Ioane 17:1-26
17 Iesu be unai gaudia ia gwauraia bena guba ia itaia, ia gwau: “Tamagu e, nega be ia ginidae vadaeni, emu natuna oi hanamoa, unai amo emu natuna ese oi do ia hanamoa diba,
2 vadaeni oi ese ia dekenai taunimanima ibounai biagua siahuna oi henia hegeregerena, ia danu ese taunimanima ibounai dekenai, oibe, ia dekenai oi henia taudia dekenai, mauri hanaihanai ia henia diba.
3 Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.
4 Tanobada dekenai oi lau hanamoa bona lau dekenai oi henia gaukarana lau karaia haorea vadaeni.
5 Vadaeni Tamagu e, tanobada* ia do noho lasi neganai oi badinai lau noho bona lau abia hairaina be mani lau dekenai oi henia.
6 “Tanobada amo lau dekenai oi henia taudia dekenai oiemu ladana lau gwauraia hedinarai vadaeni. Idia be oiemu, bona lau dekenai oi henia, bona idia ese emu hereva idia badinaia.
7 Hari idia diba lau dekenai oi henia gaudia ibounai be oi amo,
8 badina lau dekenai oi henia hereva ibounai be idia dekenai lau henia, bona idia ese idia abia bona idia diba momokani lau be emu gwaukau tauna bamona lau mai bona idia abia dae oi ese lau oi siaia.
9 Idia totona lau noinoi, tanobada totona lasi, to lau dekenai oi henia taudia totona lau noinoi, badina idia be oiemu,
10 bona egu gau ibounai be oiemu bona oiemu gau ibounai be egu, bona lau dekenai oi henia taudia huanai hairai lau abia.
11 “Danu, lau be tanobada dekenai lau noho lasi, to idia be tanobada dekenai idia noho bona lau be oi dekenai do lau mai. Tamana Helagana e, oiemu ladana, lau dekenai oi henia gauna dainai idia do oi gimaia, unai amo do idia tamona, ita ruaosi ita tamona bamona.
12 Lau be idia danu lau noho neganai, idia lau gimaia, oiemu ladana, lau dekenai oi henia gauna dainai, bona idia lau naria bona idia ta ia boio lasi, to dika do ia davaria tauna sibona, unai amo Toretore Helagadia ena hereva do ia guguru.
13 Lau be oi dekenai do lau mai, to tanobada dekenai lau do noho lalonai unai gaudia lau herevalaia, egu moale do idia mamia momokani totona.
14 Lau ese oiemu hereva be idia dekenai lau henia vadaeni, to tanobada ese idia ia inai henia, badina idia be tanobada ena lasi, lau hegeregerena, lau be tanobada ena lasi.
15 “Oi lau noia, tanobada amo idia do oi kokia lasi, to Dika Tauna dainai idia do oi gimaia.
16 Idia be tanobada ena lasi, lau hegeregerena, lau be tanobada ena lasi.
17 Hereva momokani amo idia oi hahelagaia, oiemu hereva be momokani.
18 Oi ese tanobada dekenai lau oi siaia mai hegeregerena, lau danu ese tanobada dekenai idia lau siaia lao.
19 Bona idia totona lau sibona lau hahelagaia, idia danu be hereva momokani dainai do idia helaga.
20 “Idia sibona totona lau noinoi lasi, to edia hereva amo lau idia abidadama henia taudia totona lau noinoi danu.
21 Unai amo idia ibounai be do idia tamona, bona oi, Tamana, be lau ida oi hakapua, lau be oi ida lau hakapua hegeregerena. Vadaeni idia be ita ida do idia hakapua, unai amo tanobada do ia abia dae oi ese lau oi siaia.
22 Danu, lau dekenai oi henia hanamoa be idia dekenai lau henia, unai amo idia be do idia tamona, ita ruaosi ita tamona bamona.
23 Lau be idia ida lau hakapua bona oi be lau ida oi hakapua, unai amo idia be do idia lalotamona momokani, bona tanobada do ia diba oi ese lau oi siaia bona idia oi lalokau henia, lau oi lalokau henia hegeregerena.
24 Tamagu e, lau ura lau dekenai oi henia taudia be lau noho gabuna dekenai idia danu do idia noho, unai amo lau dekenai oi henia hairaina do idia itaia, badina taunimanima be tanobada ai idia vara negana amo, lau oi lalokau henia.
25 Kara Maoromaoro Tamana e, tanobada taudia be oi idia diba lasi, to lau be oi lau diba, bona hahediba taudia idia diba oi ese lau oi siaia mai.
26 Bona lau ese emu ladana be idia dekenai lau gwauraia hedinarai vadaeni, bona do lau gwauraia hedinarai, unai amo lau dekenai oi hahedinaraia lalokauna be idia dekenai do ia noho, bona lau be idia ida do lau hakapua.”
