Ioane 2:1-25
2 Vadaeni dina ihatoina ai, Kana, Galilea dekenai headava ariana ta idia karaia, bona Iesu ena sinana be unuseniai ia noho.
2 Iesu bona ena hahediba taudia danu be headava ariana dekenai idia boiria.
3 Wain ia ore neganai, Iesu ena sinana be ia dekenai ia gwau: “Edia wain be ia ore.”
4 To Iesu be ia dekenai ia gwau: “Hahine e, dahaka dainai unai do ita laloa? Lauegu nega be ia do ginidae lasi.”
5 Ena sinana be hesiai taudia dekenai ia gwau: “Umui ia hamaoroa gauna do umui karaia.”
6 Bona Iuda taudia edia hahegoeva taravatu hegeregerena, unuseniai nadi hodu 6 idia noho, idia ta ta be ranu baketi badadia* rua eiava toi idia dogoatao diba.
7 Iesu be idia dekenai ia gwau: “Hodu be ranu amo umui hahonudia.” Vadaeni idia hahonua momokani.
8 Bona idia dekenai ia gwau: “Ranu haida umui seia bona aria biaguna dekenai umui abia lao.” Vadaeni idia abia lao.
9 Aria biaguna ese wain ai idia halaoa ranuna ia mamia toho, to ia diba lasi edeseni amo ia mai, to ranu idia seia hesiai taudia be idia diba, vadaeni aria biaguna ese headava matamata tauna ia boiria,
10 bona ia dekenai ia gwau: “Taunimanima ese wain namo hereana idia atoa guna, bona taunimanima idia kekero neganai, ia namo sisina wain idia atoa. Oi ese wain namo hereana oi dogoatao ema bona hari.”
11 Iesu ese Kana, Galilea ai, unai hoa karana ginigunana ia karaia, bona ia ese ena siahu ia hahedinaraia bona ena hahediba taudia ese ia idia abidadama henia.
12 Unai murinai, Iesu, ena sinana, ena tadikaka bona ena hahediba taudia be Kaperanauma dekenai idia diho lao, to unuseniai dina momo idia noho lasi.
13 Vadaeni Iuda taudia edia Pasova be ia kahirakahira, bona Iesu be Ierusalema dekenai ia daekau lao.
14 Bona ia itaia haida be dubu helaga lalonai boromakau, mamoe, bona pune idia hoihoilaia bona moni senisia taudia be edia sea dekenai idia helai.
15 Unai dainai varo amo kwadia gauna ta ia karaia murinai, ia ese idia ibounai bona edia mamoe bona boromakau be dubu helaga amo ia luludia, bona moni senisia taudia edia koini ia bubudia bona edia pata ia girodia.
16 Bona pune idia hoihoilaia taudia dekenai ia gwau: “Inai gaudia be iniseni amo umui abia siri! Namo lasi egu Tamana ena ruma be hoihoi rumana ai umui halaoa!”
17 Ena hahediba taudia be Toretore Helagadia ena hereva idia laloatao, ia gwau: “Emu ruma lau ura henia bada, egu lalona dekenai ia be lahi bamona.”
18 Unai dainai, Iuda taudia be ia dekenai idia haere, idia gwau: “Ai dekenai edena toa do oi hahedinaraia, unai amo do ai diba oi be mai emu maoro inai gaudia oi karaia totona?”
19 Iesu be idia dekenai ia haere, ia gwau: “Inai dubu helaga umui hadikaia bona dina toi lalonai do lau haginia lou.”
20 Unai dainai Iuda taudia idia gwau: “Inai dubu helaga be lagani 46 lalonai idia haginia bona dina toi lalonai do oi haginia lou, a?”
21 To ia herevalaia dubu helaga ena anina be ena tauanina.
22 Ia be mase amo ia toreisi lou neganai, ena hahediba taudia be Iesu ese nega momo ia gwauraia herevana idia laloatao bona Toretore Helagadia bona Iesu ena hereva idia abia dae.
23 To ia be Ierusalema ai Pasova ariana dekenai ia noho neganai, taunimanima momo be ia karaia toa idauidau idia itaia bona ena ladana idia abidadama henia.
24 To Iesu be idia dainai ia naria namonamo, badina idia ibounai edia kudouna ia diba,
25 bona tau ta be ia dekenai taunimanima ta ia herevalaia be anina lasi, badina ia be taunimanima ibounai edia kudouna ia diba vadaeni.
