Roma 9:1-33
9 Lau be Keriso lau badinaia dainai, lau hereva momokani bona lau koikoi lasi. Lauma helaga amo, egu lalomamina ese ia hahedinaraia,
2 lau be lau lalometau bada bona egu kudouna ia hisihisi noho.
3 Bona lau ura Keriso amo lau daudau, unai amo egu tadikaka, egu bese taudia unai, idia totona dika do lau davaria,
4 idia be Israela taudia. Dirava ese idia be ena natudia ai ia halaoa, bona hairai idia abia bona ia ese idia ida kontraka ia karaia, bona idia dekenai Taravatu, hesiai gaukara helagana, bona gwauhamata ia henidia.
5 Idia be sene taudia amo idia vara bona edia bese amo Keriso ia vara. Namona be Dirava ita hanamoa, ia ese gau ibounai ia biagua. Amen.
6 To ita gwau lasi Dirava ena hereva be ia moru. Badina Israela amo idia vara taudia ibounai be Israela taudia korikoridia lasi.
7 Bona ena be idia be Aberahamo ena garana, to Dirava ena matanai idia ibounai be Aberahamo ena natudia korikoridia lasi. To Toretore Helagadia ia gwau: “Inai tauna do idia gwauraia ‘oiemu garana,’ ia be Isako amo do ia vara.”
8 Aberahamo ena bese amo idia vara natudia be Dirava ena natudia korikoridia lasi, to gwauhamata amo idia vara natudia be Dirava ese ia gwauraidia Aberahamo ena garana.
9 Badina Dirava ese inai gwauhamata ia gwauraia: “Vaira lagani, inai bamona nega ai do lau mai bona Sara be natuna mero ta do ia havaraia.”
10 To unai nega ai sibona lasi, to Rebeka be Isako iseda sene tauna amo hekapa do ia abia neganai, unai gwauhamata ia gwauraia danu.
11 Dirava ese tau ta ia abia hidi dalana be ia laloa vadaeni, unai be tau ta ena kara dainai abia hidi ia karaia lasi, to ia sibona ese ia ura boiria tauna ia abia hidi. Unai dainai idia rua be idia do vara lasi bona kara namo eiava kara dika idia do karaia lasi neganai,
12 Dirava be Rebeka dekenai ia gwau: “Ia vara guna natuna be gabeai do ia vara natuna ena igui hesiai tauna ai do ia lao.”
13 Toretore Helagadia ia gwau bamona: “Lau ese Iakobo lau lalokau henia, to Esau lau inai henia.”
14 Vadaeni dahaka do ita gwau? Dirava dekenai kara gageva ia noho, a? Lasi vaitani!
15 Ia be Mose dekenai ia gwau: “Lau ese lau hebogahisi henia tauna do lau hebogahisi henia, bona lau ese lau lalokau henia tauna do lau lalokau henia.”
16 Unai dainai, Dirava ena abia hidi karana be ta ena ura eiava ta ena hekwarahi dainai lasi, to unai be Dirava ena ura dainai ia karaia, ia be hebogahisi tauna.
17 Toretore Helagadia lalonai Dirava be Farao dekenai ia gwau: “Inai badina dainai oiemu mauri lau kokia lasi, vadaeni oi amo egu siahu do lau hahedinaraia, bona tanobada ibounai dekenai egu ladana do idia gwauraia hedinarai.”
18 Unai dainai ia ura hebogahisi henia tauna be ia hebogahisi henia, to ma haida ia koua lasi edia kudouna idia ha-aukaia totona.
19 Vadaeni oi be lau dekenai do oi gwau: “Dahaka dainai Dirava ese taunimanima edia kerere ia tahua? Daika ese iena ura ia koua diba?”
20 Tau e, oi be daika, bona Dirava ena hereva oi haloua? Uro be iena karaia tauna dekenai do ia gwau, “Dahaka dainai lau be inai bamona oi karaia?”
21 Edena bamona? Uro karaia tauna be mai ena siahu, raro tamona amo uro rua ia karaia, ta be anina bada gaukaradia totona bona ma ta be anina lasi gaukaradia totona, ani?
22 Ena be Dirava ia ura ena badu bona ena siahu ia hahedinaraia, to bema ia badu henia urodia, oibe, dika do idia davaria gaudia dekenai ia boga-auka, be edena bamona?
23 Bona bema unai bamona ia karaia, ia hebogahisi henia urodia dekenai iena hairai bada ia hahedinaraia totona, unai urodia be guna ia hegaegaelaidia hairai do idia abia.
24 Ita be unai uro, ia ese ita be Iuda taudia huana sibona amo ia boiria lasi, to bese idauidau amo danu.
25 Hosea bukana ai ia hereva bamona, ia gwau: “Idia be egu taunimanima lasi, to hari idia do lau gwauraia ‘egu taunimanima,’ bona lau lalokau henia lasi hahinena do lau gwauraia egu ‘lalokau.’
26 Bona inai hereva, ‘Umui be egu taunimanima lasi,’ lau gwauraia gabuna ai, oibe, unai gabu ai idia do idia gwauraia ‘mauri Diravana ena natudia.’ ”
27 Danu, Isaia ese Israela taudia be inai bamona ia gwauraidia: “Ena be Israela taudia edia natudia edia namba be kone ena miri bamona, to Dirava ese haida sibona do ia hamauria.
28 Badina Iehova ese tanobada ai hahemaoro do ia karaia bona do ia karaia haraga.”
29 Danu, Isaia be guna ia hereva bamona: “Bema tuari oreadia edia Iehova be ita dekenai garana ta ia rakatania lasi, ita be Sodoma bona Gomora bamona ita lao vadaeni.”
30 Vadaeni, dahaka do ita gwau? Ena be bese idauidau taudia be kara maoromaoro idia badinaia toho lasi, to Dirava ena matanai idia be kara maoromaoro taudia ai idia lao, badina idia abidadama.
31 To ena be Israela taudia be kara maoromaoro ena taravatu idia badinaia toho, to idia ese taravatu idia hagugurua lasi.
32 Dahaka dainai? Badina idia laloa edia kara amo idia be kara maoromaoro taudia ai do idia lao, to abidadama amo lasi. Idia be “hahekwakwanaia nadina” dekenai idia hekwakwanai,
33 Toretore Helagadia ia gwau bamona: “Siona dekenai hahekwakwanaia nadina bona hamorua nadi badana lau atoa, to ia dekenai ia abidadama tauna be do ia lalohisihisi lasi.”
