Revareva Ginigunana Korinto Taudia Dekenai 6:1-20
6 Bema umui ta be ma ta dekenai mai ena samani herevana,+ umui laloa kara maoromaoro lasi taudia edia kota vairanai do umui gini, to helaga taudia vairanai lasi, a?
2 Umui diba lasi, a? Helaga taudia ese tanobada do idia hahemaoro henia.+ Bona bema umui be tanobada do umui hahemaoro henia, vadaeni dahaka dainai umui hegeregere lasi gau maragidia umui hamaoromaoroa totona?
3 Umui diba lasi, a? Ita ese aneru do ita hahemaoro henidia.+ Unai dainai do ita hegeregere inai mauri lalonai idia vara gaudia ita hamaoromaoroa totona, ani?
4 Bema umui ura kota ese inai mauri lalonai idia vara gaudia ia hamaoromaoroa,+ umui be kongrigeisen ese ia laloa maragi taudia umui abia hidi, umui idia hahemaoro henia totona, a?
5 Lau be unai bamona lau hereva umui lau hahemaraia totona. Umui huanai aonega tauna ta ia noho lasi, iena tadikaka huanai hahemaoro ia karaia totona, a?
6 To tadikaka ta ese tadikaka ma ta be kota dekenai ia abia lao bona abidadama lasi taudia vairanai idia gini!
7 Umui be kota dekenai ta ta umui samania neganai, anina be umui kwalimu lasi. Dahaka dainai umui ura lasi kara gageva umui haheaukalaia?+ Bona haida ese koikoi dalanai emui kohu idia abia neganai, dahaka dainai umui haheauka lasi?
8 To, umui ese emui tadikaka dekenai kara gageva umui karaia, bona koikoi dalanai edia kohu umui abia!
9 Umui diba lasi, a? Kara dika taudia be Dirava ena Basileia do idia abia lasi.+ Umui sibona do umui koia lasi: Matabodaga taudia,*+ kaivakuku tomadiho henia taudia,+ heudahanai taudia,+ hahine edia kara bamona idia karaia tatau,+ tatau ida idia mahuta hebou tatau,+
10 henaohenao taudia, mataganigani taudia,+ kekero momo taudia,+ hereva dika taudia, bona koikoi dalanai kohu idia abia taudia be Dirava ena Basileia do idia abia lasi.+
11 Bona guna umui haida be unai bamona. To Dirava ese umui ia hagoevaia,+ umui ia hahelagaia,+ bona iseda Lohiabada Iesu Keriso ena ladanai bona iseda Dirava ena lauma amo umui ia gwauraia maoromaoro.+
12 Lau dekenai gau ibounai be taravatu lasi, to idia haida ese namo do idia mailaia lasi.+ Lau dekenai gau ibounai be taravatu lasi, to dala do lau kehoa lasi gau ta ese lau ia biagua totona.
13 Aniani be bogana totona bona bogana be aniani totona, to Dirava ese unai gaudia ruaosi do ia haorea.+ Tauanina be matabodaga karadia* totona lasi, to ia be Lohiabada totona+ bona Lohiabada be tauanina totona.
14 To Dirava ese ena siahu+ amo Lohiabada ia hatorea isi,+ bona ia ese ita danu be mase amo do ia hatorea isi.+
15 Umui diba lasi, a? Emui tauanina be Keriso ena tauanina kahadia.+ Vadaeni Keriso ena tauanina kahadia do lau abidia siri bona ariara hahine ida do lau hakapua, a? Lasi momokani!
16 Umui diba lasi, a? Ariara hahine ida ia hakapua tauna be ia danu tauanina tamona. Dirava ia gwau, “Idia ruaosi be tauanina tamona ai do idia lao.”+
17 To Lohiabada ida ia hakapua tauna be ia danu ia lalotamona.+
18 Matabodaga karadia* amo umui heau siri!+ Ta ese ia karaia kara dika idauidau be ena tauanina ia hadikaia lasi, to matabodaga karana ia karaia noho tauna be ia sibona ena tauanina dekenai ia kara dika.+
19 Umui diba lasi, a? Umui emui tauanina be lauma helaga ena dubu,+ inai lauma helaga be Dirava amo bona ia be umui lalonai ia noho.+ Danu, umui be umui sibona emui lasi,+
20 badina be Dirava ese dava bada gauna amo umui ia hoia.+ Unai dainai, emui tauanina do umui gaukaralaia+ Dirava hanamoa totona.+
