Luka 21:1-38
21 Iesu ia itaia taga taudia ese edia harihari moni be moni mauana lalonai idia udaia.
2 Bena ogogami vabuna ta ia itaia, unuseniai koini* maragidia rua ia udaia,
3 bona ia gwau: “Umui lau hamaoroa momokani, unai vabu, ena be ia ogogami, to ia udaia monina ese ibounai idia udaia monina ia hereaia.
4 Badina idia ibounai be edia moni bada amo sisina sibona idia udaia, to unai hahine, ena be ia ogogami, ia ese ena mauri durua moni ibounai ia udaia.”
5 Gabeai, haida ese dubu helaga idia herevalaia, ia be nadi namodia amo bona Dirava dekenai idia henia harihari gaudia amo idia hahairaia. Unai idia herevalaia neganai,
6 Iesu ia gwau: “Nega ta do ia mai bona hari umui itaia gaudia ibounai be do idia moru, iniseniai nadi ta be nadi ta latanai do ia noho lasi, to idia ibounai do idia moru.”
7 Bena ia idia nanadaia, idia gwau: “Hadibaia Tauna e, unai gaudia be edena negai do idia vara bona dahaka toa ese do ia hahedinaraia unai gaudia be do idia vara?”
8 Ia gwau: “Umui naria namonamo, ta ese umui ia hakaua kerere garina, badina taunimanima momo be egu ladanai do idia mai, bona do idia gwau, ‘Lau be ia,’ bona ‘Nega be ia kahirakahira vadaeni.’ Idia murinai umui lao lasi.
9 Danu, tuari bona heiriheiri edia sivarai umui kamonai neganai, umui gari lasi. Badina unai gaudia do idia vara guna, to dokona be do ia mai haraga lasi.”
10 Bena idia dekenai ia gwau: “Bese ta do ia toreisi bese ta do ia tuari henia, bona basileia ta ese basileia ta do ia tuari henia,
11 bona tano mareremarere badadia do idia vara, gabu idauidau ai daihanai goreredia, bona hitolo bada do idia vara, bona gari gaudia, bona guba amo toa badadia do idia hedinarai.
12 “To unai gaudia ibounai idia do vara lasi neganai, taunimanima ese umui do idia dogoatao, umui do idia dagedage henia, sinagoga bona dibura ruma dekenai umui do idia abia lao bona egu ladana dainai king bona gavana taudia vairanai umui do idia hakaua lao.
13 Unai ese dala do ia kehoa idia dekenai umui haroro totona.
14 Unai dainai edena bamona do umui hereva be umui lalohadailaia guna lasi,
15 badina be lau ese umui dekenai aonega herevadia* do lau henia, emui inai taudia ese unai do idia dadaraia eiava idia hepapahuahulaia lasi.
16 Danu, emui tama sina, tadikaka, varavara bona turadia ese umui be kota dekenai do idia henia bona umui haida do idia hamasea,
17 bona egu ladana dainai taunimanima ibounai ese umui do idia inai henia.
18 To emui kwarana huina ta danu be do ia boio lasi.
19 Umui haheauka dainai emui mauri* do umui dogoatao.
20 “Danu, umui itaia Ierusalema be tuari oreadia ese idia hagegea neganai, do umui diba ena hadikaia ore negana be ia mai kahirakahira.
21 Unai neganai Iudea dekenai idia noho taudia be ororo dekenai do idia heau lao be namo bona Ierusalema lalonai idia noho taudia be unai gabu do idia rakatania, bona badina hanuadia dekenai idia noho taudia be ia dekenai do idia vareai lasi,
22 badina unai be hahemaoro negana, unai amo idia torea herevadia ibounai be do idia guguru.
23 Unai nega ai, rogorogo hahine bona beibi dekenai rata idia henia hahinedia, madi o! Badina unai tano dekenai hisihisi bada do ia vara bona taunimanima be panisi do idia abia,
24 idia haida be tuari kaia amo do idia moru bona ma haida be do idia abia mauri bona bese idauidau dekenai do idia abia lao, bona idau bese ese Ierusalema do idia moia ela bona idau bese edia nega ia ore.
25 “Danu, dina, hua, bona hisiu dekenai toa do idia vara bona tanobada ai bese idauidau be do idia hisihisi, do idia diba lasi dahaka do idia karaia, badina davara ena hurehure ena regena be bada.
26 Bona taunimanima do idia gari dikadika bona edia goada do ia ore, tanobada dekenai kahirakahira do idia vara gaudia dainai bona guba ena siahu gaudia be do idia mareremarere.
27 Bena idia ese taunimanima ena Natuna do idia itaia, mai ena siahu bona hairai bada ida ori lalonai do ia mai.
28 To unai gaudia idia vara matamaia neganai, umui gini tore bona emui kwarana umui abia isi, badina emui hahemauri be kahirakahira.”
29 Vadaeni idia dekenai parabole ta ia gwauraia: “Fig auna bona ma au ibounai umui laloa.
30 Edia raurau idia atoa umui itaia neganai, umui diba gau idauidau edia tubu negana be ia kahirakahira.
31 Unai hegeregerena, umui danu be unai gaudia idia vara umui itaia neganai, umui diba Dirava ena Basileia be ia kahirakahira.
32 Umui lau hamaoroa momokani, inai uru be do ia ore lasi ela bona unai gaudia ibounai idia vara.
33 Guba bona tanobada be do idia ore, to egu hereva be do ia ore lasi momokani.
34 “Do umui naria namonamo, aniani momo, inuinu momo, bona mauri ena lalohekwarahi amo emui lalohadai* maorona umui hadikaia garina, bona karaharaga unai dina be umui latanai do ia ginidae,
35 tarapu ese animal ia abia bamona. Badina unai dina be tanobada dekenai idia noho taudia ibounai latanai do ia ginidae.
36 Vadaeni umui noga noho bona hanaihanai umui guriguri goadagoada, unai amo do idia vara gaudia amo do umui heau mauri bona taunimanima ena Natuna ena vairanai do umui gini diba.”
37 Vadaeni, dina ai ia be dubu helaga ai ia hadibaia, to hanuaboi ai ia be ororo ladana Olive Ororona dekenai ia lao, unuseniai ia noho totona.
38 Bona taunimanima ibounai be daba momokani ai dubu helaga dekenai idia mai, ena hereva idia kamonai totona.
