Ioane 5:1-47
5 Unai murinai Iuda taudia edia aria ta idia karaia, bona Iesu be Ierusalema dekenai ia daekau lao.
2 Ierusalema ai, mamoe geitina kahirakahira ai digudigu gohu ta ia noho, Heberu gado ai ena ladana idia gwauraia Betesata. Bona du ese unai digudigu gohuna idia hagegea.
3 Unuseniai gorere taudia, matakepulu taudia, aena dika taudia bona tauanina ena kahana idia dika taudia momo idia hekure.
4 *—
5 To lagani 38 lalonai ia gorere tauna ta be unuseniai ia noho.
6 Iesu ia itaia unai tauna be ia hekure noho bona ia diba unai tauna be nega daudau lalonai ia gorere, vadaeni ia dekenai ia gwau: “Oi ura do oi namo, a?”
7 Unai gorere tauna ia haere, ia gwau: “Tau badana e, ranu idia hamarerea neganai durua tauna ta ia noho lasi digudigu gohuna lalonai lau ia atoa diho totona. To lau lao gwauraia neganai, ta be lau vairanai ia diho guna.”
8 Iesu be ia dekenai ia gwau: “Oi toreisi, oiemu mahuta patana oi abia bona oi raka.”
9 Vadaeni maoromaoro unai tauna ia namo, ena mahuta patana ia abia isi bona ia raka matamaia.
Unai be Sabati dinana.
10 Unai dainai Iuda taudia be ena gorere ia ore tauna dekenai idia hereva matamaia, idia gwau: “Inai be Sabati dinana, emu mahuta patana oi huaia be maoro lasi.”
11 To idia ia haere henia, ia gwau: “Lau ia hanamoa tauna be lau dekenai ia gwau, ‘Emu mahuta patana oi abia isi bona oi raka.’ ”
12 Ia idia nanadaia: “Daika ese oi ia hamaoroa, ‘Mahuta patana oi abia isi bona oi raka’?”
13 To ia diba lasi unai tauna be daika. Oibe, Iesu be unai gabu ia rakatania vadaeni bona hutuma be unuseniai idia noho.
14 Unai murinai, Iesu ese dubu helaga lalonai unai tauna ia davaria, bona ia dekenai ia gwau: “Itaia, oi be oi namo vadaeni. Oi kara dika lou lasi, unai amo gau dika hereana ta be oi dekenai do ia vara lasi.”
15 Unai tauna ia lao bona Iuda taudia ia hamaoroa, ia be Iesu ese ia hanamoa.
16 Unai dainai Iuda taudia ese Iesu idia dagedage henia, badina Sabati dinana ai unai gaudia ia karaia.
17 To idia ia haere henia, ia gwau: “Lauegu Tamana be ia gaukara noho ema bona hari, bona lau danu lau gaukara noho.”
18 Unai dainai, Iuda taudia ese dala idia tahua goadagoada ia idia hamasea totona, badina ia be Sabati taravatuna ia makohia sibona lasi, to Dirava ia gwauraia ena Tamana bona unai amo ia sibona be Dirava hegeregerena ai ia halaoa.
19 Unai dainai Iesu be idia ia haere henia, ia gwau: “Umui lau hamaoroa momokani, Natuna be sibona ena ura dekenai gau ta ia karaia diba lasi, to ena Tamana dekenai ia itaia karadia sibona ia karaia. Badina unai Tauna ese ia karaia gaudia ibounai be Natuna danu ese unai bamona ia karaia.
20 Tamana ese Natuna ia ura henia dainai, ia karaia gaudia ibounai be ia dekenai ia hahedinaraia, bona unai gaukara idia hereaia gaudia be ia dekenai do ia hahedinaraia, unai amo do umui hoa.
21 Tamana ese mase taudia ia hatorea isi lou bona ia hamauridia, unai hegeregerena Natuna danu ese ia ura henia taudia ia hamauridia.
22 Tamana ese tau ta ia hahemaoro henia lasi, to hahemaoro gaukara ibounai be ena Natuna dekenai ia henia.
23 Unai amo ibounai ese Natuna do idia matauraia, Tamana idia matauraia bamona. Natuna ia matauraia lasi tauna ese Tamana, natuna ia siaia tauna, ia matauraia lasi.
