King Taudia Iharuana 10:1-36
10 Ahaba+ ena natudia memero be 70 bona idia be Samaria ai idia noho. Unai dainai Iehu be Ieserele ena lohia taudia, tau badadia,+ bona Ahaba ena natudia idia naria taudia totona revareva haida ia torea, bona Samaria dekenai ia siaia, ia gwau:
2 “Inai revareva umui abia neganai, emui lohia ena natudia memero be umui ida idia noho, tuari kariota, hosi, siti mai ena magu aukana, bona tuari gaudia danu.
3 Emui lohia ena natudia amo king dagi totona ia hegeregere natuna ta umui abia hidi bona ena tamana ena terona ai ia helai. Bena emui lohia ena bese taudia totona umui tuari.”
4 To idia gari dikadika bona idia gwau: “Bema king rua idia hegeregere lasi Iehu idia tuari henia totona,+ edena bamona ia do ita tuari henia?”
5 Unai dainai king ena ruma ia naria tauna, siti ena lohia tauna, tau badadia, bona natudia idia naria taudia ese Iehu dekenai inai hereva idia siaia, idia gwau: “Ai be emu hesiai taudia, bona oi hereva hegeregerena gau ibounai do ai karaia. Ta be king ai do ai halaoa lasi. Oi ura dahaka oi karaia, oi karaia sibona.”
6 Bena Iehu be idia dekenai revareva iharuana ia torea, ia gwau: “Bema umui be egu kahanai bona umui ura lau umui badinaia, vadaeni emui lohia ena natudia 70 edia kwarana umui mailaia bona kerukeru inai bamona nega ai Ieserele dekenai umui mai.”
Unai nega ai king ena natudia 70 be siti ena tau badadia, edia naria taudia unai, ida idia noho.
7 Unai revareva idia abia neganai, idia ese king ena natudia memero 70 idia abia bona idia hamasedia,+ bona edia kwarana be bosea lalonai idia atoa bona Iehu dekenai idia siaia. Ia be Ieserele ai ia noho.
8 Hesiai tauna ia mai bona Iehu ia hadibaia: “Idia ese king ena natudia edia kwaradia idia mailaia vadaeni.” Unai dainai Iehu ia gwau: “Siti ena geiti ai kahana rua dekenai umui haboua bona do idia noho ela bona daba.”
9 Daba ai Iehu ia mai neganai, taunimanima ibounai vairanai ia gini bona ia gwau: “Umui be kerere lasi* taudia. Oibe, lau ese palani lau karaia king hamasea totona, bona ia lau hamasea,+ to daika ese inai taudia ibounai ia hamasea?
10 Inai umui diba be namo, Iehova ena hereva ibounai, Iehova ese Ahaba ena bese totona ia gwauraia hereva unai, be idia guguru,+ bona Iehova be ena hesiai tauna Elia amo ia gwauraia gauna ia karaia vadaeni.”+
11 Ma danu, Iehu ese Ieserele ai Ahaba ena bese taudia oredia ibounai, ena natudia idia naria tatau, ena turadia, bona ena hahelaga taudia ia hamasedia,+ ta ia mauri lasi.+
12 Bena ia toreisi bona Samaria dekenai ia lao. Bona dala huanai mamoe ena huina idia kokia rumana ia noho.
13 Unuseniai Iehu ese Iuda ena king Ahasaia+ ena tadikakadia ia davaria, bona idia dekenai ia gwau: “Umui be daidia?” Bena idia gwau: “Ai be Ahasaia ena tadikaka, bona ai lao king ena natudia memero bona ena sinana* ena natudia memero ai vadivadi henia, ai ura diba idia namo eiava.”
14 Karaharaga ia gwau: “Idia umui dogoatao.” Unai dainai idia ibounai 42 idia dogoatao bona mamoe ena huina idia kokia rumana ena ranu guri badinai idia hamasedia. Idia ta ia mauri lasi.+
15 Iehu be unuseni amo ia lao murinai, Rekaba+ ena natuna Iehonadaba+ ia hedavari henia, ia danu be Iehu hedavari henia totona ia mai. Iehu ese ia hanamoa neganai, ia nanadaia: “Oi be mai kudouna ibounai ida lau do oi durua, lau ese mai kudouna ibounai ida oi lau durua hegeregerena, a?”
Iehonadaba ia haere: “Oibe.”
Iehu ia gwau: “Bema oibe, emu imana oi henia.”
Vadaeni ena imana ia henia, bona Iehu ese ena kariota dekenai ia veria daekau.
16 Bena ia gwau: “Lau ida oi mai, bona do oi itaia lau ese Iehova idia dadaraia taudia lau ura henia lasi.”+ Vadaeni Iehu ida ena tuari kariota amo idia lao.
