Samuela Ginigunana 26:1-25
26 Vadaeni Sipi taudia+ be Saulo dekenai idia lao, unai be Gibea ai,+ bona idia gwau: “Davida be Hakila ororona dekenai ia hunia noho, unai ororo be Iesimono ia vaira henia.”+
2 Vadaeni Saulo ia toreisi bona Israela ena tuari tatau goadadia 3,000 ia abia hidi bena Sipi tano kaukau dekenai idia diho lao, Davida idia tahua totona.+
3 Saulo be Hakila ororona dekenai ia kamepa, unai be dala badinai. To Davida be tano kaukau dekenai ia noho, bona ia kamonai Saulo be ia mai, ia ia tahua totona.
4 Bena Davida ese spai taudia ia siaia, unai amo do idia sekea bema Saulo be ia mai momokani.
5 Gabeai Davida be Saulo ia kamepa gabuna dekenai ia lao, bona Davida ese Saulo bona Abinere+ edia mahuta gabuna ia itaia, Abinere be Saulo ena tuari orea edia biaguna bona Nere ena natuna. Saulo be kamepa lalonai ia mahuta, bona ena tuari taudia be ia idia hagegea.
6 Bena Davida ese Hiti tauna Ahimeleka+ bona Seruia ena natuna+ Abisai,+ Ioaba ena tadikaka unai, ia nanadaidia: “Daika be lau ida Saulo ia kamepa gabuna dekenai do ia diho lao?” Abisai ia haere: “Lau be oi ida do lau diho lao.”
7 Vadaeni Davida bona Abisai be hanuaboi ai Saulo ena kamepa dekenai idia lao, bona idia itaia Saulo be kamepa lalonai ia mahuta bona ena io be tano dekenai ia gwadaia diho, ena kwarana badinai, bona Abinere bona tuari taudia ibounai be ia idia hagegea bona idia mahuta.
8 Vadaeni Abisai be Davida dekenai ia gwau: “Hari Dirava ese emu inai tauna be emu imana dekenai ia atoa.+ Mani nega tamona sibona tano dekenai ia lau kokoa, bona do lau karaia lou lasi.”
9 To, Davida be Abisai dekenai ia gwau: “Ia oi hadikaia lasi, badina Iehova ese ia horoa tauna do ia tuari henia tauna+ be dika do ia davaria.”+
10 Davida ma ia gwau: “Ia mauri noho Diravana, Iehova ena ladanai oi lau hamaoroa momokani, Iehova sibona ese ia do ia hamasea,+ eiava dina ta ia be do ia mase,+ taunimanima ibounai bamona, eiava tuari dekenai do ia lao bona do ia mase.+
11 Lau ese Iehova lau matauraia dainai, Iehova ena horoa tauna dekenai unai bamona kara do lau karaia diba lasi!+ To mani iena kwarana badinai ia noho io bona ranu hodu ita abia, bona ita lao.”
12 Bena Davida ese Saulo ena kwarana badinai idia noho io bona ranu hodu ia abidia, bona idia lao. Ta ese idia ia itaia lasi+ eiava ta ia noga lasi, badina idia ibounai idia mahuta, oibe, Iehova ese idia ia hamahutaia mase.
13 Vadaeni Davida be koura ena kahana ma ta dekenai ia hanaia lao bona ororo ena ataiai ia gini, Saulo ia noho gabuna amo padana be daudau.
14 Davida be Saulo ena tatau bona Nere ena natuna Abinere+ dekenai ia boiboi, ia gwau: “Abinere e, lau oi haere henia!” Abinere ia haere: “Daika ese king ena mahuta ia hadikaia noho?”
15 Davida be Abinere dekenai ia gwau: “Oi be tau goadana ta, ani? Badina Israela ai ta be oi hegeregerena lasi. Vadaeni dahaka dainai emu lohia bona king oi gimaia lasi? Badina tuari tauna ta be ia mai, emu lohia bona king ia hamasea totona.+
16 Oi be emu gaukara oi karaia namonamo lasi. Ia mauri noho Diravana, Iehova ena ladana ai oi lau hamaoroa momokani, oi idia hamasea be namo, badina oi ese emu lohia, Iehova ena horoa tauna, oi gimaia lasi.+ Oi itaia! King ena io bona ranu hodu,+ iena kwarana badinai idia noho gaudia be edeseni?”
17 Bena Saulo ese Davida ena gadona ia kamonai bona ia gwau: “Lauegu natuna Davida e, inai be oiemu gadona, a?”+ Davida ia haere: “Lauegu lohia bona king e, inai be egu gadona.”
18 Ma ia gwau: “Dahaka dainai egu lohia be ena hesiai tauna ia lulua noho,+ lau be dahaka lau karaia? Dahaka kerere lau karaia?+
19 Lauegu lohia bona king e, mani emu hesiai tauna ena hereva oi kamonai: Bema Iehova ese oi ia hamaoroa lau oi tuari henia totona, namona be ia ese egu aniani bouboudia ia abia dae. To bema taunimanima ese oi idia hamaoroa,+ vadaeni Iehova ena vairanai idia be dika do idia davaria, badina edia kara dainai lau mamia lau be maoro lasi Iehova ese ia henia tanona dekenai do lau noho.+ Idia ese lau idia lulua, idia gwau, ‘Oi lao, dirava ma haida oi hesiai henia!’
20 Bona namo lasi idau tano dekenai egu rara oi bubua, bena Iehova ena vairana amo do lau daudau. Badina lau be sei ta bamona Israela ena king ese lau ia tahua,+ toana be ororo ai ia noho uda manu ia lulua noho hegeregerena.”
21 Unai neganai Saulo ia gwau: “Lau kara dika vadaeni.+ Egu natuna Davida e, oi giroa mai, lau ese oi do lau hadikaia lasi, badina hari dina oi ese egu mauri be dava bada gauna bamona oi laloa.+ Oibe, lau be kavakava karana lau karaia bona lau kara dika bada.”
22 Davida ia haere: “King ena io be inai. Namona be tau matamata ta ia hanaia mai bona ia abia.
23 Iehova sibona ese ta ta ena kara maoromaoro bona ena abidadama hegeregerena davana do ia haloua,+ badina hari dina Iehova ese oi be egu imana dekenai ia atoa, to lau ura lasi Iehova ena horoa tauna lau tuari henia.+
24 Hari dina lau dekenai emu mauri be dava bada gauna ta hegeregerena, namona be Iehova ena vairanai egu mauri danu be dava bada gauna ta bamona, bona ia ese dika idauidau amo lau ia hamauria be namo.”+
25 Saulo be Davida ia haere henia: “Egu natuna Davida e, Dirava ese oi ia hanamoa be namo. Momokani oi ese kara badadia do oi karaia, bona do oi kwalimu.”+ Bena Davida ia lao, bona Saulo be ena gabu dekenai ia giroa lou.+
