Roma 11:1-36
11 Vadaeni, lau henanadai, Dirava ese ena taunimanima ia dadaraia, a? Lasi vaitani! Badina lau danu be Israela tauna ta, Aberahamo ena garana ta, bona Beniamina ena iduhu amo.
2 Dirava ese ena taunimanima, guna ia laloa bada taudia unai, ia dadaraia lasi. Toretore Helagadia ese Elia dainai ia gwauraia herevadia be umui diba lasi, a? Elia be Dirava ia guriguri henia bona Israela taudia dainai ia hereva momo. Ia gwau:
3 “Iehova e, idia ese emu peroveta taudia idia hamasea, emu pata helagadia idia hadikaia vadaeni, bona lau sibona lau noho bona hari idia be egu mauri* idia tahua noho.”
4 To Dirava ena haere ia dekenai be dahaka? Ia gwau: “Lau dekenai tatau 7,000 idia noho bona idia be Bala dekenai idia tui diho lasi.”
5 Vadaeni unai hegeregerena, hari inai negai haida sibona idia noho, Dirava ese ena hebogahisi hereadaena dainai idia ia abia hidi.
6 Bema unai abia hidi be hebogahisi hereadaena dainai, vadaeni unai be edia kara dainai lasi. Badina bema unai be edia kara dainai idia ia abia hidi, anina be unai hebogahisi hereadaena be hebogahisi hereadaena lasi.
7 Vadaeni dahaka do ita gwau? Israela taudia be mai edia ura ida idia tahua gauna idia abia lasi, to Dirava ese ia abia hidi taudia be unai gauna idia abia. To idia oredia edia darana be idia dibura.
8 Toretore Helagadia ai idia torea bamona, ia gwau: “Dirava ese idia ia hamahutaia, idia mahuta boio taudia bamona. Ia ese matana ia henidia to idia itaia diba lasi, bona taiana ia henidia to idia kamonai diba lasi. Idia be unai bamona idia noho ema bona hari.”
9 Danu, Davida ia gwau: “Namona be edia pata be idoa, tarapu, hahekwakwanaia, bona panisi gauna ai do ia lao.
10 Namona be edia matana do idia dibura, unai amo do idia itaia lasi, bona nega ibounai edia doruna idia kwaidu.”
11 Unai dainai lau henanadai, idia hekwakwanai bona idia moru momokani, a? Lasi vaitani! To idia raka kerere dainai, idau bese taudia dekenai hahemauri dalana ia kehoa, unai ese Israela taudia edia lalona ia hauraia bena idia mama.
12 Vadaeni bema idia raka kerere ena anina be tanobada taudia do idia taga, bona edia namba ia diho ena anina be idau bese taudia do idia taga, vadaeni edia namba ia guguru neganai, unai taudia edia taga do ia bada momokani!
13 Vadaeni lau be umui idau bese taudia lau hereva henia. Lau be idau bese taudia edia aposetolo tauna dainai, egu hesiai gaukara lau hanamoa bada,
14 bona do lau itaia bema dala haida ai egu bese taudia edia lalona do lau hauraia bena do idia mama, bona idia huanai haida do lau hamauria.
15 Dirava ese idia ia negea, bona unai ese dala ia kehoa tanobada taudia ibounai be Dirava ida maino ai do idia noho. Bema unai bamona, vadaeni Dirava ese idia ia hamauria neganai, dahaka do ia vara? Unai be hegeregere idia be mase amo idia toreisi lou bona mauri idia abia.
16 Danu, bema paraoa ena kahana ginigunana be ia helaga, vadaeni paraoa ibounai danu be ia helaga. Bona bema au ena ramuna be ia helaga, vadaeni ena rigi danu be idia helaga.
