Sivarai Ginigunana 16:1-43
16 Vadaeni idia ese Dirava momokanina ena Maua be Davida ese ia haginia palai rumana lalonai idia abia vareai, bona ena gabu ai idia atoa.+ Bena idia ese Dirava momokanina ena vairanai gabua bouboudia bona maino karaia bouboudia idia henia.+
2 Davida ese gabua bouboudia bona maino karaia bouboudia ia henia ore murinai,+ ia ese Iehova ena ladana ai taunimanima ia hanamoa.
3 Danu, ia ese Israela taudia ibounai, tatau bona hahine ta ta dekenai paraoa kuboru, pama huahua keke, bona greips kaukau keke ia henidia.
4 Bena ia ese Levi taudia haida ia abia hidi Iehova ena Maua vairanai hesiai gaukara idia karaia,+ bona Israela ena Dirava Iehova idia matauraia,* tanikiu henia, bona hanamoa totona.
5 Asapa+ be ane abia taudia edia gunalaia tauna, bona Sekaraia be ena durua tauna. Bona Ieile, Semiramoto, Ieiele, Matitaia, Eliaba, Benaia, Obeda-edoma, bona Ieile+ ese miusiki gaudia mai edia varo bona hap* idia gadaralaia.+ Bona Asapa ese simbol* ia gadaralaia,+
6 bona hahelaga taudia Benaia bona Iahasiele be nega ibounai Dirava momokanina ena Taravatu Maua vairanai kibi idia hiriria.
7 Unai dina ai Davida ese Iehova tanikiu henia anena ta ia torea bona Asapa bona ena tadikakadia ia oda henia unai ane idia abia totona,+ ia gwau:
8 “Iehova umui tanikiu henia,+ ena ladana dekenai umui boiboi,Taunimanima dekenai iena kara namodia umui herevalaia!+
