Sivarai Ginigunana 22:1-19
22 Bena Davida ia gwau: “Inai be Dirava momokanina Iehova ena dubu, bona inai be Israela taudia edia boubou patana.”+
2 Vadaeni Davida be oda ia henia Israela tanona ai idia noho idau tano taudia ibounai idia haboua totona,+ bona Dirava momokanina ena dubu haginia totona idia dekenai nadi utua gaukarana ia henia.+
3 Danu Davida be geiti ena iduara edia ikoko bona iduara dogoatao gaudia totona auri momo herea ia hegaegaelaia, bona kopa be momo herea dainai ena metau be bada herea,+
4 bona sida au+ be momo herea, badina Sidono taudia+ bona Turo taudia+ ese Davida dekenai sida au momo herea idia abia mai.
5 Bona Davida ia gwau: “Egu natuna Solomona be mero matamata bona gau momo ia do diba lasi,+ bona Iehova totona ia haginia rumana be do ia hairai momokani,+ unai amo ena hairai be tano ibounai dekenai do ia hedinarai.+ Unai dainai, ia totona unai gaudia do lau hegaegaelaia.” Vadaeni, Davida ia do mase lasi neganai, kohu momo herea ia hegaegaelaia.
6 Ma danu, ena natuna Solomona ia boiria bona Israela ena Dirava Iehova ena dubu haginia gaukarana ia hadibaia.
7 Davida ese ena natuna Solomona ia hamaoroa: “Lau be lau ura dikadika egu Dirava Iehova ena ladana totona dubu ta lau haginia.+
8 To Iehova ena hereva lau dekenai be inai: ‘Oi be rara bada herea oi bubua, bona tuari badadia momo lalonai oi vareai. Oi ese egu ladana totona dubu ta do oi haginia lasi,+ badina egu vairanai tanobada ai rara bada herea oi bubua.
9 Oi be natuna mero ta do oi abia,+ ia be maino tauna* ai do ia lao, bona ia idia inai henia besedia ibounai amo lau ese ia dekenai laga-ani do lau henia,+ badina ena ladana be Solomona*+ bona iena mauri dinadia lalonai lau ese Israela dekenai maino bona noho namo do lau havaraia.+
10 Ia ese egu ladana totona dubu ta do ia haginia.+ Ia be egu natuna ai do ia lao, bona lau be ena tamana ai do lau lao.+ Lau ese ena basileia ena terona do lau haginia goada bona Israela do ia lohiaia hanaihanai.’+
11 “Vadaeni, egu natuna e, Iehova be oi ida do ia noho, bona namona be emu Dirava Iehova ena dubu do oi haginia ore, ia hereva hegeregerena.+
12 Iehova ese oi be Israela ena lohia tauna ai ia halaoa neganai, ia sibona ese oi dekenai aonega bona laloparara do ia henia,+ unai amo emu Dirava Iehova ena taravatu do oi badinaia.+
13 Bema Iehova ese Mose amo Israela taudia dekenai ia henia hakaua herevadia bona taravatu oi badinaia namonamo, do oi kwalimu.+ Do oi boga-auka bona goada. Namo lasi oi gari.+
14 Mai hekwarahi bada ida Iehova ena dubu totona golo ena metau be 100,000 talent* bona siliva ena metau be 1,000,000 talent bona kopa bona auri momo herea,+ bona timba bona nadi lau hegaegaelaia,+ to oi ese do oi habadaia.
15 Gaukara taudia momo herea be oi ida idia noho, hegeregere nadi utua taudia, nadi koroa taudia,+ au koroa taudia, bona gaukara idia diba momo taudia idauidau.+
16 Golo, siliva, kopa, bona auri be momo herea.+ Oi toreisi bona gaukara oi hamatamaia, bona Iehova be oi ida do ia noho.”+
17 Bena Davida ese Israela ena iduhu kwarana taudia ibounai ia oda henia ena natuna Solomona idia durua totona:
18 “Iehova emui Dirava be umui ida, bona emui inai taudia ibounai amo ia ese umui dekenai laga-ani ia henia, ani? Badina ia ese inai tano taudia be lau dekenai ia henia, bona Iehova bona ena taunimanima ese tano idia abia.
19 Vadaeni mai emui kudouna bona mauri* ibounai ida Iehova emui Dirava umui tahua,+ bona Dirava momokanina Iehova ena dubu umui haginia matamaia,+ unai amo Iehova ena Taravatu Maua bona Dirava momokanina ena kohu helagadia be Iehova ena ladana totona umui haginia rumana+ dekenai umui abia mai.”+
