Ioane 16:1-33
16 “Umui dekenai inai gaudia lau gwauraia vadaeni, umui moru lasi totona.
2 Taunimanima ese sinagoga* murimuri ai umui do idia atoa. Oibe, nega ia mai noho, bona umui idia alaia taudia ibounai be do idia laloa idia be Dirava dekenai hesiai gaukara helagana idia karaia.
3 To unai gaudia do idia karaia, badina idia ese lau eiava Tamana idia diba lasi.
4 Umui dekenai inai gaudia lau gwauraia ena badina be, idia vara neganai do umui laloatao, lau ese umui dekenai unai gaudia lau herevalaia vadaeni.
“Matamanai umui dekenai unai gaudia lau herevalaia lasi, badina lau be umui ida lau noho.
5 To hari, lau ia siaia tauna dekenai do lau lao, bona umui ta be lau ia nanadaia lasi, ‘Oi be edeseni oi lao?’
6 To umui dekenai unai gaudia lau herevalaia vadaeni dainai, emui kudouna be hisihisi amo ia honu.
7 To lau ese umui dekenai hereva momokani lau gwauraia, umui emui namo totona do lau lao. Badina bema lau lao lasi, durua tauna* be umui dekenai do ia mai lasi, to bema lau lao, umui dekenai ia do lau siaia.
8 Ia ginidae neganai, ia ese taunimanima ibounai dekenai kara dika, kara maoromaoro, bona Dirava ena hahemaoro edia anina do ia hahedinaraia goevagoeva.
9 Gau ginigunana be kara dika do ia hahedinaraia, badina idia be lau idia abidadama henia lasi,
10 bena kara maoromaoro do ia hahedinaraia, badina lau be Tamana dekenai do lau lao. Bona lau do umui itaia lou lasi.
11 Bena ia ese Dirava ena hahemaoro do ia hahedinaraia, badina inai tanobada ena lohia be idia hahemaoro henia vadaeni.
12 “Lau ura umui dekenai gau momo lau gwauraia, to harihari unai gaudia do umui lalopararalaia lasi.
13 To ia, hereva momokani laumana unai, ia ginidae neganai, ia ese hereva momokani ibounai dekenai umui do ia hakaua lao, badina ia sibona ena ura dekenai do ia hereva lasi, to ia kamonai gaudia do ia herevalaia bona gabeai idia vara gaudia be umui dekenai do ia gwauraia.
14 Ia ese lau do ia hanamoa, badina lau amo ia kamonai herevadia be umui dekenai do ia gwauraia.
15 Tamana ena gaudia ibounai be lauegu. Unai dainai lau gwau, lau amo ia kamonai herevadia be umui dekenai do ia gwauraia.
16 Nega sisina lalonai lau do umui itaia lasi, to ma nega sisina murinai, lau do umui itaia lou.”
17 Unai dainai ena hahediba taudia haida be ta ta dekenai idia gwau: “Inai hereva ena anina be dahaka, ita dekenai ia gwau, ‘Nega sisina lalonai lau do umui itaia lasi, to ma nega sisina murinai, lau do umui itaia lou,’ bona, ‘badina lau be egu Tamana dekenai do lau lao’?”
18 Unai dainai idia gwau: “Inai hereva ena anina be dahaka, ia gwau, ‘nega sisina lalonai’? Ita diba lasi ia be dahaka ia herevalaia.”
19 Iesu ia diba idia ura ia idia henanadai henia, unai dainai idia dekenai ia gwau: “Lau gwau, nega sisina lalonai lau do umui itaia lasi, to ma nega sisina murinai, lau do umui itaia lou. Unai dainai ta ta dekenai umui henanadai, a?
20 Umui lau hamaoroa momokani, do umui taitai mai boiboi bada ida, to tanobada taudia be do idia moale. Do umui lalohisihisi, to emui lalohisihisi be moale gauna ai do ia lao.
21 Hahine ta be ia mara neganai, hisihisi ia mamia, badina ena nega ia ginidae vadaeni, to natuna ia havaraia murinai, hisihisi ia laloa lou lasi, badina ia moale tanobada dekenai natuna ta ia vara vadaeni.
22 Unai dainai, umui danu hari emui lalona ia hisihisi, to umui do lau itaia lou bona emui kudouna be do ia moale bona emui moale be tau ta ese do ia kokia lasi.
23 Bona unai dina ai lau dekenai henanadai ta do umui henia lasi. Umui lau hamaoroa momokani, bema egu ladanai Tamana dekenai gau ta umui noia, umui dekenai do ia henia.
24 Ema bona hari egu ladanai gau ta totona umui do noinoi lasi. Umui noinoi bena do umui abia, unai amo do umui moale momokani.
25 “Inai gaudia be parabole amo umui dekenai lau gwauraia. Nega ia mai noho umui dekenai parabole amo do lau hereva lasi, to umui dekenai Tamana do lau gwauraia hedinarai goevagoeva.
26 Unai dina dekenai egu ladanai do umui noinoi. Unai lau gwauraia neganai, lau gwau lasi lau be umui dainai Tamana do lau noia.
27 Tamana be umui ia ura henia bada, badina umui ese lau umui ura henia bada, bona umui abia dae lau be Tamana ena gwaukau tauna bamona lau mai.
28 Lau be Tamana amo lau mai tanobada dekenai. Bona lau be tanobada do lau rakatania bona Tamana dekenai do lau lao.”
29 Ena hahediba taudia idia gwau: “Itaia! Hari oi hereva goevagoeva bona parabole oi gaukaralaia lasi.
30 Hari ai diba oi be gau ibounai oi diba bona ta ese oi ia henanadai henia be anina lasi. Unai amo ai abia dae oi be Dirava amo oi mai.”
31 Iesu ese ia haere henidia, ia gwau: “Hari umui abidadama, a?
32 Nega be ia mai noho, bona ia ginidae vadaeni, unai negai umui ta ta be emui ruma dekenai do umui heau lao bona lau do umui rakatania, to lau be sibona lasi, badina Tamana be lau ida.
33 Unai gaudia be umui dekenai lau herevalaia vadaeni, unai amo lau dainai maino do umui abia. Tanobada dekenai umui hisihisi noho, to umui goada! Lau ese tanobada lau halusia vadaeni.”