9 Ia dekenai ane umui abia, ia dekenai hanamoa anedia umui abia,*+Iena kara namodia ibounai umui laloa dobu.*+
10 Iena ladana helagana umui heagilaia.+
Iehova idia tahua taudia edia kudouna ia moale be namo.+
11 Iehova umui tahua+ bona ia amo ena goada umui noia.
Iena lalonamo totona umui noinoi.+
12 Ia karaia kara namodia umui laloatao,+Iena hoa karadia bona ia gwauraia hahemaoro herevadia umui laloatao,
13 Umui, iena hesiai tauna Israela ena bese taudia,+Umui, Iakobo ena natudia memero, iena abia hidi taudia.+
14 Ia be Iehova iseda Dirava.+
Iena taravatu be tanobada ibounai dekenai ia noho.+
15 Iena gwauhamata umui laloatao hanaihanai,Uru tausen momo dekenai ia karaia gwauhamata* unai,+
16 Ia ese Aberahamo ida gwaubou ta ia karaia,+Bona Isako dekenai ena gwauhamata herevana ia gwauraia,+
17 Iakobo dekenai unai be taravatu ai ia halaoa,+Bona Israela dekenai unai be ia noho hanaihanai gwaubou,
18 Ia gwau, ‘Lau ese oi dekenai Kanana tano do lau henia+Unai be emui ahuna.’+
19 Unai nega ai umui be momo lasi,Oibe, umui be momo lasi, bona idau taudia bamona unai tano ai umui noho.+
20 Idia be bese ta amo bese ta dekenai idia lao,Basileia ta amo basileia ta dekenai idia lao.+
21 Ia ese tau ta dekenai maoro ia henia lasi idia ia hahisia totona,+To idia dainai king taudia ia hereva auka henia,+
22 Ia gwau, ‘Egu abia hidi taudia umui dogoatao lasi,Bona egu peroveta taudia dekenai dika gauna ta umui karaia lasi.’+
23 Tanobada taudia ibounai e, Iehova dekenai ane umui abia!
Dina ta ta ai iena hamauria daladia umui gwauraia!+
24 Bese idauidau huanai iena hairai umui herevalaia,Taunimanima ibounai huanai iena kara namo hereadia umui herevalaia.
25 Badina Iehova ena siahu be bada herea bona hanamoa ia abia be namo.
Ia sibona ita gari henia be namo, badina dirava idauidau ibounai ia hereaia.+
26 Taunimanima edia dirava ibounai be anina lasi diravadia,+To Iehova sibona ese guba ia karaia.+
27 Siahu bada bona hairai be Ia idia hagegea,+Goada bona moale be iena noho gabuna amo idia diaridiari.+
28 Tanobada besedia e, Iehova umui hanamoa,Iehova ena hairai bona goada dainai ia umui hanamoa.+
29 Iehova ena ladana dainai ia umui hanamoa.+
Harihari gauna ta umui abia bona ena vairanai umui mai.+
Iehova dekenai umui tui diho* mai emui dabua helagadia ida.*+
30 Tanobada taudia ibounai e, ia vairanai umui heudeheude mai gari ida!
Tanobada be ia gini goada noho. Do ia marere diba lasi.+
31 Guba ia moale, bona tanobada ia moale bada.+
Bese idauidau huanai umui gwau: ‘Iehova be King ai ia lao vadaeni!’+
32 Davara bona davara lalonai idia noho gaudia ibounai do idia boiboi.
Tano bona tano latanai idia noho gaudia ibounai do idia moale.
33 Unai nega ai uda badadia lalonai idia noho au be mai moale ida Iehova vairanai idia boiboi,Badina Dirava ia mai noho* tanobada hahemaoro henia totona.
34 Iehova tanikiu henia, badina ia be namo.+
Iena lalokau* be ia noho hanaihanai.+
35 Bona umui gwau: ‘Ai oi hamauria Diravana e, ai oi durua,+Ai oi haboua bona bese idauidau amo ai oi hamauria,Unai amo emu ladana helagana dainai oi do ai tanikiu henia+Bona mai moale bada ida oi do ai hanamoa.+
36 Iehova, Israela ena Dirava hanamoaEla bona hanaihanai.’”
Bona taunimanima ibounai idia gwau, “Amen!”* Bona idia ese Iehova idia hanamoa.
37 Vadaeni Davida ese Asapa bona Levi taudia ma haida be unuseniai ia rakatania,+ Iehova ena Taravatu Maua ena vairanai edia hesiai gaukara idia karaia noho totona,+ dina ta ta ai idia karaia hegeregerena.+
38 Obeda-edoma bona Levi taudia ma haida, idia ibounai be 68, bona Iedutunu ena natuna mero Obeda-edoma, bona Hosa be geiti naria taudia.
39 Bona hahelaga tauna Sadoka+ bona hahelaga taudia ma haida be Gibeona ena ataiai gabuna* dekenai Iehova ena dubu ai hesiai gaukara idia karaia,+
40 unai amo nega ibounai boubou patana latanai Iehova dekenai gabua bouboudia idia henia, unai be daba ai bona adorahi ai idia karaia, bona Taravatu bukana lalonai idia torea gaudia ibounai do idia karaia, Iehova ese Israela taudia ia oda henia hegeregerena.+
41 Idia ida be Hemana bona Iedutunu+ bona idia abia hidi tatau oredia idia noho Iehova idia tanikiu henia totona,+ badina “Iena lalokau* be ia noho hanaihanai.”+
42 Bona Hemana bona Iedutunu be idia ida idia noho,+ kibi idia hiriria, simbol bona miusiki gaudia idauidau idia gadaralaia Dirava momokanina hanamoa totona. Bona Iedutunu ena natudia memero+ be geiti idia naria.
43 Bena taunimanima ibounai be edia noho gabudia ta ta dekenai idia lao, bona Davida be ena ruma bese hanamoa totona ia lao.
Futnout
^ Heb., “laloatao.”
^ Miusiki gauna ta mai ena varo, gita bamona, to ena toana be idau.
^ Heberu herevana be auri amo idia karaia miusiki gauna ia herevalaia. Ia be sekol, rua oi pataia hebou neganai, ia rege.
^ Eiava “miusiki umui karaia.”
^ Eiava reana, “herevalaia.”
^ Heb., “ia henia oda herevana.”
^ Eiava reana, “badina iena helaga be hairai herea.”
^ Eiava “tomadiho henia.”
^ Eiava “ia mai vadaeni.”
^ Eiava “Oibe!”
