Samuela Ginigunana 5:1-12
5 Filistia taudia ese Dirava momokanina ena Maua idia abia neganai,+ idia ese unai maua be Ebenesera amo Asadoda dekenai idia abia lao.
2 Filistia taudia ese Dirava momokanina ena Maua idia abia bona Dagona diravana ena dubu* lalonai idia abia vareai bona Dagona kahirakahira idia atoa.+
3 Murina dinana ai Asadoda taudia be daba momokani idia toreisi neganai, Dagona ena kaivakuku be tano dekenai ia moru, bona ena vairana be tano dekenai, Iehova ena Maua vairanai.+ Vadaeni Dagona idia abia bona ena gabu dekenai idia atoa lou.+
4 Murina dinana ai daba momokani idia toreisi neganai, idia itaia Dagona be tano dekenai ia moru lou, bona ena vairana be tano dekenai, Iehova ena Maua vairanai. Bona Dagona ena kwarana bona ena imana rua be idia utudia oho, bona dubu ena iduara ena vareai gabunai idia noho. To ena tauanina* sibona be idia hadikaia lasi.
5 Unai dainai ema bona hari Asadoda ai, Dagona diravana ena hahelaga taudia bona Dagona ena dubu lalonai idia vareai taudia ibounai be Dagona ena iduara ena vareai gabuna idia moia lasi.
6 Iehova ese Asadoda taudia ia panisidia, bona Asadoda bona ena gabu ibounai dekenai idia noho taudia be iohururu* amo ia hahisidia.+
7 Asadoda taudia be ia vara gauna idia itaia neganai, idia gwau: “Namo lasi Israela ena Dirava ena Maua be ita ida ia noho, badina ia ese ita bona iseda dirava Dagona ia panisia.”
8 Vadaeni hereva idia siaia bona Filistia taudia edia lohia taudia ibounai idia haboua, bena idia nanadaidia: “Israela ena Dirava ena Maua dekenai dahaka do ita karaia?” Idia haere, idia gwau: “Namona be Israela ena Dirava ena Maua be Gata dekenai ita abia lao.”+ Vadaeni Israela ena Dirava ena Maua be unuseni idia abia lao.
9 Unuseni idia abia lao murinai, Iehova ese unai siti taudia ia panisidia, bona unai ese gari bada ia havaraia. Ia ese unai siti taudia, maragidia amo ela bona badadia ia panisidia, bona idia dekenai iohururu idia vara.+
10 Vadaeni Dirava momokanina ena Maua be Ekarona+ dekenai idia siaia lao, to Dirava momokanina ena Maua be Ekarona dekenai ia ginidae neganai, Ekarona taudia idia taitai matamaia, idia gwau: “Idia ese Israela ena Dirava ena Maua be ita dekenai idia mailaia, ita bona iseda taunimanima idia hamasea totona!”+
11 Bena hereva idia siaia bona Filistia taudia edia lohia taudia ibounai idia haboua bona idia gwau: “Israela ena Dirava ena Maua umui siaia lao. Namona be ena gabu korikorina dekenai ia giroa lou, unai amo ita bona iseda taunimanima do ita mase lasi.” Badina siti taudia ibounai be mase garina idia gari. Bona Dirava momokanina ese ia panisia,+
12 bona idia mase lasi taudia latanai iohururu idia vara. Vadaeni unai siti taudia be guba idia itaia bona heduru totona idia taitai.