17 To bema au ena rigi haida idia utua oho to oi, ena be oi be ia tubu kava olive auna ena rigi, to oi be unai au ena rigi haida edia huanai idia atoa vareai, vadaeni oi be unai au ena ramuna amo namo bada oi abia,
18 to namo lasi oi laloa oi ese unai au rigidia oi hereaia. Bema oi laloa idia oi hereaia, namona be oi laloatao, oi ese ramuna oi durua lasi, to ramuna ese oi ia durua.
19 Reana do oi gwau: “Au rigidia idia utua oho, lau be au dekenai idia atoa vareai totona.”
20 Momokani, edia abidadama lasi karana dainai, Dirava ese idia ia utua oho, to abidadama dainai oi be oi gini noho. Namo lasi oi hekokoroku, to namona be oi gari.
21 Badina bema Dirava ese unai au ena rigi korikoridia ia utua, ia ese oi do ia utua danu.
22 Unai dainai, Dirava ena hebogahisi bona iena panisi karana do umui laloa. Idia moru taudia ia panisidia, to oi dekenai Dirava ena hebogahisi ia noho, to unai hebogahisi oi abia totona, gau badana be unai hebogahisi lalonai oi noho, bema lasi, ia ese oi danu do ia utua oho.
23 Bema idia danu idia abidadama matamaia lou, Dirava ese idia do ia atoa vareai lou, badina ia hegeregere idia ia atoa vareai lou totona.
24 Bema ia tubu kava olive auna amo oi idia utua oho, bona uma ai ia tubu olive auna ai idia atoa vareai, unai be vaia idia karaia gauna lasi. Unai dainai olive au ena rigi korikoridia be olive auna dekenai idia atoa vareai lou be do ia auka lasi!
25 Tadikaka e, lau ura inai hunia hereva helagana do umui lalopararalaia, unai amo sibona emui matana ai umui aonega lasi. Gauna be inai, Israela taudia haida edia darana ia dibura noho ela bona idau bese taudia edia namba ia guguru bona idia vareai.
26 Bona unai dala ai Israela taudia ibounai be hahemauri do idia abia. Toretore Helagadia ai idia torea bamona, ia gwau: “Hamauria tauna be Siona amo do ia mai bona Iakobo ena bese do ia durua, kara dika idia rakatania totona.
27 Bona edia kara dika lau kokia neganai, idia ida egu kontraka do lau karaia.”
28 Momokani, idia ese sivarai namona idia dadaraia dainai, idia be Dirava ena inai taudia ai idia lao, umui ese namo umui abia totona, to Dirava ese edia sene taudia dekenai ia karaia gwauhamatana dainai, haida ia abia hidi bona idia be iena turadia.
29 Dirava ese ena harihari gaudia eiava ia boiria taudia dainai do ia lalohisihisi lasi.
30 Guna umui be Dirava umui kamonai henia lasi, to edia kamonai lasi karana dainai, Dirava ese umui dekenai hebogahisi ia hahedinaraia.
31 Unai hegeregerena, idia danu be hari idia kamonai lasi, unai dainai Dirava ese umui ia hebogahisi henia, Dirava ese idia dekenai danu hebogahisi ia hahedinaraia totona.
32 Dirava ese idia ibounai be kamonai lasi karana lalonai ia koudia hebou, idia ibounai dekenai hebogahisi ia hahedinaraia totona.
33 Dirava ena taga, ena aonega bona ena diba be dobu momokani! Iena hahemaoro karadia be ta ese ia tahua diba lasi bona ena dala ibounai be ta ese ia lalopararalaia diba lasi!
34 Badina Toretore Helagadia ia gwau: “Daika be Iehova ena lalohadai ia diba? Eiava daika be iena sisiba tauna ai ia lao?”
35 Eiava “Daika ese Dirava dekenai gau ta ia henia guna, vadaeni Ia ese unai tauna dekenai do ia haloua?”
36 Badina ia ese gau ibounai ia havaraia, idia be ia amo, bona ia totona idia noho. Ia dekenai hairai ia noho ela bona hanaihanai. Amen.
