Roma 1:1-32
1 Lau Paulo, lau be Iesu Keriso ena igui hesiai tauna. Ia ese lau ia boiria aposetolo tauna ai lau lao bona lau ia abia hidi Dirava ena sivarai namona lau harorolaia totona.
2 Dirava ese guna Toretore Helagadia lalonai, iena peroveta taudia amo, unai sivarai namona ia gwauhamatalaia.
3 Unai sivarai namona be iena Natuna ia herevalaia, ia be tanobada tauna ta bamona Davida ena garana amo ia vara.
4 Lauma helaga ena siahu amo inai Natuna be mase amo ia toreisi lou, bona unai ese ia hahedinaraia ia be Dirava ena Natuna. Oibe, unai natuna be Iesu Keriso, iseda Lohiabada,
5 ia amo hebogahisi hereadaena bona aposetolo gaukarana ai abia, unai amo bese ibounai amo haida ese abidadama idia hahedinaraia bona ia do idia kamonai henia, bona unai ese iena ladana do ia hanamoa.
6 Umui danu be unai bese huanai umui noho bona Dirava ese umui danu ia boiria Iesu Keriso ena bese taudia ai do umui lao totona.
7 Lau ese umui Roma ai umui noho taudia, Dirava ese ia lalokau henia bona ia boiria helaga taudia dekenai inai revareva lau torea:
Namona be Dirava, iseda Tamana bona Lohiabada Iesu Keriso amo hebogahisi hereadaena bona maino umui abia.
8 Guna, Iesu Keriso ena ladana amo lau ura umui ibounai dainai egu Dirava lau tanikiu henia, badina emui abidadama ena sivarai be tanobada ibounai lalonai idia herevalaia.
9 Iena Natuna ena sivarai namona harorolaia karana amo, mai kudouna ibounai ida hesiai gaukara helagana lau karaia. Bona Dirava ia diba, lau guriguri neganai hanaihanai umui lau herevalaia,
10 ia lau noia goadagoada, bema unai be iena ura lau totona, vadaeni lau be umui dekenai do lau mai.
11 Badina lau ura bada umui lau itaia, bona Dirava amo ia mai harihari gauna be umui dekenai lau henia, do umui gini goada totona.
12 Eiava do ita hagoadaia heheni, umui emui abidadama amo lau umui hagoadaia bona egu abidadama amo umui lau hagoadaia.
13 Tadikaka e, lau ura umui diba, nega momo lau ura umui dekenai lau mai, to gau haida ese egu dala idia koua ema bona hari. To lau ura umui dekenai lau mai, unai amo egu haroro gaukara unuseniai ese huahua namona do ia havaraia, bese ma haida huanai lau karaia hegeregerena.
14 Grik bona idau taudia dekenai, aonega bona sikuli lasi taudia dekenai, lau be mai egu abitorehai.
15 Unai dainai lau ura bada umui Roma ai umui noho taudia dekenai danu, sivarai namona lau harorolaia.
16 Lau be sivarai namona dainai lau hemarai lasi. Momokani, sivarai namona be Dirava ese abidadama taudia ibounai dekenai hahemauri ia mailaia dalana badana, guna Iuda taudia dekenai bena Grik taudia dekenai danu.
17 Badina mai edia abidadama taudia idia diba, sivarai namona amo Dirava ese ena kara maoromaoro ia hahedinaraia bona unai ese edia abidadama ia hagoadaia. Toretore Helagadia ena hereva bamona, ia gwau: “Kara maoromaoro tauna be ena abidadama dainai do ia mauri.”
18 Dirava ena badu be guba amo ia hedinarai, ia idia diba lasi taudia bona kara kerere taudia ibounai dekenai. Unai taudia ese dala kererena ai hereva momokani idia koua noho,
19 badina Dirava dekenai idia dibaia diba gaudia be idia huanai idia hedinarai goevagoeva, oibe, Dirava ese idia dekenai ia hahedinaraia.
20 Ena be Dirava be ta ese ia itaia diba lasi, to gau ibounai ia havaraia negana amo ema bona hari, taunimanima ese iena siahu bona iena kara idauidau idia lalopararalaia diba. Bona ia karaia gaudia amo unai idia lalopararalaia, danu idia diba iena siahu be ia doko diba lasi bona momokani ia be Dirava. Vadaeni badina namona ta ia noho lasi, Dirava diba lasi herevana idia gwauraia totona.
21 Badina ena be Dirava idia diba, to ia be Dirava hegeregerena idia hanamoa lasi bona idia tanikiu henia lasi, oibe, edia kwarana be anina lasi, bona edia laloparara lasi kudouna be ia dibura.
22 Ena be idia laloa idia be aonega taudia, to idia be kavakava taudia ai idia lao.
23 Bona idia ese ia mase diba lasi Diravana idia hanamoa lasi, to mase diba taudia, manu, aena 4 animal idauidau, bona idia rau gaudia edia laulau idia hanamoa.
24 Unai dainai, edia kudouna ai idia noho ura hegeregerena, Dirava ese idia ia rakatania kara mirodia idia karaia totona. Unai amo idia ese sibodia edia tauanina idia hadikaia.
25 Unai bamona taudia ese Dirava ena hereva momokani idia negea bona hereva koikoi idia abia dae bona idia ese Dirava ia havaraia gaudia idia matauraia bona idia tomadiho henia, to havaraia Tauna idia tomadiho henia lasi. Ia sibona ese hanamoa ia abia be maoro, ela bona hanaihanai. Amen.
26 Unai dainai Dirava ese idia ia rakatania, unai amo hemarai karadia do idia karaia edia matabodaga urana idia hagugurua totona. Idia huanai idia noho hahine be tatau ida mahuta hebou karana idia laloa lasi, to idia ura hahine ida hemarai karadia idia karaia. To Dirava ese idia ia karaia lasi unai bamona idia kara totona.
27 Tatau danu be unai bamona, hahine ida mahuta hebou karana idia laloa lasi. Edia kudouna ai unai ura goadana be lahi bamona, idia ia veria tatau ida hemarai karadia idia karaia totona. Bona edia hemarai karadia dainai, idia ese dika ena davana idia abia noho.
28 Idia ura lasi Dirava dekenai diba maoromaoro idia abia dainai, Dirava ese idia ia rakatania edia lalohadai mirodia idia badinaia totona bona kara mirodia idia karaia.
29 Oibe, idia be inai kara idauidau ibounai amo idia honu, kara kerere, kara dika, mataganigani, dika idauidau, mama, ala-ala, heiriheiri, koikoi, taunimanima hadikaia kara, udu mauri,
30 ma haida edia ladana idia hadikaia, Dirava idia inai henia, idia gwau-edeede, idia hekokoroku, sibodia idia abia isi, gau dikadia idia havaraia, tama sina idia gwau-edeede henia,
31 idia dekenai laloparara be lasi, edia gwauhamata idia badinadia lasi, ruma bese lalonai idia lalokau heheni lasi, bona idia hebogahisi lasi.
32 Ena be Dirava ena taravatu maorodia idia diba namonamo bona idia diba unai bamona idia karaia noho taudia idia mase be maoro, to unai kara idia karaia noho bona unai sibona lasi, to unai kara idia karaia noho taudia idia abia dae.
