Sivarai Ginigunana 15:1-29
15 Bona Davida Ena Siti ai Davida be ena ruma ia haginidia noho, bona Dirava momokanina ena Maua totona gabu ta ia hegaegaelaia bona Maua ena palai rumana ta ia haginia.+
2 Unai nega ai Davida ia gwau: “Ta ese Dirava momokanina ena Maua do ia huaia lasi, to Levi taudia sibona ese do idia huaia, badina Iehova ese idia ia abia hidi Iehova ena Maua idia huaia bona nega ibounai Ia idia hesiai henia totona.”+
3 Bena Ierusalema ai Davida ese Israela taudia ibounai ia haboua Iehova ena Maua be ia hegaegaelaia gabuna dekenai idia abia mai totona.+
4 Davida ese Arona ena bese taudia+ bona Levi taudia ia haboua.+
5 Kohata besena amo ia ese bese gunalaia tauna Uriele bona ena bese taudia ma haida 120 ia abia.
6 Merari besena amo ia ese bese gunalaia tauna Asaia+ bona ena bese taudia ma haida 220 ia abia.
7 Geresome besena amo ia ese bese gunalaia tauna Ioela+ bona ena bese taudia ma haida 130 ia abia.
8 Elisapana besena+ amo ia ese bese gunalaia tauna Semaia bona ena bese taudia ma haida 200 ia abia.
9 Heberona besena amo ia ese gunalaia tauna Eliele bona ena bese taudia ma haida 80 ia abia.
10 Usiele besena amo+ ia ese gunalaia tauna Aminadaba bona ena bese taudia ma haida 112 ia abia.
11 Ma danu, Davida ese hahelaga taudia Sadoka+ bona Abiatara+ bona Levi taudia Uriele, Asaia, Ioela, Semaia, Eliele, bona Aminadaba ia boiria,
12 bona idia dekenai ia gwau: “Umui be Levi ena bese kwarana taudia. Umui bona emui tadikakadia umui helaga, bona Israela ena Dirava Iehova ena Maua be lau hegaegaelaia gabuna dekenai umui abia mai.
13 Guna umui ese unai Maua umui huaia lasi dainai,+ Iehova iseda Dirava ena badu be ita latanai ia diho,+ badina ita ese iena dala maorona ita badinaia lasi.”+
14 Vadaeni hahelaga taudia bona Levi taudia be sibona idia hahelagaia, unai amo Israela ena Dirava Iehova ena Maua idia abia mai diba.
15 Vadaeni Levi taudia ese Dirava momokanina ena Maua ena huaia auri be edia pagana ai idia atoa bona Maua idia huaia,+ Iehova ese Mose amo ia henia oda hegeregerena.
16 Bena Davida ese Levi ena gunalaia taudia ia hamaoroa edia tadikakadia, ane idia abia taudia unai, do idia abia hidi, unai amo mai moale ida ane idia abia bona miusiki gaudia, hegeregere miusiki gaudia mai edia varo, hap,*+ bona simbol* do idia gadaralaia.+
17 Vadaeni Levi taudia ese Ioela ena natuna mero Hemana,+ bona ena tadikakadia amo Asapa,+ Berekaia ena natuna mero, bona Merari taudia amo Etana,+ Kusaia ena natuna mero, idia abia hidi.
18 Idia ida be edia tadikakadia, orea iharuana amo:+ Sekaraia, Beni, Iasiele, Semiramoto, Ieiele, Uni, Eliaba, Benaia, Maseaia, Matitaia, Elipelehu, bona Mikineia bona geiti naria taudia Obeda-edoma bona Ieile.
19 Ane abia taudia Hemana,+ Asapa+ bona Etana ese kopa amo idia karaia simbol do idia gadaralaia.+
20 Bona Sekaraia, Asiele, Semiramoto, Ieiele, Uni, Eliaba, Maseaia, bona Benaia ese miusiki gaudia mai edia varo be Alamota* tiuni ai idia gadaralaia.+
21 Bona Matitaia,+ Elipelehu, Mikineia, Obeda-edoma, Ieile, bona Asasaia ese hap be Seminiti* tiuni ai idia gadaralaia,+ unai amo miusiki gadaralaia taudia idia gunalaia.
22 Levi taudia edia gunalaia tauna Kenanaia+ be maua huaia gaukara ia naria, badina ia be unai gaukara ia diba momo,
23 bona Berekaia bona Elikana be Maua ena geiti naria taudia.
24 Hahelaga taudia Sebanaia, Iosapata, Netanele, Amasai, Sekaraia, Benaia, bona Eliesere be Dirava momokanina ena Maua vairanai kibi idia hiriria badabada,+ bona Obeda-edoma bona Iehaia be Maua totona geiti idia naria danu.
25 Bena Davida bona Israela ena tau badadia bona tuari taudia 1,000 ta ta edia gunalaia taudia be mai moale ida idia lao Obeda-edoma ena ruma amo Iehova ena Taravatu Maua idia mailaia totona.+
26 Dirava momokanina ese Levi taudia, Iehova ena Taravatu Maua idia huaia taudia unai, ia durua dainai, idia ese boromakau 7 bona mamoe tau 7 idia bouboulaia.+
27 Davida bona Maua idia huaia Levi taudia ibounai, ane abia taudia, bona maua huaia taudia bona ane abia taudia ia gunalaia tauna Kenanaia be imana lasi dabua namo hereana idia karaia. Davida ese epodi* dabua ia atoa danu.+
28 Israela bese ibounai be Iehova ena Taravatu Maua idia abia daekau,+ mai moale ida idia boiboi, kibi idauidau idia hiriria,+ simbol, miusiki gaudia mai edia varo bona hap idia gadaralaia.+
29 To Iehova ena Taravatu Maua be Davida Ena Siti ai idia abia vareai neganai,+ Saulo ena natuna Mikala+ be ruma ena windo amo ia itaia King Davida be ia roho isi bona ia mavaru noho. Bona ena kudouna ai Davida ia lalodika henia matamaia.+
Futnout
^ Miusiki gauna ta mai ena varo, gita bamona, to ena toana be idau.
^ Heberu herevana be auri amo idia karaia miusiki gauna ia herevalaia. Ia be sekol, rua oi pataia hebou neganai, ia rege.
