Samuela Ginigunana 2:1-36
2 Bena Hana ia guriguri, ia gwau:
“Iehova dainai egu kudouna ia moale;+Iehova ese lau dekenai goada ia henia.*
Lau be mai gari lasi ida egu inai taudia lau hereva henia,Badina lau oi hamauria dainai lau moale bada.
2 Tau ta be ia helaga lasi Iehova hegeregerena,Dirava ma ta be oi hegeregerena lasi,+Bona edia dirava idauidau be iseda Dirava, Nadi Badana unai, bamona lasi.+
3 Mai hekokoroku ida umui hereva noho lasi;Namo lasi sibona abia isi herevadia be emui uduna amo idia raka-lasi,Badina Iehova be gau ibounai ia diba Diravana,+Bona ia ese taunimanima edia kara ia tahua namonamo.
4 Tatau goadadia edia peva be idia hamakohia,To manoka taudia be idia goada.+
5 Idia bogakunu taudia be paraoa abia totona do idia gaukara,To hitolo taudia be do idia hitolo lou lasi.+
Ia gabani hahinena be natudia memero 7 do ia havaraia,+To mai ena natudia memero momo hahinena be natudia do ia havaraia lou lasi.
6 Iehova be ta ia hamasea diba bona ta ia hamauria diba;Ia ese ta be Mase Gurina* dekenai ia atoa diho, bona ta ia hatorea isi lou diba.+
7 Iehova ese ta ena kohu ia kokia diba, bona ta ena kohu ia habadaia diba;+Ia ese ta ia atoa diho, bona ta ia abia isi diba.+
8 Ia ese dagi lasi tauna be kahu amo ia abia isi,Bona ogogami tauna be momoru negea gabuna amo ia abia isi,+Lohia taudia ida idia helai totona,Oibe, idia dekenai dagi badana lau henia.
Tanobada ena badina be Iehova ena imana ai ia noho,+Bona ia ese unai badina latanai tanobada ia atoa.
9 Ia idia abidadama henia taudia edia raka dalana ia naria,+To kara dika taudia be dibura lalonai ia hadikadia ore,+Badina tau ta be sibona ena goada amo ia kwalimu diba lasi.+
10 Iehova ese ia idia tuari henia taudia do ia hadikaia ore;+Idia dekenai ena badu ia halasia neganai, guba do ia boiboi.+
Iehova ese tanobada ibounai do ia hahemaoro henia,+Ia ese ena abia hidi king dekenai siahu do ia henia+Bona ena horoa tauna ena siahu* do ia habadaia.”+
11 Bena Elikana be ena ruma dekenai ia giroa lou, unai be Rama dekenai, to unai mero be Iehova ena hesiai tauna ai ia lao,+ hahelaga tauna Eli ena henari henunai.
12 Eli ena natudia be tatau dikadia,+ idia ese Iehova idia matauraia lasi.
13 Idia be taunimanima ese idia mailaia boubou gauna amo edia kahana maorona idia abia lasi, to idia be inai idia karaia:+ Tau ta ese boubou gauna ta ia henia bona vamu idia nadua noho lalonai, hahelaga tauna ena hesiai tauna be foka badana ida ia lao,
14 bona foka be nanadu pani lalodiai ia atoa vareai. Bona hahelaga tauna ese foka amo ia gwadaia vamu be ia sibona totona ia abia. Silo dekenai Israela taudia ibounai ese unuseniai idia mailaia gaudia dekenai unai bamona idia karaia.
15 Danu, boubou gaudia ia henia tauna ese animal ena digara ia do gabua lasi neganai,+ hahelaga tauna ena hesiai tauna be ia lao bona ia dekenai ia gwau: “Hahelaga tauna dekenai vamu oi henia ia gabua totona. Ia ese oi nadua vamu do ia abia lasi, to vamu kasirina do ia abia.”
16 Bona bema unai tau be ia dekenai ia gwau: “Namona be ta ese animal ena digara ia gabua guna,+ bena oi ura henia gauna oi abia diba,” to hesiai tauna ia gwau: “Lasi, harihari lau dekenai oi henia, bema lasi, lau sibona ese do lau abia!”
17 Unai dainai Iehova ena vairanai unai hesiai taudia edia kara dika be bada herea,+ badina idia ese Iehova ena boubou gaudia idia matauraia lasi.
18 Vadaeni Samuela be Iehova vairanai hesiai gaukara ia karaia,+ mai ena epodi* dabua,+ ena be ia be mero sibona.
19 Danu, iena sinana ese ia totona imana lasi dabua maragina ia turia, bona lagani ta ta ai Samuela ena sinana bona tamana ese ia dekenai unai idia abia lao, unai be lagani ta ta ena boubou henia totona idia daekau lao neganai.+
20 Bona Eli ese Elikana bona ena adavana ia hanamodia bona Elikana dekenai ia gwau: “Mani Iehova ese inai hahine amo oi dekenai natuna ma ta ia henia, Iehova dekenai oi henia natuna ena gabunai.”+ Bena edia ruma dekenai idia giroa lou.
