Revareva Ginigunana Korinto Taudia Dekenai 14:1-40
14 Umui hekwarahi ta ta umui lalokau henia totona, bona mai emui ura bada ida Dirava amo idia mai harihari gaudia umui tahua noho, to gau badana be do umui peroveta.+
2 Gado ma ta ai ia hereva tauna be taunimanima dekenai ia hereva lasi, to Dirava dekenai ia hereva, badina be tau ta ese ena hereva ia lalopararalaia lasi,+ to ia be lauma helaga amo hunia hereva helagadia+ ia gwauraia.
3 To, ia peroveta tauna ese ena hereva amo taunimanima ia hagoadaia, ia durua, bona edia lalona ia hanamoa.
4 Gado ma ta ai ia hereva tauna ese ia sibona ia hagoadaia, to ia peroveta tauna ese kongrigeisen ia hagoadaia.
5 Vadaeni lau ura umui ibounai be gado idauidau ai umui hereva,+ to gau badana be umui peroveta.+ Momokani, ia peroveta tauna ese gado idauidau ai ia hereva tauna ia hereaia, badina bema gado idauidau ai ia hereva tauna ese ena hereva ia hahanaia lasi, kongrigeisen ese goada do ia abia lasi.
6 To tadikaka e, bema hari lau mai bona umui dekenai gado idauidau ai lau hereva, unai ese edena bamona umui do ia durua? Bema lau ura umui lau durua, namona be Dirava amo lau abia hereva+ eiava diba,+ eiava peroveta herevana eiava hadibaia herevana amo do lau hereva.
7 Unai hegeregerena, mauri lasi gaudia hegeregere fluti eiava hap* ese rege idia karaia diba. To bema rege idauidau idia karaia lasi, edena bamona fluti eiava hap idia karaia tiuni oi dibaia diba?
8 Bema kibi ena rege be ia hedinarai namonamo lasi, daika be tuari totona do ia hegaegae?
9 Unai bamona danu, bema taunimanima ese idia lalopararalaia lasi gado ai umui hereva, edena bamona ta ese emui hereva ena anina ia lalopararalaia diba? Umui gwauraia herevadia be anina lasi.
10 Tanobada ai taunimanima be gado idauidau momo ai idia hereva, bona unai gado ibounai be mai edia anina.
11 Bema gado ta lau lalopararalaia lasi, unai gado ia herevalaia tauna dekenai lau be idau tauna, bona ia be idau tauna lau dekenai.
12 Umui danu be unai bamona, lauma helaga ena harihari gaudia umui ura henia bada, bona umui hekwarahi unai harihari gaudia hahedinaraia karana umui habadaia totona, unai amo kongrigeisen do umui hagoadaia.+
13 Unai dainai, namona be gado ma ta ai ia hereva tauna ia guriguri, unai amo ena hereva ia hahanaia diba.+
14 Bema lau be gado ma ta ai lau guriguri, lau be lauma helaga ena harihari gauna amo lau guriguri, to unai hereva ena anina lau lalopararalaia lasi.
15 Vadaeni dahaka do lau karaia? Lau abia lauma helaga ena harihari gauna amo do lau guriguri, bona lau lalopararalaia guriguri danu do lau gwauraia. Lau abia lauma helaga ena harihari gauna amo Dirava dekenai ane do lau abia, bona unai ane ena anina do lau lalopararalaia danu.
16 To, bema lauma helaga ena harihari gauna amo Dirava oi hanamoa lasi, edena bamona umui huanai ia noho idau tauna ese oi gwauraia tanikiu herevana dekenai “Amen” ia gwauraia diba? Badina oi gwauraia herevana ia diba lasi.
