Sivarai Ginigunana 23:1-32
23 Davida ia buruka bona kahirakahira ia mase neganai, ia ese ena natuna Solomona be Israela ena king ai ia halaoa.+
2 Bena ia ese Israela ena iduhu kwarana taudia ibounai, hahelaga taudia,+ bona Levi taudia ia haboua.+
3 Levi taudia ibounai idia duahia, edia mauri lagani be 30 amo ia daekau.+ Idia ibounai be 38,000.
4 Unai namba amo Iehova ena dubu gaukara idia naria taudia be 24,000, bona hahemaoro taudia bona edia henunai idia gaukara taudia be 6,000,+
5 bona geiti naria taudia be 4,000,+ bona miusiki gaudia amo Iehova idia hanamoa taudia be 4,000.+ Davida ia gwau unai miusiki gaudia ia karaia, Dirava hanamoa totona.
6 Bena Davida ese idia be Levi ena natudia edia bese hegeregerena ai ia haridia:+ Geresone, Kohata, bona Merari.+
7 Geresone ena natudia memero be Ladana bona Simei.
8 Ladana ena natudia memero be Ieiele, ia be ruma bese gunalaia tauna, bona Setama bona Ioela,+ idia be toi.
9 Simei ena natudia memero be Selomoto, Hasiele, bona Harana, idia ibounai be toi. Idia be Ladana ena bese taudia edia kwarana taudia.
10 Bona Simei ena natudia memero be Iahata, Sina, Ieusu, bona Beria. Idia ibounai be 4.
11 Iahata be ruma bese gunalaia tauna, bona Soha be iharuana. To Ieusu bona Beria edia natudia memero be momo lasi dainai, idia be bese kwarana tamona taudia hegeregerena idia gwauraia bona gaukara tamona idia karaia.
12 Kohata ena natudia memero be Amarama, Isahara,+ Heberona, bona Usiele,+ idia ibounai be 4.
13 Amarama ena natudia memero be Arona+ bona Mose.+ To Arona be Helaga Herea gabuna ai hesiai gaukara do ia karaia,+ oibe, ia bona ena natudia memero ese nega ibounai Iehova dekenai boubou gaudia do idia henia, ia do idia hesiai henia, bona ena ladana ai taunimanima do idia hanamoa.+
14 To Dirava momokanina ena hesiai tauna Mose ena natudia memero idia gwauraia Levi ena iduhu taudia.
15 Mose ena natudia memero be Geresome+ bona Eliesere.+
16 Geresome ena natudia memero amo, Sebuele+ be ruma bese gunalaia tauna.
17 Eliesere ena bese taudia* amo, Rehabaia+ be gunalaia tauna. Eliesere be natudia memero ma haida lasi, to Rehabaia ena natudia memero be momo herea.
18 Isahara ena natuna be Selomiti,+ ia be ruma bese gunalaia tauna.
19 Heberona ena natudia memero be Ieraia, ia be ruma bese gunalaia tauna, Amaraia be iharuana, Iahasiele be ihatoina, bona Iekameama+ be namba 4.
20 Usiele ena natudia memero+ be Mika, ia be ruma bese gunalaia tauna, bona Isihaia be iharuana.
21 Merari ena natudia memero be Mali bona Musi.+ Mali ena natudia memero be Eleasara bona Kisa.
22 Eleasara ia mase neganai, ia be natudia memero lasi, natudia kekeni sibona. Unai dainai Kisa ena natudia memero, edia varavara* unai, ese idia adavadia.
23 Musi ena natudia memero be toi, idia be Mali, Edere, bona Ieremoto.
24 Unai be Levi ena natudia memero. Idia be edia iduhu bona iduhu kwarana taudia hegeregerena idia rejista. Levi taudia, edia mauri lagani 20 amo ia daekau idia duahia bona edia ladana be lista ai idia torea, Iehova ena ruma ai hesiai gaukara idia karaia totona.
25 Badina Davida ia gwau: “Israela ena Dirava, Iehova, be ena taunimanima dekenai laga-ani ia henia vadaeni,+ bona ia be Ierusalema ai do ia noho ela bona hanaihanai.+
26 Danu, Levi taudia ese palai dubu* eiava tomadiho totona idia gaukaralaia kohu ta do idia huaia lasi.”+
27 Davida ena oda ginigabena hegeregerena, Levi taudia edia mauri lagani 20 amo ia daekau be edia ladana idia rejista.
28 Idia be Arona ena natudia ese Iehova ena dubu ai idia karaia hesiai gaukara do idia durua.+ Idia ese ariara,+ aniani daiutudia, helaga gaudia hagoevaia gaukara, bona Dirava momokanina ena dubu ai idia karaia hesiai gaukara ma haida do idia naria.
29 Paraoa helagana,*+ aniani boubou ena paraoa namona, isti lasi paraoa palakadia,+ uro palakana amo idia karaia keke, oela ida idia mikisia paraoa,+ bona unai gaudia edia bada bona edia metau sekea gaukarana idia durua.
30 Idia be daba ta ta ai unuseni do idia gini+ Iehova idia tanikiu henia bona hanamoa totona, adorahi ai danu unai bamona idia karaia.+
31 Sabati dinadia ai, hua matamata ta ta ai,+ bona aria negadia ai+ Iehova dekenai gabua boubou idia henia neganai,+ unai Levi taudia be heduru idia henia, taravatu ai idia gwauraia hegeregerena. Bona nega ibounai Iehova ena vairanai unai bamona idia karaia.
32 Danu Iehova ena dubu ena hesiai gaukara totona, idia be hebou dubu, helaga gabuna, bona Arona ena natudia, edia tadikakadia unai, ese idia karaia gaukara idauidau idia naria.
Futnout
^ Heb., “natudia memero.”
^ Heb., “tadikakadia.”
^ Israela taudia ese tomadiho totona unai palai ruma idia abia loaloa, nega haida idia gwauraia “hebou dubu.”
