Ioane 9:1-41
9 Vadaeni Iesu ia raka hanai noho lalonai, ia vara negana amo ena matana ia kepulu tauna ia itaia.
2 Bona ena hahediba taudia ese ia idia nanadaia: “Rabi* e, daika ia kara dika, inai tauna eiava ena tama sina, unai dainai ia vara neganai ia matakepulu?”
3 Iesu ia haere, ia gwau: “Inai tauna bona ena tama sina idia kara dika lasi, to Dirava ena gaukara be ia dekena amo do ia hedinarai.
4 Namona be lau ia siaia tauna ena gaukara be dina lalonai ita karaia. Hanuaboi be ia mai noho bona unai negai, tau ta do ia gaukara lasi.
5 Tanobada dekenai lau do noho lalonai, lau be tanobada ena diari.”
6 Unai gaudia ia herevalaia murinai, tano dekenai ia kanudi bona ena kanudi amo raro ia karaia bona unai raro be unai tauna ena matana dekenai ia atoa,
7 bena ia dekenai ia gwau: “Oi lao Siloama (anina be ‘Siaia lao’) gohuna dekenai emu matana oi huria.” Vadaeni ia lao, ena matana ia huria, bona ia giroa mai neganai ia itaia diba.
8 Unai dainai ena dekena taudia bona guna ia noinoi neganai ia idia itaia taudia be idia hereva matamaia, idia gwau: “Inai tauna be guna iniseniai ia helai bona ia noinoi, ani?”
9 Haida idia gwau: “Inai be ia.” Ma haida idia gwau: “Lasi, to ia be ia hegeregerena.” Unai tau ia gwau: “Lau be ia.”
10 Unai dainai ia dekenai idia hereva matamaia, idia gwau: “Vadaeni, edena bamona emu matana idia kehoa?”
11 Ia haere: “Unai tau ladana Iesu ese raro ia karaia bona egu matana dekenai ia dahua bena lau dekenai ia gwau, ‘Siloama dekenai oi lao bona emu matana oi huria.’ Unai dainai lau lao bona egu matana lau huria bona lau itaia diba.”
12 Vadaeni ia dekenai idia gwau: “Unai tauna be edeseni?” Ia gwau: “Lau diba lasi.”
13 Idia ese guna ia matakepulu tauna be Farisea taudia dekenai idia hakaua lao.
14 Unai be Sabati dinana, unai dina ai Iesu ese raro ia karaia bona unai tauna ena matana ia kehoa.
15 Vadaeni, Farisea taudia danu be ia idia nanadaia matamaia edena dala ai ia itaia diba. Idia dekenai ia gwau: “Ia ese raro be egu matana dekenai ia atoa, bona egu matana lau huria bona lau itaia diba.”
16 Unai dainai Farisea taudia haida idia hereva matamaia, idia gwau: “Inai tauna be Dirava amo ia mai lasi, badina Sabati ia badinaia lasi.” Ma haida idia hereva matamaia, idia gwau: “Edena bamona kara dika tauna ta be unai bamona toa ia karaia diba?” Unai dainai idia huanai heiriheiri ia vara.
17 Vadaeni unai matakepulu tauna dekenai ma idia gwau: “Unai tauna ese oiemu matana ia kehoa dainai, oi laloa ia be edena bamona tauna?” Unai tauna ia gwau: “Ia be peroveta tauna.”
18 Iuda taudia be idia abia dae lasi guna unai tauna be ia matakepulu, bona hari ia itaia diba. Oibe, idia abia dae lasi ela bona ena tama sina idia boiria,
19 bona idia dekenai idia henanadai: “Inai be emui natuna, umui gwau ia vara negana amo ia matakepulu, a? Vadaeni, edena dala ai hari ia itaia diba?”
20 Bena ena tama sina idia haere, idia gwau: “Ai diba inai be aiemai natuna bona ia vara neganai ena matana idia kepulu.
21 To hari ia itaia diba dalana be ai diba lasi eiava daika ese ena matana ia kehoa be ai diba lasi. Ia umui nanadaia. Ia be tau badana vadaeni. Ia sibona do ia hereva be namo.”
22 Iena tama sina be Iuda taudia dekenai idia gari dainai, unai bamona idia hereva, badina Iuda taudia be idia lalotamona vadaeni, bema ta ese Iesu ia gwauraia Keriso, ia be sinagoga* amo idia lulua be namo.
23 Unai dainai ena tama sina idia gwau: “Ia be tau badana vadaeni. Ia umui nanadaia.”
24 Unai dainai idia ese guna ena matana ia kepulu tauna be nega iharuana idia boiria bona ia dekenai idia gwau: “Dirava vairanai oi hereva momokani. Ai diba unai tauna be kara dika tauna.”
25 Vadaeni ia haere, ia gwau: “Ia be kara dika tauna eiava lasi be lau diba lasi. To lau diba gauna be inai, ena be guna lau matakepulu, to hari lau itaia diba.”
26 Unai dainai ia dekenai idia gwau: “Oi dekenai dahaka ia karaia? Edena bamona emu matana ia kehoa?”
27 Idia dekenai ia haere, ia gwau: “Umui lau hamaoroa vadaeni, to umui kamonai lasi. Dahaka dainai umui ura unai umui kamonai lou? Umui danu umui ura iena hahediba taudia ai umui lao, a?”
28 Unai dainai ia idia hereva dika henia bona idia gwau: “Oi be unai tau ena hahediba tauna, to ai be Mose ena hahediba taudia.
29 Ai diba Dirava be Mose ia hereva henia, to ai diba lasi unai tauna be edeseni amo ia mai.”
30 Unai tauna be idia ia haere henia, ia gwau: “Inai be hoa gauna momokani, umui diba lasi unai tauna be edeseni amo ia mai, to ia ese egu matana ia kehoa.
31 Ita diba Dirava be kara dika taudia ia kamonai henia lasi, to bema tau ta ese Dirava ia gari henia bona ena ura ia karaia, Dirava ese unai tauna ia kamonai henia.
32 Guna negadia amo ema bona hari, ia vara matakepulu tauna ena matana be ta ese ia kehoa sivaraina be ta ia kamonai lasi.
33 Bema unai tauna be Dirava amo ia mai lasi, gau ta do ia karaia diba lasi.”
34 Ia idia haere henia, idia gwau: “Oi be kara dika ai oi vara, to oi ura ai oi hadibaia, a?” Bena ia idia negea raka-lasi.*
35 Iesu ia kamonai unai tauna idia negea raka-lasi, bona ia davaria neganai, ia gwau: “Oi ese taunimanima ena Natuna oi abidadama henia, a?”
36 Unai tauna ia haere, ia gwau: “Tau badana e, ia be daika, unai amo ia lau abidadama henia diba?”
37 Iesu be ia dekenai ia gwau: “Oi be ia oi itaia vadaeni, bona oi ia hereva henia tauna be ia.”
38 Bena ia gwau: “Lohiabada e, ia lau abidadama henia.” Bona ia vairanai ia igo diho.
39 Bona Iesu ia gwau: “Inai tanobada dekenai lau mai be inai hahemaoro karana totona: idia itaia lasi taudia do idia itaia, bona idia itaia taudia edia matana do idia kepulu.”
40 Ia ida idia noho Farisea taudia be unai gaudia idia kamonai bona ia dekenai idia gwau: “Ai danu ai matakepulu, a?”
41 Iesu be idia dekenai ia gwau: “Bema emui matana idia kepulu, umui dekenai kara dika ta do ia noho lasi. To hari umui gwau, ‘Ai itaia.’ Unai dainai emui kara dika be ia do noho.”
