Sivarai Ginigunana 19:1-19
19 Gabeai Amono taudia edia king Nahasa ia mase, bona ena gabu ai iena natuna be king ai ia lao.+
2 Vadaeni Davida ia gwau: “Lau ese Nahasa ena natuna Hanunu dekenai lalokau* do lau hahedinaraia,+ badina iena tamana ese lau dekenai lalokau ia hahedinaraia.” Bena Davida ese gwaukau taudia ia siaia Hanunu idia hagoadaia totona, badina iena tamana ia mase. To Davida ena hesiai taudia be Hanunu hagoadaia totona Amono taudia edia tano dekenai idia ginidae neganai,+
3 Amono taudia edia lohia taudia be Hanunu dekenai idia gwau: “Oi laloa Davida ese emu tamana ia matauraia dainai, oi idia hagoadaia taudia ia siaia, a? Davida ena hesiai taudia be oi dekenai idia mai, siti do idia sekea namonamo, idia spai, bona idia abia totona, ani?”
4 Vadaeni Hanunu ese Davida ena hesiai taudia ia dogoatao bona edia besoso ia kokia,+ bona edia kununa kahana ena dabua be kahana rua dekenai ia utua, bena ia siaidia lao.
5 Davida dekenai unai idia gwauraia neganai, ia ese maoromaoro tatau haida ia siaia iena hesiai taudia idia hedavari henia totona, badina unai tatau idia hemarai bada. Bona King Davida ese idia ia hamaoroa: “Ieriko dekenai do umui noho+ ela bona emui besoso idia tubu lou, bena do umui giroa mai.”
6 Gabeai Amono taudia idia itaia Davida ese idia ia inai henia, vadaeni King Hanunu bona Amono taudia ese 1,000 siliva talent* amo Mesopotamia,* Arama-maka, bona Soba edia kariota bona hosi guia taudia idia hoia.+
7 Unai dainai idia ese kariota 32,000, bona Maka ena king bona ena taunimanima idia hoia. Bena idia mai bona Medeba ai idia kamepa.+ Amono taudia be edia siti ai idia haboua bona tuari totona idia mai.
8 Davida be unai ia kamonai neganai, ia ese Ioaba+ bona ena tuari orea ibounai ia siaidia lao, ena tuari taudia goadadia danu.+
9 Bona Amono taudia be idia lao bona siti ena geiti ena vareai gabuna ai tuari totona idia gini hegaegae, to tuari totona idia mai king taudia be sibodia tano palakana ai idia gini.
10 Ioaba ia itaia, unai tuari taudia be ia tuari henia totona ena vairana bona murina kahana amo idia mai neganai, ia ese Israela ai tuari diba momo tatau haida ia abia hidi, bona idia ia hegaegaelaia Suria taudia idia tuari henia totona.+
11 Bona ia ese tatau oredia be ena tadikaka Abisai ena hakaua henunai ia atoa,+ bona ia ese idia ia hegaegaelaia Amono taudia idia tuari henia totona.
12 Bena ia gwau: “Bema Suria taudia+ be idia goada herea, namona be oi mai bona lau oi durua, to bema Amono taudia be idia goada herea, do lau mai bona oi lau durua.
13 Namona be eda taunimanima bona eda Dirava ena siti ibounai totona do ita goada bona ita gari lasi,+ bona Iehova ese ena kahana do ia karaia.”
14 Vadaeni Ioaba bona ena tatau idia lao Suria taudia idia tuari henia totona, bona idia be Ioaba ena vairana amo idia heau boio.+
15 Amono taudia idia itaia Suria taudia be idia heau boio neganai, idia danu be ena tadikaka Abisai amo idia heau bona siti lalonai idia vareai. Unai murinai Ioaba be Ierusalema dekenai ia giroa lou.
16 Suria taudia idia itaia Israela taudia ese idia halusidia neganai, idia ese Sinavai* kahirakahira idia noho Suria taudia dekenai gwaukau taudia idia siaia,+ Hadadesa ena tuari biaguna Sopaka ese idia ia gunalaia.+
17 Haida ese Davida dekenai unai idia gwauraia neganai, ia ese maoromaoro Israela tuari taudia ibounai ia haboua, bona Ioridane Sinavai idia hanaia bona idia dekenai idia lao bona idia tuari henia totona idia gini hegaegae. Davida be Suria taudia tuari henia totona ia gini hegaegae, bona idia be ia idia tuari henia.+
18 To Suria taudia be Israela taudia amo idia heau, bona Davida ese Suria taudia edia kariota guia taudia 7,000, bona idia raka tuari taudia 40,000 ia alaia mase, bona tuari biaguna Sobaka ia alaia mase.
19 Hadadesa ena hesiai taudia idia itaia Israela taudia ese idia halusidia neganai,+ idia ese maoromaoro Davida ida maino idia karaia bona ena siahu henunai idia noho.+ Bona gabeai Suria taudia idia ura lasi momokani Amono taudia idia durua.
