Sivarai Ginigunana 12:1-40
-
Davida ena king dagi durua taudia (1-40)
12 Davida be Kisa ena natuna mero Saulo dainai Sikilaga dekenai ia hunia neganai, inai tatau be ia dekenai idia mai.+ Idia be tatau goadadia, bona tuari lalonai Davida idia durua.+
2 Idia be mai edia peva, bona edia imana laurina bona idibana idia gaukaralaia diba+ varo amo nadi idia negea+ eiava peva amo diba idia pidia totona. Idia be Saulo ena tadikaka,* Beniamina amo.+
3 Ahiesere be gunalaia tauna, bona Ioasa, idia ruaosi be Gibea tauna Semaha ena natudia memero,+ Iesiele bona Pelete, idia be Asamavete ena natudia memero,+ Beraka, Anatoto tauna Iehu,
4 Gibeona tauna Isimaia,+ ia be gunalaia taudia 30 huanai tuari tauna goadana,+ bona idia ia naria. Danu Ieremia, Iahasiele, Iohanana, Gedera tauna Iosabada,
5 Elusai, Ierimoto, Bealaia, Semaraia, Haripa tauna Sepataia,
6 Elikana, Isihaia, Asarelo, Ioesere, bona Iasobeama, idia be Kora taudia.+
7 Bona Gedoro tauna Ierohama ena natudia memero Ioelaha bona Sebadaia.
8 Gado taudia haida be edia tadikaka amo idia siri bona Davida ena kahana dekenai idia lao, ia be tano kaukau ai hunia gabuna ta ai ia noho.+ Unai iduhu taudia be tuari taudia goadadia, tuari totona idia hegeregere, mai edia kesi badana bona io ida idia gini hegaegae, edia toana be laiona bamona* bona ororo ena dia bamona idia heau haraga.
9 Esere be idia ia gunalaia, iharuana be Obadaia, ihatoina be Eliaba,
10 namba 4 be Misimana, namba 5 be Ieremia,
11 namba 6 be Atai, namba 7 be Eliele,
12 namba 8 be Iohanana, namba 9 be Elisabada,
13 namba 10 be Ieremia, namba 11 be Makabanai.
14 Idia be Gado iduhu taudia,+ tuari orea idia gunalaia taudia. Goada momokani lasi tauna ese tuari taudia 100 ia halusidia diba, bona goada momokani tauna ese tuari taudia 1,000 ia halusidia diba.+
15 Inai tatau be hua ginigunana ai Ioridane sinavai idia hanaia, unai nega ai sinavai be ia abata, bona idia ese tano palakana ai idia noho taudia ibounai be ist bona west kahana dekenai idia luludia lao.
16 Beniamina bona Iuda tatau haida danu be Davida ia hunia gabuna dekenai idia mai.+
17 Vadaeni Davida be idia dekenai ia lao bona ia gwau: “Bema umui be mai maino ida umui mai lau umui durua totona, vadaeni umui be egu turadia. To bema lau umui koia bona egu inai taudia dekenai lau umui henia totona umui mai, lau be kerere ta lau karaia lasi, namona be iseda sene taudia edia Dirava ese unai ia itaia bona umui do ia hahemaoro henia.”+
18 Vadaeni Dirava ena lauma be tuari taudia 30 ia gunalaia tauna Amasai latanai ia diho,+ bona Amasai ia gwau:
“Iese ena natuna Davida e, ai be oiemu taunimanima.+
Maino oi abia, bona oi ia durua Diravana dekenai maino ia noho,Badina emu Dirava ese oi ia durua noho.”+
Unai dainai Davida be idia ia abia dae bona tuari orea taudia edia gunalaia taudia ai ia halaodia.
19 Davida be Filistia taudia ida Saulo tuari henia totona ia mai neganai, Manase ena tatau haida be Saulo ena tuari orea idia rakatania bona Davida ena kahana dekenai idia lao. To ia ese Filistia taudia ia durua lasi, badina idia herevahereva murinai, Filistia taudia edia lohia taudia ese ia idia siaia lao,+ idia gwau: “Ia be ita do ia rakatania bona ena lohia tauna Saulo dekenai do ia lao, bona dika do ita davaria diba.”+
20 Davida be Sikilaga dekenai ia lao neganai,+ ia dekenai idia mai Manase tatau edia ladadia be inai: Adinae, Iosabada, Iediaele, Mikaela, Iosabada, Elihu, bona Sileta, idia be Manase taudia tausen momo edia kwarana taudia.+
21 Idia be Davida idia durua bona dadidadi oreana idia tuari henia, badina idia ibounai be goada bada bona gari lasi taudia,+ bona tuari taudia edia gunalaia taudia ai idia lao.
