Ioane 21:1-25
21 Unai gaudia murinai, Iesu be Tiberia gohuna* ai ena hahediba taudia dekenai ia hedinarai lou. Ia be inai dala ai ia hedinarai.
2 Simona Petero, Toma, idia gwauraia Hekapa, Natanaela, Kana Galilea amo ia mai tauna, Sebedeo ena natuna memero rua, bona ena hahediba taudia ma rua be idia noho hebou.
3 Simona Petero be idia dekenai ia gwau: “Lau be do lau lao haoda.” Idia be ia dekenai idia gwau: “Ai danu be oi ida do ai mai.” Vadaeni idia lao bona bouti dekenai idia guia, to unai hanuaboi ai gwarume ta idia abia lasi.
4 Daba maragi ai, Iesu be kone dekenai ia gini, to hahediba taudia idia diba lasi unai be Iesu.
5 Bena Iesu be idia dekenai ia gwau: “Lalokau natudia e, umui dekenai aniani gauna ta ia noho, a?” Idia haere, idia gwau, “Lasi!”
6 Idia dekenai ia gwau: “Bouti ena idibana kahanai reke umui atoa diho bona gwarume haida do umui abia.” Bena idia atoa diho, to idia hegeregere lasi idia veria daekau totona, badina gwarume be momo herea.
7 Unai dainai Iesu ese ia lalokau henia hahediba tauna be Petero dekenai ia gwau: “Inai be Lohiabada!” Simona Petero ia kamonai unai be Lohiabada neganai, ena dabua ia hahedokilaia lou, badina ia be kopina kavakava* bona gohu dekenai ia paudobi.
8 To hahediba taudia ma haida be bouti maragina amo idia mai bona reke mai ena gwarume idia veria lao, badina idia be daudau lasi kone amo, 100 mita bamona.
9 To kone dekenai idia ginidae neganai, lahi gida idia itaia, ia latanai be gwarume bona paraoa idia noho.
10 Iesu be idia dekenai ia gwau: “Hari umui abia gwarume haida umui mailaia.”
11 Unai dainai Simona Petero be bouti dekenai ia guia bona reke lalonai idia noho gwarume badadia be kone dekenai ia veria daekau, idia ibounai be 153. Bona ena be idia be momo herea, to reke ia makohia lasi.
12 Iesu be idia dekenai ia gwau: “Umui mai aniani.” Hahediba taudia edia lalona ia goada lasi ia idia nanadaia totona: “Oi be daika?” Badina idia diba ia be Lohiabada.
13 Iesu ia mai bona paraoa ia abia, idia dekenai ia henia, bona gwarume danu be unai bamona ia karaia.
14 Mase amo ia toreisi lou murinai, unai be nega ihatoina ena hahediba taudia dekenai ia hedinarai.
15 Vadaeni idia aniani ore murinai, Iesu be Simona Petero dekenai ia gwau: “Simona, Ioane ena natuna e, lau eiava inai gwarume oi lalokau henia bada? Petero be ia dekenai ia gwau: “Oibe Lohiabada, oi diba oi lau ura henia bada.” Iesu be ia dekenai ia gwau: “Lauegu mamoe natudia oi ubua.”
16 Iesu be nega iharuana ia dekenai ma ia gwau: “Simona, Ioane ena natuna e, lau oi lalokau henia, a?” Petero be ia dekenai ia gwau: “Oibe Lohiabada, oi diba oi lau ura henia bada.” Iesu be ia dekenai ia gwau: “Lauegu mamoe natudia oi naria.”
17 Iesu be nega ihatoina ia dekenai ia gwau: “Simona, Ioane ena natuna e, lau oi ura henia, a?” Petero be ia lalohisihisi badina ia dekenai nega ihatoina ia gwau: “Lau oi ura henia, a?” Vadaeni Petero be ia dekenai ia gwau: “Lohiabada e, oi be gau ibounai oi diba. Oi diba lau ese oi lau ura henia.” Iesu be ia dekenai ia gwau: “Lauegu mamoe natudia oi ubua.
18 Oi lau hamaoroa momokani, “Oi matamata neganai, oi sibona emu rami oi kwatua bona oi ura gabuna dekenai oi loaloa. To oi buruka neganai, emu imana do oi atoa maoromaoro bona ta ese emu rami do ia kwatua bona oi ura lasi gabuna dekenai oi do ia abia lao.”
19 Iesu ena hereva amo ia hahedinaraia Petero ena mase dalana amo Dirava do ia hanamoa. Iesu ese unai ia gwauraia murinai, Petero dekenai ia gwau: “Lau oi badinaia noho.”
20 Petero ia giroa bona Iesu ese ia lalokau henia hahediba tauna ia itaia, ia murinai ia mai, guna idia aniani hebou neganai ia be Iesu badinai ia helai bona ia gwau: “Lohiabada e, oiemu mase dalana do ia karaia tauna be daika?”
21 Vadaeni Petero ese ia itaia neganai, Iesu dekenai ia gwau: “Lohiabada e, inai tauna be dahaka do ia karaia?”
22 Iesu be Petero dekenai ia gwau: “Bema lau ura do ia noho ela bona lau mai, dahaka dainai unai oi laloa? To oi ese lau oi badinaia noho.”
23 Vadaeni tadikaka huanai unai idia herevalaia, unai hahediba tauna be do ia mase lasi. To Iesu ia gwau lasi unai tauna do ia mase lasi, to ia gwau: “Bema lau ura do ia noho ela bona lau mai, dahaka dainai unai oi laloa?”
24 Unai hahediba tauna ese inai gaudia ia gwauraia hedinarai bona inai gaudia ia torea, bona ita diba ia gwauraia hereva be momokani.
25 Oibe, Iesu ese ma gau momo ia karaia danu, to bema unai ibounai edia sivarai idia torea, lau laloa tanobada* do ia hegeregere lasi unai lokua toretore ibounai ia haboua totona.
