Revareva Ginigunana Korinto Taudia Dekenai 2:1-16
2 Tadikaka e, umui dekenai lau mai neganai, lalona veria herevadia eiava aonega herevadia lau gaukaralaia lasi,+ umui dekenai Dirava ena hunia hereva helagana+ lau harorolaia totona.
2 Badina umui ida lau noho neganai, egu lalona lau hadaia gau idauna lau laloa lasi, to Iesu Keriso bona ia be au dekenai idia kokoa kau karana sibona lau laloa.+
3 Bona umui dekenai lau mai neganai, lau manoka, lau gari, bona lau heudeheude bada.
4 Bona lau hereva bona haroro neganai, lalona veria aonega herevadia lau gaukaralaia lasi, to egu hereva amo lauma helaga ena siahu lau hahedinaraia,+
5 unai amo emui abidadama be taunimanima edia aonega dekenai do ia gini lasi, to Dirava ena siahu dekenai do ia gini.
6 Momokani, ita ese lo taudia huanai aonega herevadia ita herevalaia,+ to ita be inai nega oromana* ena aonega eiava inai nega oromana ena lohia taudia edia aonega ita herevalaia lasi, unai taudia be do idia ore.+
7 To Dirava ena aonega ita herevalaia, unai be hunia hereva helagana lalonai.+ Unai aonega be hunia gauna, nega oromadia idia do vara lasi neganai, Dirava ese unai ia gwauraia guna vadaeni, ita ese hairai ita abia totona.
8 Inai nega oromana* ena lohia taudia be unai aonega idia diba lasi,+ badina bema unai idia diba, idia ese hairai Lohiabada do idia hamasea lasi.*
9 To Toretore Helagadia ia gwau bamona: “Dirava ese ia idia lalokau henia taudia totona ia hegaegaelaia gaudia be matana ese ia itaia lasi bona taiana ese ia kamonai lasi, bona ta ese ena lalona ai ia laloa diba lasi.”+
10 Dirava ese ena lauma helaga amo+ ita dekenai unai ia hahedinaraia,+ badina lauma helaga ese gau ibounai ia tahua, Dirava ena dobu gaudia danu.+
11 Tau ta be ma ta ena lalona ai idia noho gaudia ia diba lasi, to ia be sibona ena lalona ai idia noho gaudia ia diba. Unai hegeregerena, ta ese Dirava ena lalona ai idia noho gaudia ia diba lasi, to Dirava ena lauma sibona be unai ia diba.
12 Vadaeni ita be tanobada ena laloa dalana ita abia lasi, to Dirava amo ia mai laumana ita abia,+ unai amo Dirava ese mai moale ida ita dekenai ia henia gaudia do ita diba.
13 Taunimanima ese idia hadibaia aonega herevadia amo unai gaudia ita gwauraia lasi,+ to lauma helaga ese ia hadibaia herevadia amo ita herevalaia.+ Oibe, lauma helaga amo idia mai herevadia ita gaukaralaia, Dirava ena gau idauidau ita herevalaia totona.
14 To tauanina gaudia sibona ia laloa tauna be Dirava ena lauma amo idia mai gaudia ia abia dae lasi, badina ia dekenai unai be kavakava, bona unai gaudia do ia diba lasi, badina tau ta ese Dirava ena lauma ia abia be namo, unai gaudia ia tahua totona.
15 Dirava ena lauma ese ia hakaua tauna be gau ibounai ia tahua namonamo,+ to tau ta ese unai tauna ena kara do ia tahua lasi.
16 Toretore Helagadia ia gwau: “Daika be Iehova* ena lalohadai ia diba bona ia do ia hadibaia?”+ To ita be Keriso ena lalohadai ita abia vadaeni.+
Futnout
^ Eiava “au dekenai do idia kokoa kau lasi.”
