Revareva Ginigunana Korinto Taudia Dekenai 15:1-58
15 Tadikaka e, hari lau ura umui dekenai lau gwauraia vadaeni sivarai namona lau gwauraia lou.+ Guna umui ese unai sivarai umui abia dae, bona unai sivarai namona lalonai umui gini goada noho.
2 Umui dekenai lau gwauraia sivarai namona bema umui dogoatao auka, umui be hahemauri umui abia, bema lasi, umui be abidadama taudia ai umui lao kava.
3 Badina lau ese lau abia mai anina bada gaudia be umui lau hadibaia, unai gaudia ta be inai, Keriso be iseda kara dika dainai ia mase, Toretore Helagadia ena hereva hegeregerena.+
4 Oibe, ia idia guria,+ to dina ihatoina ai ia toreisi lou,+ Toretore Helagadia ena hereva hegeregerena.+
5 Kepa* dekenai ia hedinarai,+ bena aposetolo taudia 12 dekenai ia hedinarai.+
6 Unai murinai ia be tadikaka 500 mai kahana dekenai nega tamona ia hedinarai,+ idia momo be idia do mauri noho, to haida be mase lalonai idia mahuta vadaeni.
7 Unai murinai Iamesi dekenai ia hedinarai,+ bena aposetolo taudia ibounai dekenai ia hedinarai.+
8 To dokonai lau dekenai danu ia hedinarai,+ hegeregere lau be ena nega maorona ai ia vara lasi natuna ta bamona.
9 Aposetolo taudia ibounai huanai lau be maragi herea, bona lau be hegeregere lasi do idia gwauraia aposetolo tauna, badina lau ese Dirava ena kongrigeisen lau dagedage henia.+
10 To Dirava ena hebogahisi hereadaena dainai, inai gaukara lau abia. Bona lau dekenai ia hahedinaraia hebogahisi hereadaena be ia hahedinaraia kava lasi. To hesiai gaukara lalonai egu hekwarahi ese idia ibounai edia hekwarahi ia hereaia, to sibona egu goada amo unai lau karaia lasi, to Dirava ena hebogahisi hereadaena be lau dekenai ia noho dainai, unai gaukara lau karaia.
11 Ena be lau eiava aposetolo taudia ma haida ai haroro, to ai harorolaia herevana be unai, bona umui be unai dala ai abidadama taudia ai umui lao.
12 Bema Keriso be mase amo ia toreisi lou herevana ai harorolaia,+ edena bamona umui huanai haida idia gwau mase taudia be do idia toreisi lou lasi?
13 Momokani, bema mase taudia be do idia toreisi lou lasi, vadaeni Keriso danu be ia toreisi lou lasi.
14 To bema Keriso be ia toreisi lou lasi, vadaeni iseda haroro gaukara be anina lasi, bona iseda abidadama danu be anina lasi.
15 Ma danu, ia hedinarai ita be Dirava ena hereva gwauraia koikoi taudia,+ badina ita gwau Dirava ese Keriso ia hatorea isi lou.+ To bema Dirava ese mase taudia do ia hatorea isi lou lasi, vadaeni Keriso danu ia hatorea isi lou lasi.
16 Oibe, bema mase taudia be do idia toreisi lou lasi, vadaeni Keriso danu be ia toreisi lou lasi.
17 Danu, bema Keriso be ia toreisi lou lasi, emui abidadama be anina lasi, umui be emui kara dika lalonai umui do noho.+
18 Danu Keriso ida idia hakapua bona mase lalonai idia mahuta taudia be idia ore.+
19 Bema inai mauri sibona lalonai Keriso ita abidadama henia, taunimanima ibounai amo ita madi o.
20 To Keriso be mase amo ia toreisi lou vadaeni, ia be mase lalonai idia mahuta taudia amo ia toreisi lou tauna ginigunana.*+
21 Tau tamona amo mase ia vara,+ unai hegeregerena tau tamona amo mase taudia do idia toreisi lou.+
22 Adamu dainai taunimanima ibounai idia mase noho,+ unai hegeregerena Keriso amo taunimanima ibounai be mauri do idia abia.+
23 To idia ta ta be edia nega ta ta ai mauri do idia abia: Keriso be ia toreisi lou guna,*+ unai murinai Keriso idia badinaia taudia be iena noho negana lalonai do idia toreisi lou.+
24 Bena dokonai, ia ese ena Dirava bona Tamana dekenai Basileia do ia henia hanai, bona unai neganai gavamani ibounai, lohia taudia ibounai, bona siahu taudia ibounai be ia ese ia haorea vadaeni.+
25 Badina ia be do ia king ela bona Dirava ese ena inai taudia ibounai be ena aena henunai ia atoa.+
26 Bona mase, ita inai henia gauna ginigabena, be do ia ore momokani.+
27 Badina Dirava ese “gau ibounai be Keriso ena aena henunai ia atoa.”+ To inai hereva, ‘Dirava ese gau ibounai Keriso henunai ia atoa’+ ese ia hahedinaraia lasi Dirava be Keriso henunai ia noho, lasi, to Dirava ese gau ibounai be Keriso henunai ia atoa.+
28 Dirava ese gau ibounai be Natuna henunai do ia atoa murinai, Natuna be sibona do ia atoa Dirava henunai, ia dekenai gau ibounai ia henia Diravana unai.+ Unai dala amo, Dirava sibona be gau ibounai edia Lohia ai do ia lao.+
29 Bema mase taudia be do idia toreisi lou lasi, vadaeni mase lalonai idia bapatiso taudia be edena bamona?+ Bema mase taudia do idia toreisi lou lasi, vadaeni dahaka dainai unai bamona bapatiso idia abia?
