Samuela Ginigunana 11:1-15
11 Bena Amono tauna,+ Nahasa, be Gileada ena taoni Iabese+ tuari henia totona ia daekau mai. Bona Iabese taudia ibounai be Nahasa dekenai idia gwau: “Ai ida gwauhamata ta oi karaia bona oi do ai hesiai henia.”
2 Amono tauna Nahasa be idia dekenai ia gwau: “Umui ida gwauhamata do lau karaia, bema emui matana idiba ibounai lau kokia. Unai be Israela taudia ibounai hahemaraia totona do lau karaia.”
3 Iabese ena tau badadia be ia idia haere henia, idia gwau: “Ai dekenai dina 7 oi henia, unai amo Israela ena gabu ibounai dekenai gwaukau taudia ai siaia lao diba. Vadaeni bema ta ia noho lasi ai ia hamauria totona, ai sibona do ai henia oi dekenai.”
4 Gabeai, unai gwaukau taudia be Saulo ena noho gabuna Gibea+ dekenai idia lao, bona taunimanima vairanai unai hereva idia gwauraia, bona taunimanima ibounai idia taitai bada.
5 To Saulo be rei gabuna amo ia raka mai bona boromakau edia murinai ia raka, bona ia gwau: “Taunimanima dekenai dahaka ia vara? Dahaka dainai idia taitai noho?” Vadaeni idia ese ia dekenai Iabese taudia edia hereva idia gwauraia.
6 Dirava ena lauma ese Saulo ia hasiahua+ bona unai hereva ia kamonai neganai, ia badu dikadika.
7 Unai dainai boromakau rua ia abia bona ia utudia maragimaragi bona gwaukau taudia edia imana amo ia siaia lao, Israela ena gabu ibounai dekenai, idia gwau: “Bema ta be Saulo bona Samuela edia hereva ia badinaia lasi, iena boromakau dekenai inai bamona do idia karaia!” Bona Iehova ese taunimanima edia lalona ai gari ia havaraia, unai dainai idia be mai lalotamona ida idia mai.
8 Bona Saulo ese Beseka ai idia ia duahia, bona Israela tatau be 300,000 bona Iuda tatau be 30,000.
9 Vadaeni Saulo bona ena tuari taudia be unai gwaukau taudia dekenai idia gwau: “Gileada ai Iabese taudia dekenai inai hereva umui gwauraia be namo, ‘Kerukeru dina tubua bamona ai, umui do ai hamauria.’” Unai neganai, gwaukau taudia idia lao bona Iabese taudia dekenai unai hereva idia gwauraia bona idia moale dikadika.
10 Unai dainai Iabese taudia idia gwau: “Kerukeru, ai be sibona do ai henia umui dekenai, bona emui ura hegeregerena ai umui kara henia diba.”+
11 Murina dinana ai, Saulo ese ena tuari taudia be orea toi dekenai ia hapararaia, bona daba ena gima negana* ai idia vareai lao kamepa ena huana dekenai bona Amono taudia+ idia aladia ela bona dina tubua bamona ai. Idia roho mauri taudia be sibona ta ta idia heau lao gabu idauidau dekenai.
12 Vadaeni taunimanima be Samuela dekenai idia gwau: “Daidia idia gwau, ‘Saulo be ita do ia lohiaia?’+ Unai taudia be idia dekenai oi henia bona do idia hamasedia.”
13 To Saulo ia gwau: “Hari dina tau ta do umui hamasea lasi,+ badina hari dina Iehova ese Israela taudia ia hamauria.”
14 Gabeai Samuela be taunimanima dekenai ia gwau: “Umui mai bona Gilegala dekenai ita lao+ bona do ita hamomokania lou Saulo be king.”+
15 Vadaeni taunimanima ibounai be Gilegala dekenai idia lao, bona idia ese Gilegala ai Saulo be king ai idia halaoa Iehova vairanai. Bena maino karaia bouboudia be Iehova vairanai idia henia,+ bona Saulo bona Israela taudia ibounai be unai nega idia moalelaia.+
Futnout
^ Unai be, hegeregere 2:00 a.m. amo ela bona 6:00 a.m.