17 Bena Samaria dekenai ia lao, bona unuseniai idia noho Ahaba ena bese taudia oredia ibounai ia hamasedia ore,+ Iehova ese Elia amo ia gwauraia herevana hegeregerena.+
18 Gabeai, Iehu ese taunimanima ibounai ia haboua bona ia gwau: “Ahaba ese Bala tomadiho henia karadia ia karaia,+ to lau, Iehu ese Bala tomadiho henia karadia do lau habadaia momokani.
19 Vadaeni Bala ena peroveta taudia,+ ia idia tomadiho henia taudia, bona iena hahelaga taudia ibounai+ oi boiria. Idia ta umui reaia lasi, badina lau be Bala totona boubou gauna badana ta do lau karaia.” To Iehu be koikoi dalanai ia kara, badina ia ura Bala idia tomadiho henia taudia ia hamasedia.
20 Iehu ma ia gwau: “Bala totona hebou badana ta umui gwauraia.” Vadaeni taunimanima idia hadibaia.
21 Unai murinai Iehu be Israela ibounai dekenai hereva ia siaia, bona Bala idia tomadiho henia taudia ibounai idia lao. Oibe, idia ibounai idia lao. Bala ena dubu lalonai idia vareai,+ bona dubu ena lalona ibounai ia honu momokani.
22 Iehu ese dabua atoa gabuna ia naria tauna dekenai ia gwau: “Bala idia tomadiho henia taudia ibounai totona dabua oi mailaidia.” Vadaeni idia totona dabua ia abidia mai.
23 Bena Iehu bona Rekaba ena natuna Iehonadaba+ be Bala ena dubu lalonai idia vareai. Iehu be Bala tomadiho henia taudia dekenai ia gwau: “Umui sekea namonamo, umui huanai Iehova tomadiho henia taudia ta ia noho lasi be namo, to Bala tomadiho henia taudia sibona.”
24 Bena idia ese boubou gauna bona gabua bouboudia idia karaia matamaia. Iehu ese tatau 80 be murimuri dekenai ia atodia bona ia gwau: “Bema umui ta ese tau ta umui hamauria, ia be do ia mase lasi, to oi be do oi mase.”
25 Iehu be gabua boubou ia karaia ore murinai, gadi taudia* bona ofesa taudia dekenai ia gwau: “Umui mai bona idia umui hamasedia! Idia ta do ia heau mauri lasi!”+ Vadaeni gadi taudia bona ofesa taudia ese edia tuari kaia amo idia hamasedia bona ruma amo idia negea raka-lasi, bona idia vareai lao ela bona Bala ena dubu ena lalona momokani daiutuna dekenai.
26 Bena idia ese Bala ena dubu ena nadi du helagadia+ idia abia lao murimuri ai bona idia gabua.+
27 Idia ese Bala ena dubu ena nadi du helagana+ idia makohia, bona Bala ena dubu+ idia hadikaia bona mei rumana ai idia halaoa, bona unai bamona ia noho ema bona hari.
28 Iehu ese Israela ai Bala tomadiho henia karadia ia haorea momokani.
29 To, Iehu be Nebata ena natuna Ieroboama, Israela taudia ia hakaua idia kara dika tauna unai, ena kara dika ia badinaia. Ia ese Betele bona Dano dekenai idia noho golo boromakau natudia edia kaivakuku ia kokidia lasi.+
30 Vadaeni Iehova be Iehu dekenai ia gwau: “Oi kara namo bona egu matana ai kara maorona oi karaia, badina egu ura hegeregerena oi ese Ahaba ena bese taudia ibounai oi haorea,+ unai dainai emu natudia edia uru iboudiai 4 be Israela ena terona ai do idia helai.”+
31 To Iehu be mai kudouna ibounai ida Israela ena Dirava Iehova ena taravatu ia badinaia lasi.+ Ia be Ieroboama, Israela taudia ia hakaua idia kara dika tauna unai, ena kara dika ia badinaia.+
32 Unai nega ai Iehova ese Israela ena tano ia hamaragia matamaia. Badina Hasaele ese Israela taudia ia tuari henia bona ena gabu ibounai ia abia,+
33 Ioridane amo ela bona dina ena daekau kahana, Gileada ena tano ibounai, unuseniai Gado iduhu, Rubena iduhu, bona Manase iduhu taudia+ idia noho. Danu Aroere, unai be Aranona Kourana badinai ia noho, bona ia daekau lao ela bona Gileada bona Basana dekenai.+
34 Bona Iehu ena sivarai ibounai, ia karaia gaudia bona tuari ai ia kwalimu sivaraidia, be Israela ena king taudia ia sivarailaia buka lalonai idia torea, ani?
35 Bena Iehu be ia mase,* bona Samaria ai idia guria. Bona ena natuna Iehoahasa+ be king ai ia lao.
36 Iehu ese Samaria amo Israela be lagani 28 lalonai ia lohiaia.
Futnout
^ Eiava “kara maoromaoro.”
^ Unai be, kwini Iesebele, King Iehorama ena sinana.
^ Heb., “heau taudia.”
^ Heb., “ena sene taudia ida ia hekure.”