17 Momokani, oi be dala maorona ai tanikiu herevana oi gwauraia, to unai tauna oi hagoadaia lasi.
18 Dirava lau tanikiu henia, badina gado idauidau herevalaia karana dekenai umui ibounai lau hereaia.
19 To, kongrigeisen lalonai lau be taunimanima ese idia lalopararalaia hereva 5 do lau gwauraia, unai amo ma haida lau hadibaia diba, to taunimanima idia lalopararalaia lasi gado dekenai hereva 10,000 do lau gwauraia lasi.+
20 Tadikaka e, natudia maragidia bamona umui laloa lasi,+ to namona be kara dika dekenai umui be natudia maragidia bamona,+ bona taunimanima badana bamona umui laloa.+
21 Taravatu* lalonai ia gwau: “Iehova* ia gwau, ‘Idau tano taudia edia gado bona idau taudia edia uduna amo inai taunimanima do lau hereva henia, herevana unai bamona lau karaia, to idia ese lau do idia kamonai henia lasi.’”+
22 Unai dainai, gado ma ta ai hereva karana be toa ta, abidadama taudia totona lasi, to abidadama lasi taudia totona.+ Bona peroveta hereva gwauraia karana be abidadama lasi taudia totona lasi, to abidadama taudia totona.
23 Vadaeni bema kongrigeisen taudia ibounai be gabu tamona dekenai idia hebou bona idia ibounai be gado idauidau ai idia hereva, to idau taudia eiava abidadama lasi taudia idia vareai, do idia gwau umui be umui kavakava, ani?
24 To bema umui ibounai umui peroveta noho, bona abidadama lasi tauna eiava idau tauna ia vareai, umui emui hereva ese unai tauna do ia sisiba henia bona ena kara do ia tahua namonamo.
25 Iena kudouna ai idia noho hunia gaudia do idia hedinarai, bena do ia tui diho bona Dirava ia tomadiho henia, ia gwau: “Momokani, Dirava be umui huanai ia noho.”+
26 Vadaeni tadikaka e, dahaka do umui karaia? Umui hebou neganai, ta be Dirava hanamoa ane ia abia, ma ta be ia hadibaia, ma ta be Dirava amo ia abia hereva ia gwauraia, ma ta be gado ma ta ai ia hereva, bona ma ta be hereva edia anina ia gwauraia.+ Namona be gau ibounai umui karaia kongrigeisen hagoadaia totona.
27 Bona bema haida be gado ma ta ai idia hereva, namona be taunimanima rua eiava toi sibona ese unai idia karaia, bona edia nega ta ta ai idia hereva, bona ta ese edia hereva ia hahanaia be namo.+
28 To bema hahanaia tauna be lasi, namona be kongrigeisen lalonai idia hereva lasi bona edia kudouna ai Dirava idia hereva henia.
29 Namona be peroveta taudia rua eiava toi+ idia hereva, bona namona be ma haida ese edia hereva ena anina idia tahua.
30 To bema ia helai noho tauna ta be Dirava amo hereva ta ia abia, ia hereva noho tauna ese ena hereva ia hadokoa be namo.
31 Umui ibounai ta ta be emui nega ta ta ai umui peroveta diba, unai amo ibounai ese diba bona goada do idia abia.+
32 Namona be peroveta taudia ese lauma helaga ena harihari gauna gaukaralaia dalana idia biagua namonamo.
33 Badina Dirava be maino Diravana, bona gau ibounai ia karaia namonamo.+
Helaga taudia edia kongrigeisen ibounai be inai bamona,
34 namona be kongrigeisen lalonai hahine idia hereva lasi, badina ia maoro lasi idia hereva totona.+ To, namona be tatau henunai idia noho,+ Taravatu ia hereva bamona.
35 Bema idia ura gau ta idia dibaia, namona be ruma ai edia adavadia idia nanadaia, badina kongrigeisen lalonai hahine idia hereva be hemarai gauna.
36 Dirava ena hereva be umui amo ia mai, a? Eiava umui sibona ese Dirava ena hereva umui abia, a?
37 Bema ta ia laloa ia be peroveta tauna eiava lauma helaga ena harihari gauna ia abia, namona be ia abia dae umui dekenai lau torea herevadia be Lohiabada ena oda herevadia.
38 To bema ta be unai hereva ia lalopararalaia lasi, vadaeni unai bamona do ia noho.
39 Unai dainai egu tadikaka e, mai ura bada ida umui peroveta noho,+ bona gado idauidau ai hereva karana do umui taravatua lasi.+
40 To namona be gau ibounai umui karaia namonamo bona dala maorona ai umui karaia.+
Futnout
^ Miusiki gauna ta mai ena varo, gita bamona, to ena toana be idau.
^ Unai be, Mose Ena Taravatu.