21 Vadaeni Iehova ese Hana ia hebogahisi henia, bena natudia ia havaraia diba,+ bona natudia memero toi bona kekeni rua ma ia havaraia. Bona inai mero Samuela ia tubu daekau lalonai, Iehova be ia ida ia noho.+
22 Eli be ia buruka momokani, to iena natudia ese Israela taudia ibounai idia kara henia ena sivarai ibounai ia kamonai vadaeni,+ bona idia ese hebou dubu ena vareai gabuna ai idia gaukara hahinedia ida idia mahuta hebou ena sivarai danu ia kamonai.+
23 Bona vaia idia dekenai ia gwau: “Dahaka dainai inai bamona karadia umui karaia noho? Badina lau kamonai, taunimanima ibounai ese umui dainai idia gwauraia sivarai be dika sibona.
24 Egu natudia e, unai kara umui hadokoa, badina Iehova ena taunimanima huana amo lau kamonai sivarai be dika sibona.
25 Bema tau ta be tau ma ta dekenai ia kara dika, ta ese ia totona Iehova do ia noinoi henia. To bema tau ta be Iehova dekenai ia kara dika,+ daika be ia totona do ia guriguri?” To idia ura lasi edia tamana idia kamonai henia, bona Iehova ese ena lalona ia hadaia idia ia hamasea totona.+
26 Unai nega lalonai, Samuela ia tubu daekau noho, bona Iehova bona taunimanima ese idia ura henia bada.+
27 Dirava ese ia siaia tauna ta be Eli dekenai ia mai bona ia gwau: “Iehova be inai bamona ia hereva: ‘Emu sene tamana ena bese be Aigupito ai Farao ena* igui hesiai gaukara idia karaia lalonai, lau be idia dekenai lau hedinarai, ani?+
28 Bona Israela ena iduhu ibounai huana amo emu sene tamana idia abia hidi+ egu hahelaga tauna ai do ia lao, egu boubou patana dekenai animal do ia bouboulaidia,+ bonana namo muramura do ia gabua, bona lauegu vairanai epodi do ia karaia. Bona lau ese ia bona iena bese dekenai maoro lau henia, Israela taudia ese lau dekenai lahi boubouna totona idia mailaia vamu ena kahana ta do idia abia.+
29 Umui lau oda henia boubou gaudia bona harihari gaudia be egu tomadiho gabuna ai do umui henia, to dahaka dainai unai umui matauraia lasi?+ Dahaka dainai emu natudia oi matauraia bada to lau oi matauraia lasi? Dahaka dainai egu taunimanima, Israela taudia unai, ese idia henia boubou gaudia ibounai edia kahana namo hereadia amo emui bogana umui hahonua noho?+
30 “‘Unai dainai Iehova, Israela ena Dirava ena hereva be inai: “Momokani guna lau gwau, emu bese bona emu sene tamana ena bese be hanaihanai lau do idia hesiai henia.”+ To hari Iehova ia gwau: “Unai do ia vara lasi, badina lau idia matauraia taudia do lau matauraia,+ to lau idia dadaraia taudia be do lau matauraidia lasi.”
31 Itaia, nega ia mai noho bona lau ese oi bona emu sene tamana ena bese edia goada do lau haorea momokani, unai amo emu bese lalonai ia noho tauna ta be do ia noho lasi ela bona ia buruka.+
32 Bona Israela be ia noho namo lalonai, oi ese lau noho gabuna ai emu inai tauna do oi itaia,+ bona emu bese lalonai tau burukana do ia noho lasi.
33 Emu bese tauna ta do lau koua lasi egu boubou patana dekenai hesiai gaukara ia karaia totona, bona ia dainai do oi itaia namonamo lasi, bona ia ese emu lalona do ia hahisia bada, to emu bese taudia momo herea be tuari kaia amo do idia hamasea.+
34 Bona emu natudia rua, Hopini bona Pineha, dekenai do ia vara gauna be toa oi dekenai, gauna be inai: Idia ruaosi be dina tamona ai do idia mase.+
35 Bona lau ese lau sibona totona kamonai hahelaga tauna ta do lau abia hidi.+ Ia ese egu kudouna ena ura hegeregerena do ia kara, bona lau ese ia totona noho daudau rumana* do lau haginia, bona hanaihanai ia be egu horoa tauna ena vairanai do ia raka.
36 Emu bese lalonai ia do noho tauna ta be do ia mai bona unai hahelaga tauna dekenai do ia tui diho, bona gaukara totona do ia noinoi, unai amo moni sisina bona paraoa ia abia diba, bona do ia gwau: “Mani lau dekenai hahelaga gaukara ena dagi oi henia, unai amo aniani sisina lau ania diba.”’”+
