Samuela Ginigunana 4:1-22
4 Vadaeni Samuela be Israela taudia ibounai ia hereva henia.
Bena Israela taudia be Filistia taudia tuari henidia totona idia lao. Idia be Ebenesera kahirakahira idia kamepa, bona Filistia taudia be Apeka dekenai idia kamepa.
2 Filistia taudia be tuari oreana ta bamona idia lao bona Israela taudia idia tuari henia, to Israela taudia be idia lusi noho matamaia bona Filistia taudia ese idia hadareredia. Bona idia ese tuari dekenai Israela tatau 4,000 idia hamasea.
3 Bona Israela ena tuari taudia be kamepa dekenai idia giroa lou neganai, Israela ena tau badadia idia gwau: “Dahaka dainai hari dina Iehova ese Filistia taudia ia koua lasi bona ita idia halusia?+ Namona be Silo amo Iehova ena Taravatu Maua ita abia,+ unai amo maua be ita ida do ia noho bona eda inai taudia edia imana amo ita do ia hamauria.”
4 Vadaeni taunimanima ese Silo dekenai tatau haida idia siaia lao, bona unuseni amo tuari oreadia edia Iehova,* kerubi rua+ edia ataiai* ia helai Tauna unai, ena Taravatu Maua idia huaia lao. Bona Eli ena natudia rua, Hopini bona Pineha+ danu be Dirava momokani ena Taravatu Maua ida idia lao.
5 Iehova ena Taravatu Maua be kamepa lalonai idia abia vareai neganai, Israela taudia ibounai idia boiboi badabada, bena tano ia mareremarere.
6 Filistia taudia ese unai boiboi regena idia kamonai neganai, idia gwau: “Dahaka dainai Heberu taudia edia kamepa lalonai boiboi regena be bada herea?” Gabeai idia kamonai Iehova ena Maua be kamepa lalonai idia abia vareai.
7 Vadaeni Filistia taudia idia gari, badina idia gwau: “Dirava be kamepa lalonai ia vareai!”+ Bena idia gwau: “Ita madi o, badina guna inai bamona kara ta ia vara lasi!
8 Ita madi o! Daika ese inai siahu bada Diravana ena imana amo ita ia hamauria diba? Inai Dirava ese taunimanima lasi gabuna ai Aigupito taudia be hisihisi idauidau amo ia hahisia.+
9 Umui Filistia taudia e, umui boga-auka, tatau korikoridia bamona, unai amo Heberu taudia do umui hesiai henidia lasi, idia ese umui idia hesiai henia bamona.+ Tatau korikoridia bamona do umui heai!”
10 Vadaeni Filistia taudia ese Israela taudia idia tuari henia bona idia halusidia,+ bona idia ta ta be edia palai ruma dekenai idia heau lao. Taunimanima momo herea idia mase, bona Israela ena kahanai, idia raka tuari tatau 30,000 idia mase.
11 Danu, idia ese Dirava ena Maua idia abia, bona Eli ena natudia rua, Hopini bona Pineha, idia mase.+
12 Unai dina ai Beniamina iduhu tauna ta be tuari gabuna amo ia heau lao bona Silo dekenai ia ginidae, iena dabua idia hedare bona ena kwarana dekenai kahu ia noho.+
13 Unai tau ia ginidae neganai, Eli be dala badinai ia noho helai gauna latanai ia helai bona ia itaia noho, badina ia be Dirava momokanina ena Maua dainai ia lalohekwarahi.+ Unai tau be siti lalonai ia vareai bona sivarai ia gwauraia, bona siti taudia ibounai idia taitai bada matamaia.
14 Eli ese taitai regena ia kamonai neganai, ia henanadai: “Dahaka dainai inai regerege bada ia vara?” Unai tauna be ia lao haraga bona Eli dekenai unai sivarai ia gwauraia.
15 (Eli ena mauri lagani be 98, bona ia ese gau ta ia itaia diba lasi.)+
16 Bena unai tauna be Eli dekenai ia gwau: “Lau be tuari gabuna amo lau mai tauna! Hari dina sibona tuari gabuna amo lau heau.” Unai neganai Eli ia henanadai: “Natugu e, dahaka ia vara?”
17 Vadaeni sivarai ia mailaia tauna ia gwau: “Israela taudia be Filistia taudia amo idia heau, badina idia kwalimu lasi,+ bona idia momo herea idia mase vadaeni. Danu oiemu natudia rua, Hopini bona Pineha idia mase,+ bona Filistia taudia ese Dirava momokanina ena Maua idia abia.”+
18 Ia ese Dirava momokanina ena Maua ia herevalaia neganai, Eli be ena helai gauna amo ena doruna dekenai ia moru, geiti ena badina dekenai, bona ena aiona ia makohia bena ia mase, badina ia buruka bona ia metau. Ia be lagani 40 lalonai Israela ai hahemaoro gaukarana ia karaia.
19 Iena ravana, Pineha ena adavana unai, be ia rogorogo bona ena mara negana be kahirakahira. Ia kamonai, Filistia taudia ese Dirava momokanina ena Maua idia abia bona ena ravana tauna bona ena adavana idia mase neganai, karaharaga mara ena hisihisi ia abia matamaia bona natuna ia havaraia.
20 To ia mara bena ia mase gwauraia neganai, ia badinai idia gini hahine ese idia hamaoroa: “Oi gari lasi, badina oi be natuna mero ta oi havaraia.” Ia haere lasi eiava idia dekenai hereva ta ia gwauraia lasi.
21 To ia ese mero ena ladana ia hatoa, Ikaboda.*+ Ia gwau: “Idia ese Israela ena hairai be idau tano dekenai idia abia lao vadaeni.”+ Ia ese Dirava momokanina ena Maua idia abia karana bona ena ravana bona ena adavana dekenai ia vara gauna ia herevalaia.+
22 Ia gwau: “Idia ese Israela ena hairai be idau tano dekenai idia abia lao vadaeni, badina Dirava momokanina ena Maua idia abia.”+
