia mai bona iseda gabu bona iseda bese do idia abia.”
49 To idia ta, Kaiapa, unai lagani ai ia be hahelaga tauna badana, be idia dekenai ia gwau: “Umui be gau ta umui diba lasi momokani,
50 bona umui be umui laloparara lasi, tau tamona be taunimanima ibounai totona ia mase be namo, unai amo bese ibounai be dika do idia davaria lasi.”
51 Kaiapa be sibona ena lalohadai ia gwauraia lasi, to unai lagani ai ia be hahelaga tauna badana dainai, ia peroveta Iesu be edia bese totona do ia mase.
52 Bona unai bese sibona lasi, to unai amo Dirava ena natudia gabu idauidau dekenai danu do ia haboudia bona do idia tamona.
53 Vadaeni unai dina amo idia hereva hebou Iesu idia hamasea totona.
54 Unai dainai Iesu be Iuda taudia huanai ia raka loaloa lasi, to unai gabu ia rakatania bona tano gagaena kahirakahira ia noho taoni ta ladana Eparaima dekenai ia lao, bona unuseniai ena hahediba taudia ida ia noho.
55 Iuda taudia edia Pasova be ia kahirakahira, bona unai tano taudia momo be Ierusalema dekenai idia daekau lao guna, unai amo taravatu hegeregerena sibodia idia hagoevaia diba.
56 Vadaeni idia lao Iesu idia tahua totona, bona dubu helaga dekenai idia gini noho lalonai, ta ta dekenai idia gwau: “Dahaka umui laloa? Aria dekenai do ia mai eiava lasi?”
57 To dubu biagudia bona Farisea taudia ese oda idia henia, bema tau ta be Iesu ia noho gabuna ia diba, ia gwauraia be namo, unai amo Iesu idia dogoatao diba.
