Luka 24:1-53
24 To pura ena dina ginigunana* ai, hahine haida be daba momokani ai guria gabuna dekenai idia mai, bona idia hegaegaelaia bonana namo muramura idia mailaia.
2 To idia itaia, ta ese guria gabuna amo nadi ia doria siri vadaeni.
3 Bona idia vareai neganai, Lohiabada Iesu ena tauanina idia itaia lasi.
4 Unai gaudia idia daradaralaia noho lalonai, dabua diaridiari idia hahedokilaia tatau rua be idia badinai idia hedinarai.
5 Unai hahine be idia gari bona edia kwarana idia atoa diho noho lalonai, unai tatau be idia dekenai idia gwau: “Dahaka dainai mauri Tauna be mase taudia huanai umui tahua?
6 [Ia be iniseni ia noho lasi, to ia toreisi lou vadaeni.]* Galilea ai ia do noho neganai, umui dekenai ia gwauraia gauna mani umui laloa,
7 ia gwau taunimanima ena Natuna be kara dika taudia dekenai do idia henia bona au dekenai do idia kokoa kau,* to dina ihatoina ai do ia toreisi lou.”
8 Vadaeni Iesu ena hereva idia laloa lou,
9 bona guria gabuna amo idia giroa lou bona unai gaudia ibounai be aposetolo taudia 11 bona ma haida dekenai idia gwauraia.
10 Aposetolo taudia dekenai unai gaudia idia herevalaia hahinedia be Maria Magadala, Ioana, Iamesi ena sinana Maria, bona idia danu idia noho hahine haida.
11 To aposetolo taudia dekenai unai hahine edia hereva be anina lasi bona idia abia dae lasi.
12 [To Petero ia toreisi bona guria gabuna dekenai ia heau lao, ia igo vareai bona kumia dabua sibona ia itaia. Vadaeni ia lao bona ia vara gauna ia lalohadailaia.]*
13 To unai dina ai, hahediba taudia rua be hanua ta ladana Emausa dekenai idia lao noho, Ierusalema amo ena daudau be kilomita 11 bamona.
14 Bona idia ruaosi ese idia vara gaudia ibounai idia herevalaia noho.
15 Idia herevahereva noho lalonai, Iesu be idia dekenai ia mai bona idia ida ia raka hebou matamaia,
16 to ena toana idia reaia.
17 Idia dekenai ia gwau: “Umui raka noho lalonai dahaka gaudia umui herevalaia?” Bona mai lalohisihisi danu idia gini.
18 Idia ta ladana Kleopa be ia dekenai ia haere, ia gwau: “Oi be Ierusalema ai idau tauna ta bamona sibona oi noho dainai, ia lalonai idia vara gaudia oi diba lasi, a?”
19 Bena idia dekenai ia gwau: “Dahaka gaudia?” Ia dekenai idia gwau: “Nasareta tauna Iesu dekenai idia vara gaudia. Ia be peroveta tauna ai ia lao bona Dirava bona taunimanima ibounai vairanai mai siahu danu ia kara bona hereva.
20 Bona iseda dubu biagudia bona lohia taudia ese Pilato dekenai ia idia henia bona Pilato ese ia hamasea herevana ia gwauraia, vadaeni au dekenai ia idia kokoa kau.
21 To ai laloa inai tauna ese Israela do ia hamauria, bona danu unai gaudia idia vara negana amo hari be dina ihatoina.
22 Danu, ai huanai hahine haida edia hereva dainai ai hoa, badina idia be daba momokani ai guria gabuna dekenai idia lao,
23 to ena tauanina idia davaria lasi, vadaeni idia mai bona idia gwau idia ese aneru idia itaia danu, bona aneru idia gwau ia be ia mauri.
24 Bona ai idia bamoa taudia haida be guria gabuna dekenai idia lao bona idia itaia gau ibounai be hahine edia hereva hegeregerena, to ia idia itaia lasi.”
25 Vadaeni Iesu be idia dekenai ia gwau: “Umui kavakava taudia e, peroveta taudia ese idia gwauraia gaudia ibounai be emui kudouna ai umui abia dae haraga lasi!
