Roma 16:1-27
16 Lau ura iseda taihuna Fibi be umui dekenai lau gwauraia hedinarai, ia be Kenekrea ai ia noho kongrigeisen ena hesiai hahinena ta.
2 Umui ese Lohiabada ia badinaia tauna umui abia dae hegeregerena ia do umui abia dae, helaga taudia dekenai umui karaia bamona, bona ia ura karaia gaudia dekenai ia do umui durua, badina ia danu ese taunimanima momo ia durua, oibe, lau danu ia durua.
3 Prisikila bona Akwila dekenai egu hanamoa hereva umui henia, idia be lau ida Keriso Iesu ena gaukara idia karaia.
4 Idia be lau* dainai kahirakahira edia mauri idia haboioa. Lau sibona lasi, to idau bese taudia edia kongrigeisen ibounai danu ese edia tanikiu hereva idia siaia.
5 Bona edia ruma ai ia hebou kongrigeisen dekenai danu hanamoa hereva umui henia. Lauegu lalokau tauna, Epaineto dekenai hanamoa hereva umui henia, Asia ai ia be Keriso ena hahediba tauna ginigunadia ta.
6 Maria dekenai hanamoa hereva umui henia, ia be umui dainai gaukara momo ia karaia.
7 Lauegu varavara, Anedroniko bona Iunia dekenai hanamoa hereva umui henia, idia be lau ida guna dibura ruma ai idia noho. Aposetolo taudia edia huanai idia be mai edia ladana namona bona nega daudau lalonai idia be Keriso ena hahediba taudia, lau hegeregerena lasi.
8 Amepilia dekenai egu hanamoa hereva umui henia, ia be Lohiabada ia badinaia bona ia lau lalokau henia.
9 Ita ida Keriso ena gaukara ia karaia tauna, Urebano, bona egu lalokau tauna Sitaku dekenai hanamoa hereva umui henia.
10 Apele dekenai hanamoa hereva umui henia, ia be Keriso ia badinaia bona ia be mai ena ladana namona. Aristobulo ena ruma bese taudia dekenai hanamoa hereva umui henia.
11 Lauegu varavara, Herodiona dekenai hanamoa hereva umui henia. Narakiso ena ruma bese lalonai Lohiabada idia badinaia taudia dekenai hanamoa hereva umui henia.
12 Trupena bona Truposa dekenai hanamoa hereva umui henia, idia be Lohiabada totona idia gaukara goadagoada hahinedia. Iseda lalokau taihuna Peresi dekenai hanamoa hereva umui henia, badina Lohiabada totona ia be gaukara momo ia karaia.
13 Lohiabada ia hesiai henia tauna namo hereana, Rufo, bona iena sinana dekenai hanamoa hereva umui henia, iena sinana be egu sinana bamona lau laloa.
14 Asunukrito, Pelegona, Hereme, Pateroba, Herema bona idia ida idia noho tadikaka dekenai hanamoa hereva umui henia.
15 Pilologo, Iulia, Nerea bona ena taihuna, bona Olimipa, bona idia ida idia noho helaga taudia ibounai dekenai hanamoa hereva umui henia.
16 Umui ta ta do umui hanamoa mai kisi helagana ida. Keriso ena kongrigeisen ibounai ese umui dekenai edia hanamoa hereva idia siaia.
17 Tadikaka e, umui lau hagoadaia, orea idia hapararaia taudia bona umui dibaia vadaeni hadibaia hereva amo umui idia hakaua kerere taudia edia lalohadai dainai, do umui naria namonamo, bona idia amo umui raka siri.
18 Badina unai bamona taudia be iseda Lohiabada Keriso ena igui hesiai taudia lasi, to idia be tauanina ena ura dikadia ena igui hesiai taudia. Idia ese hereva digaradia bona hanamoa hereva koikoidia amo kerere lasi taudia edia kudouna idia veria.
19 Emui kamonai karana be taunimanima ibounai ese idia itaia dainai, umui totona lau moale. To lau ura umui be kara namo dekenai umui aonega, bona kara dika dekenai umui be diba lasi taudia bamona do umui noho.
20 Maino ia henia Diravana ese kahirakahira Satani be emui aena henunai do ia moia diho momokani. Namona be iseda Lohiabada Iesu ena hebogahisi hereadaena be umui ida ia noho.
21 Timoteo, lau danu ia gaukara hebou tauna, bona egu varavara Lukio, Iasoni, bona Sosipatro danu ese umui dekenai edia hanamoa hereva idia siaia.
22 Lau, Teretio, be Paulo ena hereva hegeregerena inai revareva lau torea. Lau ese umui dekenai Keristani hanamoa hereva lau siaia.
23 Gaio ese umui dekenai ena hanamoa hereva ia siaia. Ia ese iena ruma ai lau ia abia dae bona ena ruma ai danu kongrigeisen ia hebou. Erasito, taoni ena moni ia naria tauna, bona ena tadikaka Koato, ese umui dekenai edia hanamoa hereva idia siaia.
24 *—
25 Dirava ese umui ia hagoadaia diba. Unai be lau harorolaia sivarai namona ida ia hegeregere, bona Iesu Keriso dainai idia harorolaia herevana ida ia hegeregere. Ia hedinarai vadaeni hunia hereva helagana be sivarai namona ena diba ida ia hegeregere. Unai hunia hereva be nega daudau herea lalonai ia hunia,
26 to hari ia hedinarai vadaeni. Bona Toretore Helagadia lalonai idia noho peroveta herevadia amo, idau bese taudia ibounai ese unai hunia hereva helagana idia dibaia. Unai be ia noho hanaihanai Diravana ena hahegani hegeregerena. Iena ura be bese ibounai ese ia do idia abidadama henia bona kamonai henia.
27 Iesu Keriso amo, aonega Diravana tamona sibona dekenai hairai do ia noho ela bona hanaihanai. Amen.
