Samuela Ginigunana 31:1-13
-
Saulo bona ena natudia toi idia mase (1-13)
31 Filistia taudia be Israela taudia idia tuari henia.+ Bona Israela tuari tatau be Filistia taudia amo idia heau, bona idia momo be Gileboa Ororo ai idia hamasea.+
2 Filistia taudia be Saulo bona ena natudia memero kahirakahira momokani idia heau lao, bona idia ese Saulo ena natudia memero,+ Ionatana,+ Abinadaba, bona Maliki-sua idia aladia mase.
3 Tuari ia bada momokani, bona peva gaukaralaia taudia ese Saulo idia pidia bona idia haberoa.+
4 Bena Saulo be ena kesi huaia tauna dekenai ia gwau: “Emu tuari kaia oi abia bona lau oi alaia, unai amo inai kopina utua lasi tatau+ ese dagedage dalanai lau do idia kara henia lasi.” To ena kesi huaia tauna ia ura lasi, badina ia gari bada. Vadaeni Saulo ese tuari kaia ia abia bona ena latanai ia moru.+
5 Iena kesi huaia tauna ia itaia Saulo be ia mase neganai,+ ia danu be ena tuari kaia latanai ia moru bona Saulo ida ia mase.
6 Saulo, ena natudia toi, ena kesi huaia tauna, bona ena hesiai taudia ibounai be unai dina ai idia mase.+
7 Koura kahanai bona Ioridane ai idia noho Israela taudia idia kamonai, Israela tuari tatau idia heau bona Saulo bona ena natudia idia mase neganai, idia ese siti idia rakatanidia matamaia bona idia heau,+ bena Filistia taudia idia mai bona unai siti idia abidia.
8 Murina dinana ai, Filistia taudia be mase taudia edia kohu henaoa totona idia lao neganai, idia itaia Gileboa Ororo ai Saulo bona ena natudia toi idia mase vadaeni.+
9 Vadaeni Saulo ena kwarana idia utua bona ena tuari kohu idia abia bona Filistia taudia be edia tano ibounai dekenai hereva idia siaia,+ unai amo unai sivarai be edia kaivakuku edia dubu+ bona taunimanima huanai idia gwauraia.
10 Bena ena tuari kohu be Asatorete kaivakuku ena dubu dekenai idia atoa bona ena mase tauanina be Bete-sana ena magu dekenai idia kokoa.+
11 Iabese-gileada taudia+ idia kamonai, Filistia taudia be Saulo dekenai unai idia karaia neganai,
12 edia tuari taudia goadadia ibounai idia toreisi bona hanuaboi idia raka lao bona Bete-sana ena magu amo Saulo bona ena natudia edia mase tauanina idia kokidia. Bena Iabese dekenai idia giroa lou bona unuseniai idia gabudia.
13 Bena edia turia idia abia+ bona Iabese ai ia noho tamarisiki au* ena henunai idia guria,+ bona dina 7 lalonai idia aniani lasi.*
Futnout
^ Lagani ibounai inai au ena raurau be ia kakoro lasi, ena raurau be maragimaragi, bona ena flaoaflaoa be pinki eiava waiti.
