Revareva Ginigunana Korinto Taudia Dekenai 8:1-13
8 Lau ura herevalaia gauna be kaivakuku dekenai idia bouboulaia aniani.+ Ita ibounai be unai ita diba.+ Diba ese hekokoroku ia havaraia, to lalokau ese taunimanima ia hagoadaia.+
2 Ena be tau ta ia laloa ia be gau ta ia diba vadaeni, to ia be unai gauna ia diba lasi.
3 To bema ta ese Dirava ia lalokau henia, Dirava be unai tauna ia diba.
4 Lau ura herevalaia gauna be kaivakuku dekenai idia bouboulaia aniani ania karana. Ita diba, tanobada ai kaivakuku be anina lasi,+ bona Dirava be tamona sibona.+
5 Ena be gau momo idia gwauraia dirava, herevana idia be guba ai eiava tanobada ai,+ bona “dirava” be momo bona “lohiabada” be momo,
6 to ita dekenai Dirava be tamona,+ Tamana unai,+ ia amo gau ibounai idia vara, bona ita be ia dainai ita mauri,+ bona Lohiabada be tamona, Iesu Keriso unai, ia amo gau ibounai idia vara,+ bona ia amo ita mauri noho.
7 To, taunimanima ibounai ese unai diba idia abia lasi.+ Haida be guna kaivakuku idia tomadiho henia dainai, idia laloa aniani ania karana be kaivakuku dekenai idia henia boubouna bamona,+ bona edia lalomamina, ia manoka gauna unai, ia dika.+
8 To aniani ese iseda hetura karana Dirava ida do ia hanamoa lasi.+ Bema ita aniani lasi, gau ta dekenai ita dabu lasi bona bema ita aniani, namo ta ita abia lasi.+
9 Umui be mai emui maoro gau ta umui abia hidi totona, to namona be umui naria namonamo, dika unai ese manoka taudia ia hahekwakwanaia.+
10 Bema tau ta ese oi, diba oi abia vadaeni tauna, ia itaia kaivakuku dubu ta lalonai oi helai bona oi aniani, unai ese ena lalomamina ia manoka tauna do ia hagoadaia kaivakuku dekenai idia bouboulaia aniani ia ania totona, a?
11 Vadaeni emu diba dainai, ia manoka tauna ena abidadama oi hadikaia, ia be emu tadikaka bona Keriso be ia dainai ia mase.+
12 Unai dainai, umui be emui tadikaka dekenai umui kara dika bona edia lalomamina manokana umui hadikaia neganai,+ umui be Keriso dekenai umui kara dika.
13 Unai dainai bema aniani ese egu tadikaka ia hahekwakwanaia, lau ese vamu do lau ania lou lasi.+
