Ioane 15:1-27
15 “Lau be vain momokanina, bona egu Tamana be biru tauna.
2 Lau dekenai idia noho rigi ibounai bema huahua idia havaraia lasi, egu Tamana ese do ia kokidia, bona huahua idia atoa rigi ibounai ia hagoevaia, unai amo huahua momo idia havaraia diba.
3 Umui dekenai lau gwauraia herevadia dainai, umui goeva vadaeni.
4 Umui be lau ida umui hakapua bona lau be umui ida lau hakapua. Bema rigi ta be sibona ia noho, ia be huahua do ia havaraia diba lasi, to bema vain dekenai ia noho, huahua do ia havaraia. Unai hegeregerena, bema lau ida umui hakapua lasi, umui be huahua do umui havaraia lasi.
5 Lau be vain bona umui be rigi. Lau ida ia hakapua noho bona lau be ia ida lau hakapua tauna be huahua momo ia havaraia, badina bema lau be lasi, gau ta umui karaia diba lasi.
6 Bema ta be lau ida ia hakapua lasi, ia be idia negea rigi ta bamona, vadaeni ia kakoro. Bona taunimanima ese unai rigi idia haboudia bona lahi lalonai idia negea, vadaeni lahi ese ia araia.
7 Bema lau ida umui hakapua bona egu hereva be emui kudouna lalonai ia noho, emui ura gauna totona umui noinoi bona unai hegeregerena do ia vara.
8 Lauegu Tamana ese hanamoa ia abia dalana be inai, umui ese huahua momo umui havaraia noho bona umui hamomokania umui be egu hahediba taudia.
9 Tamana ese lau ia lalokau henia bona lau ese umui lau lalokau henia hegeregerena, namona be umui be egu lalokau lalonai umui noho.
10 Bema egu taravatu umui badinaia, umui be egu lalokau lalonai do umui noho, lau ese egu Tamana ena taravatu lau badinaia bona iena lalokau lalonai lau noho hegeregerena.
11 “Lau ese umui dekenai inai gaudia lau herevalaia vadaeni, unai amo lau abia moalena be do umui mamia momokani.
12 Inai be egu taravatu, do umui lalokau heheni, lau ese umui lau lalokau henia hegeregerena.
13 Lalokau karana hereadaena be inai, tau ta ese ena turadia totona ena mauri* ia atoa diho.
14 Bema umui dekenai lau gwauraia taravatu umui badinaia, umui be egu turadia.
15 Igui hesiai taudia bamona umui do lau boiria lou lasi, badina igui hesiai tauna be ena biaguna ese ia karaia gaudia ia diba lasi. To umui lau boiria turadia, badina egu Tamana amo lau kamonai gaudia ibounai be umui dekenai lau gwauraia hedinarai vadaeni.
16 Umui ese lau umui abia hidi lasi, to lau ese umui lau abia hidi, unai amo huahua do umui havaraia noho, bona emui huahua be do idia noho daudau. Vadaeni egu ladana ai egu Tamana dekenai herevana dahaka umui noia, umui dekenai do ia henia.
17 “Umui dekenai unai hereva lau gwauraia, unai amo do umui lalokau heheni.
18 Bema tanobada taudia ese umui idia inai henia, namona be umui diba umui idia do inai henia lasi neganai, lau idia inai henia guna.
19 Bema umui be tanobada ena, tanobada ese umui do ia lalokau henia, badina umui be iena. To hari umui be tanobada ena lasi, badina lau ese inai tanobada amo umui lau abia hidi, unai dainai tanobada ese umui ia inai henia.
20 Namona be umui dekenai lau gwauraia herevana umui laloatao, lau gwau, igui hesiai tauna ese ena biaguna ia hereaia lasi. Bema lau idia dagedage henia, umui danu do idia dagedage henia, bema egu hereva idia badinaia, emui hereva danu do idia badinaia.
21 To egu ladana dainai umui dekenai inai gaudia ibounai do idia karaia, badina lau ia siaia tauna idia diba lasi.
22 Bema lau mai lasi bona idia lau hereva henidia lasi, idia be kara dika lasi. To hari edia kara dika dainai idia be ekskius lasi.
23 Lau ia inai henia tauna ese egu Tamana danu ia inai henia.
24 Bema tau ta ese ia karaia lasi gaukaradia be idia huanai lau karaia lasi, idia be idia kara dika lasi, to hari idia ese unai gaukara idia itaia, bona lau bona egu Tamana idia inai henia.
25 To unai ia vara, edia Taravatu* dekenai idia torea herevana ia guguru totona, ia gwau, ‘Lau idia badu henia kava.’
26 Tamana amo durua tauna do lau siaia, ia be hereva momokani laumana bona ia be Tamana amo ia mai. Ia ginidae neganai, ia ese lau do ia gwauraia hedinarai.
27 Umui danu ese lau umui gwauraia hedinarai, badina egu hesiai gaukara lau hamatamaia negana amo, umui be lau ida umui noho.
