King Taudia Iharuana 1:1-18
-
Elia be Ahasaia ena mase ia perovetalaia (1-18)
1 Ahaba ia mase murinai, Moaba taudia+ ese Israela taudia idia tuari henia.
2 Unai nega ai Samaria dekenai Ahasaia be ena ruma ena guhi ai au haida amo idia koua matu amo ia moru, bona bero ia davaria. Unai dainai ena hesiai taudia ia boiria bona ia hamaorodia: “Umui lao, Ekarona+ ena dirava Bala-sebuba umui nanadaia bema inai bero amo do lau namo eiava lasi.”+
3 To Iehova ena aneru ese Tisebe tauna Elia+ ia hamaoroa: “Oi toreisi bona oi lao Samaria ena king ena hesiai taudia oi hedavari henia bona idia oi hamaoroa, ‘Israela ai Dirava ia noho lasi dainai umui ura Ekarona ena dirava Bala-sebuba ena heduru umui tahua, a?+
4 Unai dainai Iehova be king dekenai ia gwau: “Oi hekure noho mahuta patana be do oi rakatania lasi, badina do oi mase.”’” Vadaeni Elia ia lao.
5 Ahasaia ena hesiai taudia be idia giroa mai neganai, idia dekenai ia gwau: “Dahaka dainai umui giroa mai?”
6 Bena ia dekenai idia gwau: “Tau ta be ai ia hedavari henia, bona ai dekenai ia gwau, ‘Umui lao, umui ia siaia king dekenai umui giroa lou, bona ia dekenai umui gwau, “Iehova be inai bamona ia hereva: ‘Israela ai Dirava ia noho lasi dainai umui ura Ekarona ena dirava Bala-sebuba ena heduru umui tahua, a? Unai dainai, oi hekure noho mahuta patana do oi rakatania lasi, badina do oi mase.’”’”+
7 Vadaeni idia ia nanadaia: “Umui ia hedavari bona inai hereva ia gwauraia tauna ena toana be edena bamona?”
8 Bena ia dekenai idia gwau: “Unai tauna ena dabua be animal huina amo idia karaia+ bona gabana ai ia kwatua beleta be animal ena kopina amo idia karaia.”+ Maoromaoro king ia gwau: “Unai be Tisebe tauna Elia.”
9 Vadaeni king be tuari taudia 50 edia biaguna bona ena tuari taudia 50 ia siaia. Elia be ororo ai ia helai noho neganai, unai tuari biaguna be Elia dekenai ia daekau lao, bona ia gwau: “Dirava momokani ena hesiai tauna e,+ king ia gwau, ‘Oi diho mai.’”
10 To Elia ese tuari taudia 50 edia biaguna ia haere henia, ia gwau: “Bema lau be Dirava ena hesiai tauna, guba amo lahi do ia diho+ bona oi bona emu tuari taudia 50 do ia gabua ore.” Bona guba amo lahi ia diho bona unai tau bona ena tuari taudia 50 ia gabua ore.
11 Vadaeni king be tuari taudia 50 edia biaguna ma ta bona ena tuari taudia 50 ia siaia. Ia lao bona Elia dekenai ia gwau: “Dirava momokani ena hesiai tauna e, king be inai bamona ia hereva, ‘Oi diho mai haraga.’”
12 To Elia be idia ia haere henia: “Bema lau be Dirava ena hesiai tauna, guba amo lahi do ia diho bona oi bona emu tuari taudia 50 do ia gabua ore.” Bona guba amo lahi ia diho bona unai tau bona ena tuari taudia 50 ia gabua ore.
13 Vadaeni king be tuari taudia 50 edia biaguna ihatoina bona ena tuari taudia 50 ma ia siaidia lou. To unai biaguna ihatoina be Elia dekenai ia lao bona ena vairanai ia tui diho bona ia noinoi, ia gwau: “Dirava momokanina ena hesiai tauna e, mani emu kara, egu mauri bona inai tuari taudia 50 edia mauri oi laloa.
14 Lahi be guba amo ia diho bona tuari taudia 50 edia biaguna rua bona edia orea taudia 50 ia gabua ore vadaeni, to hari lau oi hebogahisi henia bona do lau mauri* noho.”
15 Bena Iehova ena aneru be Elia ia hamaoroa: “Ia ida oi diho lao. Oi gari lasi.” Unai dainai ia toreisi bona ia ida king dekenai idia lao.
16 Vadaeni Elia be king dekenai ia gwau: “Iehova be inai bamona ia hereva: ‘Oi be hesiai taudia oi siaia Ekarona+ ena dirava Bala-sebuba amo heduru abia totona. Israela ai Dirava ia noho lasi dainai unai bamona oi karaia, a?+ Dahaka dainai Dirava ena heduru oi tahua lasi? Unai dainai, oi hekure noho mahuta patana do oi rakatania lasi, badina do oi mase.’”
17 Vadaeni Ahasaia ia mase, Iehova ese Elia amo ia gwauraia hereva hegeregerena. Bona ia be natuna mero ta lasi dainai, ena tadikakana Iehorama+ be king ai ia lao, unai be Iuda ena king Iehosapata ena natuna Iehorama ena lohia lagani iharuana ai.+
18 Ahasaia ena sivarai ibounai,+ ia karaia gaudia ibounai danu, be Israela ena king taudia edia buka lalonai idia torea, ani?
