Roma 14:1-23
14 Iena abidadama ia manoka tauna umui abia dae, to iena lalohadai dainai ia do umui hahemaoro henia lasi.
2 Mai ena abidadama tauna be aniani idauidau ibounai ia ania, to ena abidadama ia manoka tauna be uma aniani sibona ia ania.
3 Aniani idauidau ibounai ia ania tauna ese aniani idauidau ia ania lasi tauna do ia laloa maragi lasi. Bona aniani idauidau ia ania lasi tauna ese aniani idauidau ibounai ia ania tauna do ia hahemaoro henia lasi, badina Dirava ese unai tauna ia abia dae.
4 Oi be daika, bona ma ta ena hesiai tauna oi hahemaoro henia? Iena biaguna sibona ese do ia abia hidi bema ia be do ia gini eiava do ia moru. Oibe, hesiai tauna be do ia gini badina Iehova ese ia haginia diba.
5 Tau ta ia laloa, dina ta ese dina ma haida ia hereaia, bona ma ta ia laloa, dina ibounai be hegeregere. Namona be ta ta idia diba momokani idia abia dae gaudia be maoro.
6 Tau ta ese dina ta ia laloa bada neganai, Iehova hanamoa totona unai dina ia laloa bada. Danu, aniani idauidau ibounai ia ania tauna be Iehova hanamoa totona ia aniani, badina ia ese Dirava ia tanikiu henia. Bona aniani idauidau ia ania lasi tauna be Iehova hanamoa totona ia aniani, bona ia danu ese Dirava ia tanikiu henia.
7 Oibe, ita ta be sibona hanamoa totona ia mauri lasi, bona tau ta be ia sibona hanamoa totona ia mase lasi.
8 Badina bema ita mauri, unai be Iehova totona ita mauri, bona bema ita mase, unai be Iehova totona ita mase. Unai dainai bema ita mauri eiava ita mase, ita be Iehova ena.
9 Unai badina dainai Keriso be ia mase bona ia mauri lou, vadaeni ia be mase taudia bona mauri taudia edia Lohia ai ia lao.
10 To dahaka dainai emu tadikaka oi hahemaoro henia? Eiava dahaka dainai emu tadikaka oi laloa maragi? Badina ita ibounai be Dirava ena hahemaoro sea vairanai do ita gini.
11 Toretore Helagadia ia gwau: “Iehova ia gwau, ‘Lau be momokani lau mauri noho hegeregerena, taunimanima ibounai be egu vairanai do idia tui diho bona taunimanima ibounai do idia gwauraia hedinarai lau be Dirava.’ ”
12 Unai dainai Dirava ese ita ibounai ta ta be iseda kara hegeregerena do ia hahemaoro henia.
13 Vadaeni namo lasi ta ta ita hahemaoro henia noho, to namona be emui lalona umui hadaia, emui tadikaka vairanai hahekwakwanaia gauna ta eiava koua gauna ta do umui atoa lasi.
14 Lau be Lohiabada Iesu lau badinaia dainai, lau diba bona lau abia dae momokani, gau ta ia miro lasi, to bema tau ta ia laloa gau ta ia miro, vadaeni ia dekenai unai gau be ia miro.
15 Bema aniani dainai emu tadikaka ia lalohisihisi, vadaeni oi be lalokau dalana oi badinaia noho lasi. Keriso be unai tauna totona ia mase, vadaeni namo lasi emu aniani dainai unai tauna oi hadikaia.
16 Unai dainai namo lasi umui karaia kara namona amo taunimanima ese umui idia gwauraia dika.
17 Badina Dirava ena Basileia be aniani eiava inuinu gauna lasi, to ia be kara maoromaoro bona maino, bona moale gauna, unai be lauma helaga ese ia havaraia karadia.
18 Unai dala ai Keriso ena igui hesiai gaukara ia karaia tauna be Dirava ese ia abia dae bona taunimanima ese idia abia dae danu.
19 Vadaeni namona be maino idia havaraia gaudia bona ma haida idia hagoadaia gaudia ita tahua noho.
20 Aniani sibona dainai Dirava ena gaukara umui hadikaia lasi. Momokani gau ibounai be idia goeva, to ta ia aniani bona ma haida ia hahekwakwanaia neganai, unai be dika.
21 Bema vamu oi ania eiava wain oi inua eiava kara ma ta amo emu tadikaka oi hahekwakwanaia, namo lasi unai gaudia oi karaia.
22 Oiemu abidadama oi dogoatao, ia be oi bona Dirava huanai ia noho gauna. Bema tau ta ese gau ta ia karaia bona unai ese ena lalomamina ia hahisia lasi, unai tauna be ia moale.
23 To bema ia daradara bona ia aniani, ia be hahemaoro ia abia vadaeni, badina ia be abidadama dainai ia aniani lasi. Oibe, abidadama dainai idia karaia lasi karadia ibounai be kara dika.
