Ioane 12:1-50
12 Dina 6 idia do noho bena Pasova do idia karaia neganai, Iesu be Betania dekenai ia ginidae, Lasaro, Iesu ese mase amo ia hatorea isi tauna be unuseniai ia noho.
2 Vadaeni hanuaboi ai, ia totona aniani idia karaia, bona Mareta be idia ia hesiai henia, bona Lasaro be Iesu ida aniani patana dekenai idia helai taudia ta.
3 Bena Maria ese bonana namo dehorona ena lita kahana ia abia, ia be nado* korikorina, dava bada gauna, bona Iesu ena aena ia dahua bona ena huina amo ia hakaukaua. Bona ruma be bonana namo dehorona ena bonana amo ia honu.
4 To Iesu ena hahediba tauna ta, Iuda Iskariote, Iesu ena mase dalana do ia karaia tauna unai, ia gwau:
5 “Dahaka dainai inai bonana namo dehorona be denario* 300 dekenai ia hoihoilaia lasi bona monina be ogogami taudia dekenai ia henia?”
6 Iuda be unai bamona ia hereva, to ia be ogogami taudia ia laloa lasi, ia hereva badina ia be henaohenao tauna bona moni mauana ia naria bona nega momo maua lalonai idia udaia monina ia henaoa.
7 Unai dainai Iesu ia gwau: “Ia umui rakatania, unai bamona ia karaia egu mase dinana totona lau ia hegaegaelaia.
8 Badina ogogami taudia be hanaihanai umui danu do idia noho, to lau be hanaihanai umui danu do lau noho lasi.”
9 Iuda taudia hutuma idia diba Iesu be unuseniai, vadaeni idia mai, Iesu sibona lasi, to ia ese mase amo ia hatorea isi tauna, Lasaro danu idia itaia totona.
10 Vadaeni dubu biagudia idia hereva hebou, Lasaro danu do idia hamasea,
11 badina ia dainai Iuda taudia momo be unuseniai idia lao bona Iesu idia abidadama henia.
12 Murina dinana ai, aria dekenai idia mai hutuma bada idia kamonai Iesu be Ierusalema dekenai do ia mai.
13 Unai dainai pama au rigidia idia abia bona ia hedavari henia totona idia lao, bona idia boiboi matamaia, idia gwau: “Ai guriguri, hahemauri do oi henia! Iehova ena ladanai ia mai tauna be Ia ese ia hanamoa, ia be Israela ena king!”
14 To Iesu ese doniki natuna ta ia davaria neganai, ia latanai ia helai, Toretore Helagadia ai idia torea bamona, ia gwau:
15 “Siona ena natuna kekeni e, oi gari lasi. Emu king be ia mai noho, doniki natuna latanai ia helai.”
16 Matamanai, ena hahediba taudia ese unai gaudia idia lalopararalaia lasi, to Iesu be hairai ia abia neganai, idia laloatao Toretore Helagadia ese ia gwauraia gaudia be ia totona, bona ia dekenai unai gaudia idia vara.
17 Danu, Iesu ese guria gabuna amo Lasaro ia boiria bona mase amo ia hatorea isi lou neganai, ia ida idia noho hutuma ese idia itaia gaudia idia sivarailaia.
18 Unai dainai hutuma idia kamonai unai hoa karana ia karaia, vadaeni idia danu be ia idia hedavari henia.
19 Bena Farisea taudia be sibodia huanai idia herevahereva, idia gwau: “Umui itaia, a? Ita be gau namona ta ita hagugurua lasi. Tanobada taudia ibounai be ia idia badinaia.”
20 Aria negana ai tomadiho totona idia mai taudia huanai be Grik taudia haida.
21 Vadaeni idia be Filipo dekenai idia lao, ia be Betesaida Galilea tauna, bona ia dekenai idia noinoi, idia gwau: “Tau badana e, ai ura Iesu ai itaia.”
22 Filipo ia mai bona Andrea ia hamaoroa. Vadaeni Andrea bona Filipo idia mai bona Iesu idia hamaoroa.
23 To Iesu ese ia haere henidia, ia gwau: “Nega ia ginidae vadaeni taunimanima ena Natuna be hairai do ia abia.
24 Umui lau hamaoroa momokani, bema witi ena uhe ta be tano dekenai ia moru bona ia mase lasi, uhe tamona sibona do ia noho, to bema ia mase, huahua momo do ia havaraia.
25 Ena mauri* ia ura henia tauna ese ena mauri ia hadikaia, to inai tanobada dekenai ena mauri ia inai henia tauna ese ena mauri do ia gimaia bona mauri hanaihanai do ia abia.
