Roma 5:1-21
5 Vadaeni, iseda abidadama dainai Dirava ese ita ia gwauraia maoromaoro. Namona be iseda Lohiabada Iesu Keriso amo Dirava ida maino ai ita noho.
2 Ia ita abidadama henia karana amo, dala ia kehoa ita ese hebogahisi hereadaena ita abia totona, bona unai be hari ita abia noho. Bona ita moale be namo badina Dirava ena hairai, ita naria noho gauna unai, do ita abia.
3 Unai sibona lasi, to namona be hisihisi negadia lalonai ita moale, badina ita diba hisihisi ese haheauka ia havaraia.
4 Bona haheauka ese Dirava ia moalelaia karana ia havaraia. Bona Dirava ia moalelaia karana ese helaro ia havaraia.
5 Bona unai helaro ese lalohisihisi ia havaraia lasi, badina ita dekenai ia henia lauma helaga* amo, Dirava ena lalokau ese iseda kudouna ia hahonua.
6 Momokani, ita be do manoka neganai, Keriso be ita kara dika taudia totona ia mase, unai be Dirava ese ia abia hidi negana ai.
7 Ta be kara maoromaoro tauna totona ia mase be auka. To momokani, reana tau namona totona ta be do ia ura ia mase.
8 To Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.
9 Vadaeni, Keriso ena rara amo Dirava ese ita ia gwauraia maoromaoro dainai, ita diba momokani ia ese Dirava ena badu amo ita ia hamauria.
10 Guna ita be Dirava ena inai taudia, to iena Natuna ena mase amo ita be ia ida maino ai ita noho. Oibe, ita diba momokani, hari ita be Dirava ida maino ai ita noho dainai, Keriso ena mauri ese ita ia hamauria.
11 Unai sibona lasi, to danu ita ese iseda hetura karana Dirava ida be iseda Lohiabada Iesu Keriso amo ita moalelaia. Oibe, ia amo ita be Dirava ida maino ai ita noho.
12 Unai dainai, tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.
13 Taravatu ia do hedinarai lasi neganai, kara dika be tanobada ai ia noho vadaeni. To bema taravatu be lasi, ta ese ia karaia kara dikadia dainai ia do idia samania lasi.
14 Adamu ena nega amo ia mai bona Mose ena nega ai, mase be king ta bamona ia lohia. Bona Adamu ia karaia kara dikana idia karaia lasi taudia be mase ese ia lohiaia danu. Adamu be do ia mai tauna ena toana hegeregerena.
15 To harihari gauna ese ia havaraia gauna bona kara dika ese ia havaraia gauna be idia hegeregere lasi. Tau tamona ena kara dika dainai momo idia mase. To Dirava ena hebogahisi hereadaena bona ena davana lasi harihari gauna be bada herea momokani bona taunimanima momo ia durua. Unai davana lasi harihari gauna bona hebogahisi hereadaena be tau tamona, Iesu Keriso, amo ia henia.
16 Danu, unai davana lasi harihari gauna bona tau tamona ese ia karaia kara dika amo idia vara gaudia be idia hegeregere lasi. Badina tau tamona ena kara dika dainai, Dirava ese taunimanima ibounai ia gwauraia kara dika taudia, oibe, taunimanima momo idia kara dika murinai, Dirava ese unai harihari gauna ia henia, unai amo Dirava ese taunimanima ia gwauraia maoromaoro.
17 Tau tamona ena kara dika dainai, mase be king bamona unai tau amo ia lohia. Unai dainai ita diba momokani, hebogahisi hereadaena bona kara maoromaoro ena davana lasi harihari gauna be ia bada herea momokani. Unai gaudia idia abia taudia be do idia mauri bona king bamona do idia lohia, unai tau tamona Iesu Keriso amo.
18 Vadaeni tau tamona ena kara dika dainai, taunimanima idauidau ibounai be Dirava ese ia gwauraidia dika. Unai hegeregerena, tau tamona ena kara maoromaoro dainai, Dirava ese taunimanima idauidau ibounai ia gwauraidia maoromaoro, mauri do idia abia totona.
19 Tau tamona ena gwau-edeede karana dainai, taunimanima momo be kara dika taudia ai idia lao. Unai hegeregerena, tau tamona ena kamonai karana dainai, taunimanima momo be kara maoromaoro taudia ai do idia lao.
20 Taravatu be gabeai ia hedinarai, bona ia hahedinaraia taunimanima ese kara dika momo idia karaia. To taunimanima ese kara dika momo idia karaia neganai, Dirava ese idia dekenai hebogahisi hereadaena ia hahedinaraia badabada.
21 Unai ena badina be dahaka? Ena badina be inai, kara dika bona mase be king bamona idia lohia hegeregerena, kara maoromaoro amo, hebogahisi hereadaena be king bamona do ia lohia, bona iseda Lohiabada Iesu Keriso amo mauri hanaihanai do ia mailaia.
