Sivarai Ginigunana 29:1-30
29 King Davida ese idia hebou taudia ibounai dekenai ia gwau: “Egu natuna Solomona, Dirava ese ia abia hidi tauna unai,+ be mero matamata bona gau momo ia do diba lasi,+ bona gaukara be bada herea, badina dubu be taunimanima totona lasi to Iehova Dirava totona.+
2 Bona lau gaukara goada Dirava ena ruma totona lau hegaegae, bona golo, siliva, kopa, auri,+ timba,+ onuku nadi, bona sementi totona idia gaukaralaia nadi, nadi mai edia kala idauidau, dava bada nadi idauidau, bona nadi kavabu idauidau momo herea lau henia.
3 Ma danu, egu Dirava ena ruma lau lalokau henia dainai,+ ruma helagana totona lau hegaegaelaia gaudia ibounai amo, lau ese sibona egu golo bona siliva be egu Dirava ena ruma totona lau henia,+
4 hegeregere Opiri+ amo 3,000 golo talent* bona 7,000 siliva talent goevana lau abia, unai idia gaukaralaia daiutu idauidau edia haba* koua totona,
5 golo gaukara totona idia gaukaralaia golo bona siliva gaukara totona idia gaukaralaia siliva, bona imana amo gaukara idauidau idia karaia tatau ese idia gaukaralaia gaudia totona. Hari dina daika ia ura Iehova dekenai harihari gauna ta ia henia?”+
6 Vadaeni bese kwaradia edia iduhu gunalaia taudia, Israela iduhu idauidau edia gunalaia taudia, tuari orea taudia 1,000 ta ta edia biagudia bona tuari orea taudia 100 ta ta edia biagudia,+ bona king ena gaukara idia gunalaia taudia+ ese harihari gaudia idia henia.
7 Bona idia ese Dirava momokanina ena ruma haginia gaukarana dekenai idia henia gaudia be inai: 5,000 golo talent,* 10,000 dariki,* 10,000 siliva talent, 18,000 kopa talent, bona 100,000 auri talent.
8 Taunimanima ese edia dava bada nadi idauidau be Iehova ena ruma ai dava bada kohu haboua gabuna dekenai idia abia lao, unai be Geresone tauna Ieiele ese ia naria.+
9 Taunimanima idia moale badina mai edia kudouna ibounai ida Iehova dekenai unai harihari gaudia idia henia,+ bona king Davida ia moale bada herea.
10 Bena hebou taudia vairanai Davida ese Iehova ia hanamoa. Davida ia gwau: “Emai tamana Israela ena Dirava Iehova e, oi ai hanamoa ela bona hanaihanai.
11 Iehova e, emu siahu+ bona goada+ bona hairai be bada herea momokani,+ badina guba bona tanobada ai idia noho gaudia be oiemu.+ Iehova e, basileia be oiemu.+ Oi sibona be unai gaudia ibounai edia Biaguna.
12 Taga bona hairai be oi amo,+ bona oi ese gau ibounai oi lohiaia,+ bona emu siahu be bada herea,+ bona oi ese taunimanima dekenai ladana bada oi henia+ bona goada oi henia diba.+
13 Bona emai Dirava e, oi ai tanikiu henia bona emu ladana hairaina ai hanamoa.
14 “Bona lau be daika bona egu taunimanima be daidia, ai ese unai bamona harihari gaudia be oi dekenai ai henia diba? Badina gau ibounai be oi amo, bona emu imana amo ai abia gaudia be oi dekenai ai henia noho.
15 Emu vairanai ai be idau tano taudia bamona ai noho, emai sene tamadia ibounai bamona.+ Badina emai mauri inai tanobada ai be kwadogi sibona,+ helaro be lasi.
16 Iehova emai Dirava e, ai hegaegaelaia dava bada kohu ibounai be oiemu, unai gaudia amo emu ladana helagana totona emu ruma ta do ai haginia.
17 Egu Dirava e, lau diba momokani oi be kudouna oi tahua+ bona ta ena badinaia karana dekenai oi moale.+ Mai momokani ida,* lau ese inai gau ibounai lau henia, bona hari emu taunimanima idia mai iniseni oi dekenai harihari gaudia idia henia totona lau itaia neganai, lau moale bada.
18 Iehova, emai sene taudia Aberahamo, Isako, bona Israela edia Dirava e, mani emu taunimanima oi durua, unai amo mai edia ura goadana bona kudouna ibounai ida oi idia hesiai henia.+
19 Bona egu natuna Solomona oi durua, unai amo mai ena kudouna ibounai+ ida oi emu oda herevadia, hadibaia herevadia bona taravatu ibounai ia badinaia.+ Ia oi durua unai ibounai ia karaia bona lau hegaegaelaia gaudia ia gaukaralaia dubu ia haginia totona.”+
20 Bena Davida ese idia hebou taudia ibounai dekenai ia gwau: “Iehova emui Dirava hanamoa.” Bona taunimanima ibounai ese edia sene taudia edia Dirava Iehova idia hanamoa bona idia tui diho bona tano dekenai edia vairana idia atoa diho, Iehova bona king vairanai.
21 Bona unai dina bona murina dinana ai idia ese Iehova dekenai boubou gaudia bona gabua bouboudia idia henia noho.+ Iehova dekenai idia henia gaudia be, boromakau natudia 1,000, mamoe tau 1,000, mamoe natudia 1,000, bona edia wain bouboudia danu.+ Idia ese Israela taudia ibounai totona boubou gaudia momo herea idia henia.+
22 Unai dina ai idia be mai moale bada ida Iehova ena vairanai idia aniani bona idia inuinu noho,+ bona idia ese Iehova ena vairanai Davida ena natuna Solomona idia abia hidi bona king ai idia halaoa,+ bona Sadoka be hahelaga tauna ai idia halaoa.+
23 Bona Solomona be Iehova ena terona ai king ai ia lao,+ ena tamana Davida ena gabuna ia abia, bona king gaukara ia karaia namonamo, bona Israela taudia ibounai be ia idia badinaia.
24 Gunalaia taudia ibounai,+ tuari taudia goadadia,+ bona King Davida ena natudia memero ibounai+ be King Solomona idia kamonai henia.
25 Bona Israela taudia ibounai edia vairanai Iehova ese Solomona ia hanamoa bada bona king siahuna ia henia, Israela ai guna unai bamona king ta dekenai ia vara lasi.+
26 Iese ena natuna Davida be Israela ibounai ia lohiaia,
27 bona Israela ia lohiaia ena daudau be lagani 40. Heberona ai lagani 7 ia lohia,+ bona Ierusalema ai lagani 33 ia lohia.+
28 Bona ia mauri daudau, taga bona hairai ia abia, bona ia buruka momokani neganai ia mase.+ Bona ena natuna Solomona be king ai ia lao.+
29 King Davida ena sivarai, matamana amo ela bona dokona, be peroveta taudia Samuela bona Natana,+ bona matahanai itaia tauna Gado+ ese idia sivarailaia,
30 bona idia ese iena lohia dalana, iena siahu, bona ia bona Israela dekenai bona edia badinai idia noho basileiadia dekenai idia vara gaudia idia sivarailaia danu.