30 Ma danu, dahaka dainai nega ibounai emai mauri be kahirakahira ai haboioa?+
31 Tadikaka e, lau be umui, Keriso Iesu iseda Lohiabada ena hahediba taudia lau heagilaia, lau hereva momokani, dina ibounai kahirakahira egu mauri lau haboioa.
32 Bema Efeso dekenai dagedage animal ida lau heatu,+ ma haida idia karaia bamona,* lau dekenai unai ena namo be dahaka? Bema mase taudia be do idia toreisi lou lasi, “ita aniani bona ita inuinu, badina kerukeru do ita mase.”+
33 Namo lasi haida ese umui idia koia. Hebamo dikadia ese ta ena kara namodia idia hadikaia diba.+
34 Kara maoromaoro dalana dekenai umui noga bona kara dika umui karaia noho lasi, badina haida be Dirava idia diba lasi. Unai bamona lau hereva umui lau hahemaraia totona.
35 To, tau ta do ia gwau: “Mase taudia be edena bamona do idia toreisi lou? Bona idia toreisi lou neganai, edena bamona tauanina do idia abia?”+
36 Oi be kavakava tauna! Oi hadoa gauna be do ia mase guna, bena do ia tubu.
37 Bona tubutubu gauna oi hadoa lasi, to uhe sibona oi hadoa, sedira ia be witi uhena eiava uhe ma ta.
38 To Dirava ena ura hegeregerena, ia ese uhe dekenai anina ia henia, bona uhe ta ta dekenai edia anina korikorina ia henia.
39 Tauanina ibounai be idauidau, ta be taunimanima edia tauanina, ta be boromakau edia tauanina, ta be manu edia tauanina, bona ta be gwarume edia tauanina.
40 Bona guba tauanidia+ bona tanobada tauanidia+ idia noho, to guba tauanidia edia hairai be idau, bona tanobada tauanidia edia hairai be ma idau.
41 Dina ena hairai be idau, hua ena hairai be ma idau,+ bona hisiu edia hairai danu be idau. Momokani, hisiu ta ta edia hairai be idauidau.
42 Mase taudia edia toreisi lou danu be unai bamona. Ia bodaga diba tauanina idia guria, to ia bodaga diba lasi tauanina ia toreisi lou.+
43 Tauanina idia guria neganai ia bodaga, to ia be mai hairai ida ia toreisi lou.+ Idia guria tauanina be manoka gauna, to ia be mai goada ida ia toreisi lou.+
44 Taunimanima edia tauanina idia guria, to lauma tauanina ai ia toreisi lou. Bema taunimanima edia tauanina ia noho, lauma tauanina danu ia noho.
45 Toretore Helagadia ia gwau: “Tau ginigunana Adamu be mauri tauna ai ia lao.”+ To Adamu ginigabena be mauri ia henia laumana ai ia lao.+
46 Tauanina ginigunana be lauma tauanina lasi, to ia be taunimanima edia tauanina, to gabeai lauma tauanina ai ia lao.
47 Tau ginigunana be tano amo bona Dirava ese kahu amo ia karaia,+ to tau iharuana be guba amo.+
48 Tanobada taudia be Dirava ese kahu amo ia karaia tauna hegeregerena. Bona guba taudia be guba amo ia mai tauna hegeregerena.+
49 Bona ita be Dirava ese kahu amo ia karaia tauna hegeregerena,+ gabeai ita danu be guba dekenai ia lao tauna hegeregerena.+
50 To tadikaka e, egu hereva ena anina be inai: Hidio bona rara ese Dirava ena Basileia do idia abia diba lasi. Bona bodaga gauna ese bodaga diba lasi gauna ena gabu ia abia diba lasi.
51 Lau ese hunia hereva helagana umui lau hamaoroa inai: Ita haida be mase lalonai do ita mahuta lasi, to do ita idau,+
52 kibi dokona idia hiriria neganai, unai do ia vara haraga, ia be matana hakapua bona kehoa haraga bamona. Kibi do idia hiriria,+ bona mase taudia be ia bodaga diba lasi tauanina ai do idia toreisi lou, bona ita be do ita idau.
53 Ia bodaga diba gauna be ia bodaga diba lasi gauna ai do ia lao.+ Bona ia mase diba gauna be mase diba lasi gauna ai do ia lao.+
54 To ia bodaga diba gauna be ia bodaga diba lasi gauna ai do ia lao bona ia mase diba gauna be mase diba lasi gauna ai do ia lao neganai, Toretore Helagadia ena hereva do ia guguru: “Ia ese mase do ia haorea momokani.”*+
55 “Mase e, oiemu kwalimu be edeseni? Mase e, oiemu hisihisi be edeseni?”+
56 Kara dika ese mase ena hisihisi ia havaraia,+ bona kara dika ena siahu be Taravatu* amo ia mai.+
57 To Dirava ita tanikiu henia, badina iseda Lohiabada Iesu Keriso amo ia ese ita dekenai kwalimu ia henia!+
58 Unai dainai egu lalokau tadikaka e, do umui gini goada,+ bona do umui marere lasi, nega ibounai Lohiabada ena gaukara idauidau lalonai do umui bisi,+ badina umui diba, Lohiabada ena gaukara lalonai emui hekwarahi be hekwarahi kava lasi.+
Futnout
^ Ladana ma ta be Petero.
^ Gr., “huahua ginigunana.”
^ Gr., “huahua ginigunana.”
^ Eiava reana, “taunimanima idia laloa bamona.”
^ Gr., “hadonoa.”
^ Unai be, Mose Ena Taravatu.