24 Umui lau hamaoroa momokani, egu hereva ia kamonai bona lau ia siaia tauna ia abidadama henia tauna ese mauri hanaihanai do ia abia, bona ia be hahemaoro do ia abia lasi, to mase amo ia hanaia lao mauri dekenai.
25 “Umui lau hamaoroa momokani, nega ia mai noho bona ia ginidae vadaeni, mase taudia ese Dirava ena Natuna ena gadona do idia kamonai, bona ia idia badinaia taudia be do idia mauri.
26 Badina Tamana dekenai siahu ia noho mauri ia henia totona, bona ia ese Natuna dekenai siahu ia henia ia danu ese mauri ia henia totona.
27 Bona ia dekenai siahu ia henia hahemaoro ia karaia totona, badina ia be taunimanima ena Natuna.
28 Inai kara dekenai umui hoa lasi, badina nega ia mai noho, guria gabuna* lalonai idia noho taudia ibounai ese ena gadona do idia kamonai,
29 bona do idia raka-lasi. Kara namo idia karaia taudia be mauri toreisi louna do idia abia, to kara dika idia karaia taudia be hahemaoro toreisi louna do idia abia.
30 Lau sibona egu ura dekenai gau ta lau karaia diba lasi, to lau kamonai hegeregerena hahemaoro lau karaia. Bona lau karaia hahemaoro be ia maoromaoro, badina lau sibona egu ura lau tahua lasi, to lau ia siaia tauna ena ura lau tahua.
31 “Bema lau be sibona egu kara lau gwauraia hedinarai, egu hereva be momokani lasi.
32 Ta ia noho bona ia ese lau ia gwauraia hedinarai, bona lau diba, lau totona ia gwauraia herevadia be momokani.
33 Umui ese taunimanima be Ioane dekenai umui siaia vadaeni, bona ia ese hereva momokani ia gwauraia hedinarai.
34 Taunimanima ese lau idia gwauraia hedinarai karana lau abia dae lasi, to inai gaudia lau gwauraia, unai amo do umui mauri diba.
35 Unai tauna be lamepa ta, ia ara bona ia diaridiari noho, bona nega sisina lalonai umui ura iena diari lalonai umui moale bada.
36 To Ioane ese lau totona ia gwauraia herevana be gau ta ese ia hereaia, egu Tamana ese lau hagugurua totona ia henia gaukara, lau karaia noho gaukara unai, ese idia hamomokania Tamana ese lau ia siaia.
37 Danu, lau ia siaia Tamana ese lau ia gwauraia hedinarai. Nega ta ai ena gadona umui kamonai lasi eiava ena toana umui itaia lasi.
38 Bona ena hereva be umui lalonai ia noho lasi, badina ia ese ia siaia tauna umui abidadama henia lasi.
39 “Toretore Helagadia umui tahua noho, badina umui laloa idia amo mauri hanaihanai do umui abia. Bona unai Toretore Helagadia ese lau idia gwauraia hedinarai.
40 To umui ura lasi lau dekenai umui mai, mauri umui abia totona.
41 Lau be taunimanima edia hanamoa lau abia dae lasi.
42 To lau diba momokani, umui lalonai Dirava ena lalokau be ia noho lasi.
43 Lau be egu Tamana ena ladanai lau mai, to lau umui abia dae lasi. To bema ta be sibona ena ladanai ia mai, unai tauna do umui abia dae.
44 Edena bamona umui abidadama diba, bema umui ta ta amo hanamoa umui abia dae, to Dirava tamona amo hanamoa umui tahua lasi?
45 Namo lasi umui laloa Tamana dekenai umui do lau samania, to ta ese umui do ia samania, unai be Mose, umui abidadama henia tauna.
46 Momokani, bema Mose umui abidadama henia, lau do umui abidadama henia, badina ia ese egu sivarai ia torea.
47 To bema unai tauna ena toretore umui abidadama henia lasi, edena bamona lau hereva gauna umui abidadama henia diba?”