22 Dina ta ta ai taunimanima be Davida dekenai idia mai noho+ ia idia durua totona, ela bona tuari oreana ia bada herea, Dirava ena tuari oreana bamona.+
23 Davida be Heberona ai ia noho neganai, tatau mai edia tuari kohudia be ia dekenai idia mai,+ unai amo Davida ese Saulo ena king dagi do ia abia, Iehova ena oda hegeregerena.+ Inai be idia haboua taudia ibounai edia namba.
24 Kesi badana bona io idia huaia Iuda tatau ibounai be 6,800, idia be tuari totona idia hegaegae.
25 Simeona iduhuna amo, goada bona gari lasi tuari taudia ibounai be 7,100.
26 Levi iduhuna amo be 4,600.
27 Iehoiada+ be Arona ena natudia memero edia gunalaia tauna,+ bona ia ida be tatau 3,700,
28 bona goada bona gari lasi tau matamata, Sadoka,+ bona iena bese kwarana taudia amo gunalaia tatau 22 danu be idia ida idia lao.
29 Saulo ena tadikakadia,+ Beniamina iduhu amo tatau ibounai 3,000 idia lao, idia momo be guna Saulo bona ena ruma bese idia badinaia.
30 Eparaima iduhuna amo, goada bona gari lasi tatau ibounai be 20,800, idia be edia bese kwaradia huanai ladana bada taudia.
31 Manase iduhu kahana amo, tatau ibounai 18,000 idia abidia hidi Davida be king ai idia halaoa totona.
32 Isakara iduhuna amo be iduhu kwarana taudia ibounai 200, nega ena toa bona Israela taudia idia karaia diba gauna idia diba taudia unai, bona edia tadikakadia be edia oda henunai idia gaukara.
33 Sebuluno iduhuna amo, tatau ibounai be 50,000, idia be tuari lalonai idia vareai, bona tuari totona edia tuari kohu ibounai idia abia hegaegae, bona mai lalotamona ida Davida idia badinaia.*
34 Napatali iduhuna amo, gunalaia taudia ibounai be 1,000, bona idia ida be tatau 37,000, idia ese kesi badana bona io idia huaia.
35 Dano iduhuna amo, tuari totona idia hegaegae taudia ibounai be 28,600.
36 Bona Asere iduhuna amo, tuari totona idia hegaegae taudia ibounai be 40,000.
37 Ioridane ena kahana ai+ idia noho Rubena iduhuna, Gado iduhuna, bona Manase iduhu kahana taudia amo tuari taudia ibounai be 120,000, idia be mai edia tuari kohu idauidau.
38 Unai tatau ibounai be tuari taudia, idia be tuari totona idia gini hegaegae. Idia lalotamona bona Heberona dekenai idia mai, Davida be king ai idia halaoa totona, bona danu Israela taudia oredia ibounai idia lalotamona Davida be king ai idia halaoa totona.+
39 Bona idia be unuseniai Davida ida dina toi idia noho, idia aniani bona idia inuinu, badina edia tadikakadia ese idia totona unai gaudia idia hegaegaelaia.
40 Danu gabu kahirakahira idia noho taudia, bona gabu daudaudia, hegeregere Isakara, Sebuluno, bona Napatali ai idia noho taudia ese doniki, kamelo, bona boromakau amo aniani idia mailaia. Idia mailaia aniani be paraoa, fig kaukau keke bona greips huahua keke, wain, oela, bona boromakau bona mamoe momo herea, badina Israela ai moale bada ia vara noho.
Futnout
^ Unai be, iduhu tamona taudia.
^ Reana tuari ai edia gari lasi karana eiava edia vairana ena toana ia herevalaia.
^ Eiava “Davida idia badinaia taudia ibounai be idia daradara lasi.”
