Revareva Ginigunana Korinto Taudia Dekenai 13:1-13
-
Lalokau—kara hereadaena (1-13)
13 Bema taunimanima bona aneru edia gado ai lau hereva, to lau dekenai lalokau be lasi, lau be idia botaia gaba mai ena rege bada eiava simbol* bamona.
2 Bema lau peroveta diba bona hunia hereva helagadia ibounai bona diba ibounai lau lalopararalaia,+ bona bema egu abidadama be bada dainai ororo be gabu ta amo gabu ma ta dekenai lau atoa diba, to lau dekenai lalokau be lasi, lau be anina lasi.+
3 Bona bema egu kohu ibounai lau hoihoilaia ogogami taudia lau ubua totona+ bona egu tauanina be boubou gauna bamona lau henia lau heagi totona, to lau dekenai lalokau be lasi,+ lau ese namo ta do lau davaria lasi.
4 Lalokau+ be ia haheauka*+ bona ia hebogahisi.+ Lalokau be ia mama lasi.+ Ia heagi lasi, bona ia hekokoroku lasi.+
5 Lalokau be dala kererena ai ia kara lasi,+ ia be sibona ena namo ia tahua lasi,+ bona ia badu haraga lasi.+ Bona ia be ta ena kerere ia laloatao noho lasi.+
6 Lalokau be kara maoromaoro lasi karana ia moalelaia lasi,+ to hereva momokani ia moalelaia.
7 Lalokau be gau ibounai dekenai ia gini goada,+ gau ibounai ia abidadama henia,+ gau ibounai lalonai ia be mai ena helaro,+ bona gau ibounai ia haheaukalaia.+
8 Lalokau be ia ore diba lasi. To harihari gaudia hegeregere, peroveta herevadia gwauraia karana, gado idauidau ai hereva karana,* bona hoa dalanai diba abia karana be do idia ore.
9 Iseda diba be sisina sibona+ bona peroveta herevadia edia kahana sibona ita gwauraia.
10 To gau ibounai ita diba neganai, unai diba sisina be do ia ore.
11 Lau maragi neganai, maragina bamona lau hereva bona laloa, bona maragina bamona gau edia anina lau tahua, to hari lau bada vadaeni, bona maragina ena kara lau rakatania vadaeni.
12 Hari ita itaia namonamo lasi, auri hevarivari amo gaudia ita itaia goevagoeva lasi bamona, to gabeai do ita itaia goevagoeva. Hari egu diba be sisina sibona, to gabeai diba maoromaoro do lau abia, Dirava ese lau ia diba namonamo hegeregerena.
13 To inai gaudia toi, abidadama, helaro, bona lalokau be do idia noho, to idia amo hereadaena be lalokau.+
Futnout
^ Ia be miusiki gauna ta. Ia be sekol, rua oi pataia hebou neganai, ia rege.
^ Eiava “boga-auka.”
^ Unai be, hoa dalanai gado ma haida ai hereva karana.
