Roma 4:1-25
4 Unai dainai, iseda sene tauna Aberahamo be edena bamona do ita herevalaia?
2 Hegeregere, bema Aberahamo ena kara dainai Dirava ese ia gwauraia maoromaoro, do ia heagi be mai ena badina, to Dirava vairanai unai bamona ia karaia lasi.
3 Badina Toretore Helagadia be dahaka ia gwau? Ia gwau: “Aberahamo ese Iehova ia abidadama henia, bona ia ese ia gwauraia maoromaoro.”
4 Ia gaukara tauna ese ena davana ia abia, unai be hebogahisi hereadaena dainai ia abia lasi, to unai be ena gaukara davana korikorina.
5 To bema ta be sibona ena gaukara dekenai ia abidadama lasi, to kara dika tauna ia gwauraia maoromaoro tauna ia abidadama henia, iena abidadama dainai Dirava ese ia do ia gwauraia maoromaoro.
6 Davida danu be Dirava ese ia gwauraia maoromaoro tauna ena moale ia herevalaia, bona unai moale be ia karaia gaudia dainai ia vara lasi. Ia gwau:
7 “Dirava ese taravatu idia utua taudia edia kerere ia gwauatao bona edia kara dika ia koua, unai taudia be do idia moale.
8 Iena kara dika be Iehova ese do ia laloa lasi tauna be ia moale.”
9 Vadaeni, kopina utua taudia sibona do idia moale eiava kopina idia utua lasi taudia danu do idia moale? Badina ita gwau: “Aberahamo ena abidadama dainai Dirava ese ia gwauraia maoromaoro.”
10 Dirava ese edena negai Aberahamo ia gwauraia maoromaoro? Iena kopina ia utua vadaeni murinai eiava iena kopina ia do utua lasi neganai? Iena kopina ia do utua lasi neganai, Dirava ese ia gwauraia maoromaoro.
11 Bona ia ese toa ta ia abia, unai be kopina utua karana. Unai toa ese ia hahedinaraia, ena abidadama dainai Dirava ese ia gwauraia maoromaoro, ena be ena kopina ia do utua lasi. Unai dainai ia be abidadama taudia ibounai edia tamana ai ia lao, Dirava ese unai taudia ia gwauraia maoromaoro, ena be edia kopina idia do utua lasi.
12 Bona ia be kopina utua karana idia karaia taudia edia tamana sibona lasi, to ia be abidadama ena dala idia badinaia momokani taudia edia tamana danu. Iseda tamana Aberahamo ese ena kopina ia do utua lasi neganai, ia ese unai abidadama ia hahedinaraia.
13 Aberahamo eiava ena garana ese taravatu badinaia karana amo, tanobada matamata do idia abia gwauhamatana idia abia lasi, to Aberahamo ia abidadama bona Dirava ese ia gwauraia maoromaoro dainai, unai gwauhamata ia abia.
14 Badina bema taravatu idia badinaia taudia ese unai gwauhamata idia abia, vadaeni abidadama be anina lasi gauna ai ia lao bona unai gwauhamata be ia boio.
15 Momokani, Taravatu ese badu ia havaraia, to bema taravatu be lasi, vadaeni taravatu utua karana danu be lasi.
16 Unai dainai unai gwauhamata be abidadama dainai ia vara, ia be Dirava ena hebogahisi hereadaena amo ia mai, bona unai gwauhamata be ena garana taudia ibounai dekenai do ia guguru. Taravatu idia badinaia taudia sibona dekenai lasi, to Aberahamo ena abidadama idia badinaia taudia dekenai danu, ia be ita ibounai eda tamana.
17 (Unai be Toretore Helagadia ena hereva bamona: “Lau ese oi lau abia hidi bese momo edia tamana ai do oi lao.”) Unai gwauhamata be Dirava vairanai ia vara, Aberahamo ese ia abidadama henia Tauna unai. Ia ese mase taudia ia hamauria bona idia do vara lasi gaudia be idia vara vadaeni gaudia bamona ia gwauraia.
18 Aberahamo be mai ena helaro bona ia diba momokani ia be bese momo edia tamana ai do ia lao, bona herevana toana be unai gauna do ia vara lasi, to ia ese guna idia gwauraia herevana ia abidadama henia, unai hereva ia gwau: “Emu garana be do idia momo herea.”
19 Bona ena be ena abidadama ia manoka lasi, to ena mauri lagani be 100 bamona dainai, ia laloa ena tauanina ia mase vadaeni, bona ia diba danu Sara be ia hegeregere lasi natudia ia havaraia totona.
20 To Dirava ena gwauhamata dainai, ia be mai ena abidadama bona ia daradara lasi, to iena abidadama ese ia hagoadaia bona ia ese Dirava ia hanamoa.
21 Bona ia diba momokani, Dirava ese ia gwauhamatalaia gauna be ia karaia diba danu.
22 Unai dainai “Dirava ese ia gwauraia maoromaoro.”
23 To, Toretore Helagadia lalonai inai hereva, “Dirava ese ia gwauraia maoromaoro,” be ia sibona totona lasi,
24 to ita totona danu, Dirava ese ia gwauraia maoromaoro taudia unai, badina mase amo iseda Lohiabada Iesu ia hatorea isi tauna, ita abidadama henia.
25 Ita be kara dika taudia dainai, Dirava ese Iesu ena mase dalana ia koua lasi. Bona Dirava ese ia hatorea isi lou, ita ia gwauraia maoromaoro totona.