26 Keriso ese ena hairai ia abia totona, unai gaudia dainai hisihisi ia abia be maoro lasi, a?”
27 Bena Mose bona Peroveta Taudia ibounai edia toretore amo ia matamaia, bona ia dainai Toretore Helagadia lalonai idia torea hereva edia anina be idia dekenai ia gwauraia.
28 Vadaeni idia lao henia hanua kahirakahira idia ginidae bona toana be ia ura do ia raka lao noho.
29 To ia idia noia goadagoada do ia lao lasi, idia gwau: “Ai danu oi noho, badina gabu be kahirakahira ia dibura.” Bena ia vareai bona idia ida ia noho.
30 Aniani patana dekenai idia ida ia helai noho lalonai, paraoa ia abia, ia guriguri, ia makohia bona idia dekenai ia henia matamaia.
31 Vadaeni idia laloparara ia be daika bona idia diba unai be ia, bena ia be idia amo ia boio.
32 Bena ta ta dekenai idia gwau: “Dala dekenai ita ia hereva henia bona Toretore Helagadia edia anina ia herevalaia goevagoeva neganai, iseda kudouna ia hamarerea momokani, ani?”
33 Bona unai nega ai idia toreisi bona Ierusalema dekenai idia giroa lou bona idia itaia aposetolo taudia 11 bona edia bamodia idia hebou.
34 Bona idia ruaosi dekenai idia gwau: “Momokani, Lohiabada be ia toreisi lou vadaeni bona Simona dekenai ia hedinarai!”
35 Vadaeni idia ruaosi ese dala dekenai ia vara gauna, bona paraoa ia makohia karana amo ia idia dibaia dalana be idia dekenai idia herevalaia.
36 Unai gaudia idia do herevalaia noho lalonai, Iesu be idia huanai ia hedinarai [bona idia dekenai ia gwau: “Maino umui abia.”]*
37 To idia hoa bona idia gari dainai, idia laloa matahanai ta idia itaia.
38 Vadaeni idia dekenai ia gwau: “Dahaka dainai umui lalohekwarahi bona dahaka dainai emui lalona* ai umui laloa daradara?
39 Lauegu imana bona aena umui itaia, inai be lau. Lau umui dogoatao bona itaia, badina lauma be hidio bona turia lasi, lau dekenai umui itaia hegeregerena.”
40 [Unai ia herevalaia lalonai, idia dekenai ena imana bona aena ia hahedinaraia.]*
41 To idia moale bada bona idia daradara noho dainai, ia idia do abia dae lasi, bena Iesu be idia dekenai ia gwau: “Umui dekenai aniani gauna ta ia noho, a?”
42 Bona ia dekenai gabua gwarume taina idia henia,
43 bena ia abia bona edia vairanai ia ania.
44 Vadaeni idia dekenai ia gwau: “Inai be egu hereva, umui ida lau do noho neganai lau gwauraia, lau dainai Mose ena Taravatu, Peroveta Taudia bona Salamo ai idia torea gaudia ibounai be do idia guguru.”
45 Bena edia lalona ia kehoa momokani, vadaeni Toretore Helagadia edia anina idia lalopararalaia.
46 Bona idia dekenai ia gwau: “Toretore Helagadia be inai bamona ia gwau, Keriso be hisihisi do ia abia bona dina ihatoina ai mase amo do ia toreisi lou.
47 Bona iena ladana dainai Dirava ese idia helalo-kerehai taudia ibounai edia kara dika do ia gwauatao. Bona unai sivarai be unai bese ibounai huanai do idia harorolaia, Ierusalema dekenai do idia matamaia.
48 Umui ese unai gaudia ibounai do umui gwauraia hedinarai.
49 Bona egu Tamana ese ia gwauhamatalaia gauna be umui dekenai do lau siaia. To umui be inai taoni ai do umui noho ela bona atai amo ia diho siahuna do umui abia.”
50 Bona idia ia hakaua lao ela bona Betania, bena ena imana ia abia isi bona idia ia hanamoa.
51 Bona idia ia hanamoa noho lalonai, idia ia rakatania bona guba dekenai ia daekau.
52 Bona ia vairanai idia igo diho bona mai moale bada ida Ierusalema dekenai idia giroa lou.
53 Bena hanaihanai dubu helaga lalonai idia noho bona Dirava idia hanamoa.
