Ioane 3:1-36
3 Farisea tauna ta ia noho ena ladana be Nikodemo, ia be Iuda taudia edia lohia tauna ta.
2 Ia be hanuaboi ai Iesu dekenai ia mai bona ia dekenai ia gwau: “Rabi* e, ai diba oi be Dirava amo oi mai hadibaia tauna, badina tau ta be oi karaia toa karadia ia karaia diba lasi, bema Dirava be ia ida ia noho lasi.”
3 Iesu be ia dekenai ia haere, ia gwau: “Oi lau hamaoroa momokani, bema ta be ia vara lou lasi, ia be Dirava ena Basileia ia itaia diba lasi.”
4 Nikodemo be ia dekenai ia gwau: “Bema tau ta be ia bada vadaeni, edena bamona ia vara lou diba? Nega iharuana ena sinana ena bogana lalonai ia vareai, bena ia vara lou diba, a?”
5 Iesu ia haere, ia gwau: “Oi lau hamaoroa momokani, bema ta be ranu bona lauma helaga amo ia vara lasi, Dirava ena Basileia lalonai ia vareai diba lasi.
6 Taunimanima amo taunimanima ia vara, bona Dirava ena lauma amo Dirava ena natuna ia vara.
7 Oi lau hamaoroa, do umui vara lou be namo, to unai hereva dainai oi hoa lasi.
8 Lai be ia ura toa gabuna dekenai ia toa, bona ena regena oi kamonai, to oi diba lasi edeseni amo ia mai bona edeseniai ia lao. Lauma helaga amo idia vara taudia ibounai danu be unai bamona.”
9 Nikodemo be ia dekenai ia haere, ia gwau: “Inai gaudia be edena bamona idia vara diba?”
10 Iesu be ia dekenai ia haere, ia gwau: “Oi be Israela edia hadibaia tauna ta, to inai gaudia oi diba lasi, a?
11 Oi lau hamaoroa momokani, ai diba gauna ai herevalaia bona ai itaia gaudia ai gwauraia hedinarai, to umui ese ai gwauraia hereva umui abia dae lasi.
12 Bema umui dekenai tanobada gaudia lau herevalaia bona umui abia dae lasi, edena bamona umui abia dae diba bema umui dekenai guba gaudia lau herevalaia?
13 Danu, tau ta be guba dekenai ia daekau lasi, to guba amo ia diho tauna, taunimanima ena Natuna sibona.
14 Tano gagaena ai Mose ese gaigai ia abia isi hegeregerena, taunimanima ena Natuna danu be do idia abia isi,
15 unai amo ia idia abidadama henia taudia ibounai ese mauri hanaihanai do idia abia.
16 “Dirava ese tanobada ia lalokau henia bada dainai, ena natuna korikorina* ia henia, unai amo ia idia abidadama henia taudia ibounai be do idia mase lasi, to mauri hanaihanai do idia abia.
17 Dirava ese ena Natuna be tanobada taudia dekenai ia siaia, tanobada taudia ia hahemaoro henia totona lasi, to tanobada taudia be ia amo mauri do idia abia totona.
18 Ia dekenai ia abidadama henia tauna be do idia hahemaoro henia lasi. To ia dekenai ia abidadama henia lasi tauna be idia hahemaoro henia vadaeni, badina Dirava ena Natuna korikorina ena ladana ia abidadama henia lasi.
19 Vadaeni hahemaoro ena badina be inai, diari be tanobada dekenai ia mai vadaeni, to taunimanima ese dibura idia ura henia to diari idia ura henia lasi, badina edia kara be idia dika.
20 Kara dika ia karaia tauna be diari ia inai henia bona diari dekenai ia mai lasi, diari ese ena kara ia hahedinaraia garina.
21 To kara maoromaoro ia karaia tauna be diari dekenai ia mai, unai amo ia karaia gaudia do idia hedinarai, idia be Dirava ena ura hegeregerena.”
22 Unai murinai, Iesu bona ena hahediba taudia be Iudea tanona dekenai idia lao, bona unuseniai idia ida nega sisina ia noho bona idia ese taunimanima idia bapatisoa.
23 Salima kahirakahira hanuana, Aenona ai, Ioane danu ese taunimanima ia bapatisoa. Badina unuseniai ranu bada ia noho bona taunimanima be idia mai noho bona idia ia bapatisoa.
24 Unai neganai Ioane be dibura rumana ai idia do atoa lasi.
25 Vadaeni Ioane ena hahediba taudia bona Iuda tauna ta be hahegoeva karadia dainai idia hepapahuahu.
26 Unai dainai Ioane dekenai idia mai bona ia dekenai idia gwau: “Rabi e, guna Ioridane kahanai oi ida ia noho tauna, oi gwauraia hedinarai tauna unai, be taunimanima ia bapatisoa bona ibounai be ia dekenai idia lao noho.”
27 Ioane ia haere, ia gwau: “Tau ta ese gau ta ia abia diba lasi, bema Dirava ese ia dekenai ia henia lasi.
28 Lau gwau lau be Keriso lasi, to Dirava ese unai tauna vairanai lau ia siaia guna, bona unai umui kamonai.
29 Headava matamata tauna ese headava matamata hahine ia abia. Vadaeni headava matamata tauna ena turana be ia badinai ia gini bona ena gadona ia kamonai neganai, ia moale bada. Unai dainai egu kudouna be moale amo ia honu.
30 Unai tauna be do ia bada ia lao, to lau be do lau maragi lau lao.”
31 Atai amo ia mai tauna ese ibounai ia hereaia. Tanobada amo ia mai tauna be tanobada amo bona tanobada gaudia ia herevalaia. To guba amo ia mai tauna ese ibounai ia hereaia.
32 Ia itaia bona kamonai gaudia ia gwauraia hedinarai, to tau ta ese ena hereva ia abia dae lasi.
33 Keriso ena hereva ia abia dae tauna ia diba momokani Dirava be ia hereva momokani.
34 Dirava ese ia siaia tauna be Dirava ena hereva ia gwauraia, badina Dirava ese lauma helaga be sisina sisina sibona ia henia lasi.
35 Tamana ese Natuna ia lalokau henia bona iena imana dekenai gau ibounai ia atoa.
36 Natuna ia abidadama henia tauna be mauri hanaihanai do ia abia, to Natuna ia kamonai henia lasi tauna be mauri do ia itaia lasi, to Dirava ena badu be ia latanai ia noho.
