Roma 2:1-29
2 Unai dainai, ma ta oi hahemaoro henia tauna e, oi ese emu kerere oi hunia diba lasi, herevana oi be daika, badina bema oi karaia noho karana dainai, ma ta oi hahemaoro henia, oi ese sibona oi hahemaoro henia unai, badina oi danu be unai kara oi karaia noho.
2 Ita diba Dirava ena hahemaoro be hereva momokani ida ia hegeregere, ia ese unai bamona idia karaia noho taudia do ia hahemaoro henia.
3 Unai bamona idia karaia noho taudia oi hahemaoro henia tauna e, bema oi danu be unai bamona oi karaia, oi laloa Dirava ena hahemaoro amo do oi heau mauri, a?
4 Eiava iena hebogahisi bada bona haheauka bona boga-auka karadia oi dadaraia, badina oi diba lasi Dirava ena hebogahisi karana ese oi ia durua toho, oi helalo-kerehai totona, a?
5 To oi kwara auka bona oi ura lasi oi helalo-kerehai, oi ese Dirava ena badu be oi sibona dekenai oi haboua noho. Bona Dirava ese unai badu be iena hahemaoro maoromaoro dinana ai do ia hahedinaraia.
6 Bona ia ese taunimanima ta ta edia kara hegeregerena davana do ia henia.
7 Ia ese mai haheauka ida kara namo idia karaia taudia dekenai mauri hanaihanai do ia henia. Unai taudia ese hairai bona hemataurai bona bodaga diba lasi tauanina idia tahua noho.
8 To, idia badu momo bona hereva momokani idia badinaia lasi taudia, bona kara kerere idia karaia noho taudia ese Dirava ena panisi bona badu do idia davaria.
9 Kara dika idia karaia taudia ibounai ese hisihisi bona metau do idia davaria, Iuda taudia be guna bena Grik* taudia danu.
10 To kara namo idia karaia taudia ibounai ese hairai, hemataurai, bona maino do idia davaria, Iuda taudia be guna bena Grik taudia danu.
11 Badina Dirava ese maka tamona dekenai taunimanima ibounai ia kara henia.
12 Dirava ena taravatu idia diba lasi bona idia kara dika taudia ibounai be do idia ore, ena be taravatu ia noho lasi idia ia hahemaoro henia totona, to taravatu henunai idia noho bona idia kara dika taudia be taravatu hegeregerena do idia hahemaoro henidia.
13 Badina taravatu idia kamonai taudia be Dirava vairanai idia maoromaoro lasi, to taravatu idia badinaia taudia be Dirava ese do ia gwauraidia maoromaoro.
14 Vadaeni taravatu idia diba lasi idau bese taudia be edia lalona ese ia hadibaia, taravatu idia badinaia totona. Ena be unai taudia dekenai taravatu be lasi, to edia kudouna ai taravatu ia noho.
15 Unai taudia ese idia hahedinaraia, taravatu ena hereva badadia be edia kudouna ai idia noho, bona edia lalomamina danu ese unai ia hahedinaraia, bona unai idia lalohadailaia neganai, edia lalona ese idia ia gwauraia kerere eiava idia ia gwauraia maoromaoro.
16 Dirava ese Iesu Keriso amo, taunimanima ese hehuni ai idia karaia gaudia ia hahemaoro henia neganai, unai do ia vara. Unai be lau ese lau harorolaia sivarai namona hegeregerena.
17 Bema oi be Iuda tauna bona taravatu oi abidadama henia, bona Dirava oi heagilaia,
18 bona iena ura oi diba bona Taravatu amo oi idia hadibaia dainai, oi be mai anina bada gaudia oi lalopararalaia,
19 bona oi diba oi be matakepulu taudia edia hakaua tauna, bona oi be dibura ai idia noho taudia edia diari,
20 bona oi be laloa maoromaoro lasi taudia edia hamaoromaoroa tauna, oi be natudia maragidia bamona idia laloa taudia hadibaia tauna, badina Taravatu amo oi be diba bona hereva momokani edia toana oi diba.
21 Bona oi ese ta oi hadibaia, to oi sibona oi hadibaia lasi, a? Oi haroro oi gwau, “Henaohenao lasi,” to oi henaohenao, a?
22 Oi gwau, “Heudahanai lasi” to oi heudahanai, a? Oi gwau, oi be kaivakuku oi inai henia, to oi ese Dubu Helaga edia kohu oi henaoa, a?
23 Oi ese taravatu oi heagilaia, to Taravatu utua karana amo Dirava oi matauraia lasi, a?
24 Toretore Helagadia ena hereva bamona, ia gwau: “Umui dainai Dirava ena ladana be idau bese taudia huanai idia hadikaia.”
25 Momokani, kopina utua karana be mai anina bema oi ese taravatu oi badinaia, to bema oi be taravatu utua tauna, kopina utua karana be anina lasi.
26 Unai dainai, bema kopina utua lasi tauna ese Taravatu ena hahegani maoromaorodia ia badinaia, ita gwau diba ia be kopina utua tauna, ani?
27 Bona kopina utua lasi idau bese tauna be Taravatu badinaia karana amo, ia ese oi do ia hahemaoro henia, badina ena be oi dekenai idia torea taravatu idia noho bona emu kopina idia utua, to oi ese taravatu oi utua.
28 Badina Iuda tauna korikorina be toana amo lasi, bona iena kopina utua karana be tauanina ai idia karaia gauna lasi.
29 To ta ena kudouna ai ia noho gauna ese ia hahedinaraia ia be Iuda tauna korikorina, bona iena kopina utua karana be kudouna ai, unai be lauma helaga amo ia vara, to idia torea taravatuna amo ia vara lasi. Unai tauna ena hanamoa be Dirava amo ia abia, to taunimanima amo ia abia lasi.
