Sivarai Ginigunana 21:1-30
21 Bena Satani* be Israela taudia ia ura tuari henia bona Davida ena lalona ia veria Israela taudia ia duahia totona.+
2 Bena Davida ese Ioaba+ bona tuari taudia edia gunalaia taudia ia hamaoroa: “Umui lao bona Israela taudia umui duahia, Bere-sieba amo ela bona Dano dekenai.+ Bena lau do umui hadibaia, unai amo edia namba do lau diba.”
3 To Ioaba ia gwau: “Namona be Iehova ese tuari taudia be nega 100 ia habadaia! Egu lohia bona king e, idia ibounai be oi emu hesiai taudia, ani? Dahaka dainai oi ura inai bamona oi karaia? Dahaka dainai oi ura Israela taudia dekenai kerere oi havaraia?”
4 To king ena hereva ese Ioaba ena hereva ia koua. Vadaeni Ioaba be Israela ena tano ibounai dekenai ia lao, unai murinai Ierusalema dekenai ia mai.+
5 Bena Ioaba ese idia rejista taudia edia namba be Davida dekenai ia henia. Israela taudia ibounai, mai edia tuari kaia be 1,100,000, bona Iuda taudia ibounai, mai edia tuari kaia taudia be 470,000.+
6 To Levi iduhu taudia bona Beniamina iduhu taudia edia ladana idia rejista lasi,+ badina Ioaba ese king ena hereva ia ura henia lasi.+
7 Vadaeni Dirava momokanina ese unai ia moalelaia lasi, unai dainai Israela taudia ia panisia.
8 Bena Davida be Dirava momokanina dekenai ia gwau: “Inai kara lau karaia dainai, egu kara dika be bada herea.+ Bona mani lau, emu hesiai tauna ena dika oi gwauatao,+ badina lau be kavakava karana lau karaia.”+
9 Iehova ese peroveta tauna Gado,+ Davida ena matahanai itaia tauna unai, dekenai ia gwau:
10 “Oi lao bona Davida oi hamaoroa, ‘Iehova be inai bamona ia gwau: “Oi vairanai gau toi do lau atoa. Namona be ta oi abia hidi, bona unai be oi dekenai do lau mailaia.”’”
11 Vadaeni Gado be Davida dekenai ia mai bona ia gwau: “Iehova be inai bamona ia gwau, ‘Inai gau toi amo ta oi abia hidi,
12 lagani toi lalonai hitolo bada do ia vara,+ eiava hua toi lalonai emu inai taudia ese oi do idia halusia, unai nega ai emu inai taudia edia tuari kaia ese oi do idia hamasea,+ eiava dina toi lalonai Iehova ena tuari kaia ese oi do ia panisia, unai nega ai tano taudia dekenai gorere dikana do ia vara+ bona Iehova ena aneru ese Israela tanona ibounai lalonai dika do ia mailaia.’+ Lau ia siaia Diravana dekenai do lau gwauraia herevana oi lalohadailaia.”
13 Vadaeni Davida be Gado dekenai ia gwau: “Lau lalometau bada. Mani Iehova ese lau dekenai dika ia mailaia, badina iena hebogahisi karana be bada herea,+ to namo lasi taunimanima ese lau dekenai dika idia mailaia.”+
14 Bena Iehova ese Israela taudia edia latanai gorere dikana ia siaia,+ vadaeni Israela taudia 70,000 idia mase.+
15 Danu, Dirava momokanina ese aneru ta ia siaia Ierusalema ia hadikaia totona. To aneru be unai ia do karaia lasi neganai, Iehova ia lalohisihisi matamaia,+ badina unai gorere dikana ia mailaia, bona dika ia mailaia aneruna dekenai ia gwau: “Vadaeni!+ Emu imana oi atoa diho.” Iehova ena aneru be Iebusu tauna, Oronana, ena witi moia gabuna kahirakahira ia gini.+
16 Davida ia roha isi neganai, Iehova ena aneru ia itaia tanobada bona guba padanai ia gini, bona tuari kaia+ amo Ierusalema ia poinia. Davida bona tau badadia be maoromaoro tano dekenai idia tui diho,+ idia be puse dabua idia karaia.+
17 Davida be Dirava momokanina dekenai ia gwau: “Taunimanima duahia karana be lau ese lau gwauraia, ani? Lau be kara dika lau karaia, bona kerere lau karaia danu.+ To inai kerere lasi taudia* be dahaka idia karaia? Egu Dirava, Iehova e, namona be lau bona egu tamana ena bese taudia dekenai dika oi mailaia. To emu taunimanima dekenai dika oi mailaia lasi.”+
18 Bena Iehova ena aneru ese Gado ia hamaoroa,+ ia ese Davida do ia hadibaia, ia daekau lao bona Iebusu tauna Oronana ena witi moia gabuna dekenai Iehova totona boubou patana ta ia haginia.+
19 Vadaeni Davida be Gado ena hereva ia badinaia bona ia daekau lao, Iehova ese Gado ia hamaoroa hegeregerena.
20 Oronana be witi ia moia lalonai, ia giroa bona aneru ia itaia, bona ia ida idia noho natuna memero 4 be idia hunia.
21 Davida be Oronana dekenai ia lao neganai, ia be maoromaoro witi moia gabuna ia rakatania bona Davida dekenai ia tui diho bona ena vairana be tano dekenai ia atoa.
22 Davida be Oronana dekenai ia gwau: “Lau dekenai witi moia gabuna oi hoihoilaia, unai amo Iehova dekenai boubou patana lau haginia diba. Davana korikorina hegeregerena lau dekenai oi hoihoilaia, vadaeni taunimanima ese idia abia gorerena do ia doko.”+
23 To Oronana be Davida dekenai ia gwau: “Namona be egu lohia bona king ese sibona totona witi moia gabuna ia abia bona ena matana ai dahaka be namo ia karaia diba. Lau be gabua boubou totona boromakau lau henia bona witi moia gauna*+ bona witi be aniani boubou bamona lau henia. Ibounai lau henia.”
24 To, King Davida be Oronana dekenai ia gwau: “Lasi, namona be ena davana korikori do lau henia, badina namo lasi emu gau lau abia kava bona Iehova dekenai lau henia eiava gabua bouboudia bamona lau henia.”+
25 Vadaeni Davida ese Oronana amo witi moia gabuna be 600 golo sikel* amo ia hoia.
26 Bona unuseniai Davida ese Iehova dekenai boubou patana ia haginia+ bona gabua bouboudia bona maino karaia bouboudia ia henia, bona Iehova dekenai ia boiboi, bena ia ese guba amo lahi be boubou patana latanai ia hadihoa, unai amo ia haere henia.+
27 Vadaeni Iehova ese aneru ia hamaoroa+ iena tuari kaia be udaia gauna dekenai ia udaia lou totona.
28 Unai nega ai, Davida ia itaia Iebusu tauna Oronana ena witi moia gabuna ai Iehova ese ena guriguri ia haerelaia neganai, hanaihanai unuseni boubou gaudia ia henia.
29 To, unai nega ai Mose ese tano kaukau ai ia karaia Iehova ena palai dubu bona gabua boubou ena pata be Gibeona ena tomadiho gabu helagana ai ia noho.+
30 To Davida be unai gabu dekenai ia lao diba lasi Dirava ena heduru ia tahua totona, badina Iehova ena aneru ena tuari kaia dekenai ia gari.