26 Bema ta be lau ia hesiai henia, namona be egu murinai ia raka, bona lau noho gabunai egu hesiai tauna danu do ia noho. Bema ta be lau ia hesiai henia, Tamana ese ia do ia hanamoa.
27 Hari lau lalohekwarahi bada, dahaka do lau gwau? Tamagu e, inai lalohekwarahi negana amo lau oi hamauria. To inai lalohekwarahi negana be do ia vara, unai badina dainai lau mai.
28 Tamagu e, emu ladana oi hanamoa.” Unai dainai gado ta guba amo ia mai, ia gwau: “Unai ladana lau hanamoa vadaeni bona do lau hanamoa lou.”
29 Vadaeni unuseniai idia gini hutuma be unai idia kamonai neganai, idia gwau guba ia boiboi. Ma haida idia gwau: “Aneru ta be ia dekenai ia hereva.”
30 Iesu ia haere, ia gwau: “Ita kamonai gadona be lau totona lasi, to umui totona.
31 Dirava ese inai tanobada ia hahemaoro henia noho, bona inai tanobada ena lohia be murimuri dekenai do ia negea.
32 To lau be tanobada amo idia abia isi neganai, lau ese taunimanima idauidau do lau veria mai.”
33 Unai hereva amo ia hahedinaraia ia be edena dala ai do ia mase.
34 Unai dainai hutuma ese ia idia haere henia, idia gwau: “Taravatu amo ai kamonai, Keriso be do ia noho hanaihanai, to edena bamona oi gwau taunimanima ena Natuna be do idia abia isi? Taunimanima ena Natuna be daika?”
35 Unai dainai Iesu be idia dekenai ia gwau: “Diari be nega sisina umui huanai do ia noho. Diari ia noho lalonai umui raka, unai amo dibura ese umui do ia koua lasi. Bona dibura lalonai ia raka tauna be ia lao gabuna ia diba lasi.
36 Diari be umui dekenai ia noho neganai, diari umui abidadama henia, unai amo diari ena natudia ai do umui lao.”
Iesu be unai gaudia ia gwauraia murinai, ia lao bona idia amo ia hunia.
37 Ena be idia vairanai hoa karadia momo ia karaia, to ia idia abidadama henia lasi.
38 Unai dala amo peroveta tauna Isaia ena hereva ia guguru, ia gwau: “Iehova e, ai kamonai gauna be daika ese ia abidadama henia? Bona Iehova ese ena siahu* be daika dekenai ia hahedinaraia?”
39 Idia abidadama lasi ena badina be Isaia ese ma ia gwauraia, ia gwau:
40 “Ia ese edia matana ia hakepulua bona edia kudouna ia ha-aukaia, dika edia matana amo do idia itaia bona idia laloparara, bona dika idia helalo-kerehai bena idia lau hanamoa garina.”
41 Isaia ese Keriso be unai bamona ia herevalaia, badina ena hairai ia itaia.
42 Oibe, lohia taudia momo ese ia idia abidadama henia danu, to Farisea taudia dainai ia idia gwauraia hedinarai lasi, badina sinagoga* amo idia luludia garina.
43 Farisea taudia ese taunimanima edia hanamoa karana idia ura henia bada, to Dirava ena hanamoa karana idia ura henia maragi.
44 To Iesu ia boiboi, ia gwau: “Lau ia abidadama henia tauna be lau sibona ia abidadama henia lasi, to lau ia siaia tauna danu ia abidadama henia.
45 Bona lau ia itaia tauna ese lau ia siaia tauna danu ia itaia.
46 Lau be diari ta bamona tanobada dekenai lau mai, unai amo lau idia abidadama henia taudia ibounai be dibura lalonai do idia noho lasi.
47 To bema tau ta ese egu hereva ia kamonai bona ia badinaia lasi, ia do lau hahemaoro henia lasi. Badina lau be tanobada hahemaoro henia totona lau mai lasi, to tanobada hamauria totona lau mai.
48 Lau ia dadaraia bona egu hereva ia abia dae lasi tauna be ta ese do ia hahemaoro henia. Lau gwauraia herevana ese dina gabediai ia do ia hahemaoro henia,
49 badina lau be sibona egu ura dainai lau hereva lasi, to lau ia siaia Tamana ese lau dekenai hahegani ta ia henia, bona unai hegeregerena lau hereva bona hadibaia.
50 Danu, lau diba ena taravatu ese mauri hanaihanai dekenai ita ia hakaua lao. Unai dainai lau herevalaia gaudia be Tamana ese lau dekenai ia gwauraia hegeregerena lau herevalaia.”
