King Taudia Iharuana 11:1-21
11 Ahasaia ena sinana Atalaia+ ia kamonai ena natuna ia mase neganai,+ ia toreisi bona king ena bese taudia ibounai ia hamasea.+
2 To, king Iehorama ena natuna kekeni Iehoseba, Ahasaia ena taihuna, ese king ena natudia memero amo Iehoasa+ ia abia bona ia heau bena ruma ena lalona daiutu ta lalonai ia bona ena naria hahine ia hunia, badina king ena natudia do idia hamasea. Idia ese Atalaia amo ia idia hunia, unai amo ia idia hamasea lasi.
3 Bona ia be naria hahinena ida Iehova ena ruma dekenai lagani 6 idia noho, unai nega lalonai Atalaia be unai tano ia lohiaia noho.
4 Lagani namba 7 ai, Iehoiada ese king ena gadi taudia* 100 ta ta edia gunalaia taudia bona king ena ruma idia gimaia taudia*+ edia gunalaia taudia ia boiria Iehova ena ruma dekenai idia mai ia idia itaia totona. Bona Iehova ena ruma ai idia ida gwaubou ta ia karaia bona idia lalotamona, bena idia dekenai king ena natuna ia hahedinaraia.+
5 Idia ia oda henia: “Inai bamona do umui karaia: Tuari taudia be orea toi dekenai umui haboua. Orea ginigunana be Sabati dinana ai do ia gaukara bona king ena ruma do ia gimaia,+
6 orea iharuana be geiti ladana “Badina,” do ia gimaia, bona orea ihatoina be geiti ma ta, unai be king ena ruma idia gimaia taudia edia murinai ia noho geiti, do ia gimaia. Namona be emui nega hegeregerena ai king ena ruma umui gimaia.
7 Sabati dinana ai idia gaukara lasi orea rua be Iehova ena ruma idia gimaia namonamo be namo, unai amo king do idia gimaia diba.
8 Namona be king umui hagegea, bona tuari gaudia umui dogoatao. Bema ta be gadi taudia huanai ia vareai, do umui hamasea. King ia lao gabudia ibounai dekenai ia umui badinaia.”
9 Tuari orea 100 ta ta edia gunalaia taudia+ be hahelaga tauna Iehoiada ena oda hegeregerena idia karaia. Vadaeni unai gunalaia taudia ta ta ese edia tatau, Sabati dinana ai idia gaukara taudia bona Sabati dinana ai idia gaukara lasi taudia unai, idia abia bona hahelaga tauna Iehoiada dekenai idia mai.+
10 Vadaeni hahelaga tauna ese tuari orea 100 edia gunalaia taudia dekenai King Davida ena io bona kesi kuborudia ia henia, unai tuari kohudia be Iehova ena ruma ai idia noho.
11 Bona king ena ruma idia gimaia taudia+ be edia tuari gaudia idia dogoatao bona edia gabu dekenai idia gini, idia be dubu helaga ena idiba kahana amo ia lao dubu helaga ena lauri kahana bona boubou patana+ bona dubu helaga badinai idia gini, bona king idia hagegea danu.
12 Vadaeni Iehoiada ese king ena natuna+ ia abia mai bona ena kwarana latanai korona ia atoa bona Taravatu bukana*+ be ena kwarana ataiai ia dogoatao,* bona ia be king ai idia halaoa bona idia horoa. Taunimanima be edia imana idia pataia bona idia gwau: “King ia mauri daudau!”+
13 Atalaia be taunimanima edia heau regena ia kamonai neganai, karaharaga Iehova ena ruma dekenai idia noho taudia dekenai ia lao.+
14 Bena ia ese king ia itaia du badinai ia gini, vaia idia karaia bamona.+ Bona gunalaia taudia bona kibi idia hiriria taudia+ be king ida idia noho, bona unai tano taudia ibounai be idia moale bona kibi idia hiriridia. Unai nega ai Atalaia be ena dabua ia darea bona ia boiboi: “Umui ura lau umui hadikaia, a?”
15 Hahelaga tauna Iehoiada ese tuari orea 100 ta ta edia gunalaia taudia ia oda henia,+ bona idia dekenai ia gwau: “Emui huana amo ia umui lulua, bona bema ta be ena murinai ia raka, ia danu be tuari kaia amo umui hamasea!” Badina hahelaga tauna Iehoiada ia hereva vadaeni, ia gwau: “Iehova ena ruma dekenai ia umui hamasea lasi.”
16 Bena ia idia dogoatao, bona king ena ruma+ dekenai hosi idia vareai gabuna dekenai idia ginidae neganai, unuseniai ia idia hamasea.
17 Bena Iehoiada ese Iehova bona king bona taunimanima ida gwaubou ta ia karaia,+ unai amo idia be Iehova ena taunimanima do idia gwauraia noho, bona ia ese king bona taunimanima huanai gwauhamata ta ia karaia danu.+
18 Unai murinai tano taudia ibounai be Bala ena dubu dekenai idia mai bona iena boubou patadia idia veria diho,+ iena laulau idia hamakohidia ore,+ bona Bala ena hahelaga tauna Matana be boubou patadia vairanai idia hamasea.+
Bena hahelaga tauna ese Iehova ena ruma naria taudia ia abia hidi.+
19 Ma danu, ia ese tuari orea 100 ta ta edia gunalaia taudia,+ king ena gadi taudia,* king ena ruma idia gimaia taudia,+ bona tano taudia ibounai ia abia bona Iehova ena ruma amo king idia hakaua diho bona king ena ruma idia gimaia taudia ese idia naria geiti amo idia vareai bona king ena ruma dekenai idia lao. Bena Iehoasa be king taudia edia terona latanai ia helai.+
20 Vadaeni tano taudia ibounai idia moale bona siti ai maino ia noho, badina idia ese king ena ruma dekenai Atalaia be tuari kaia amo idia hamasea.
21 Iehoasa+ ena mauri lagani be 7 neganai, king ai ia lao.+
Futnout
^ Heb., “Kariana taudia.”
^ Heb., “heau taudia.”
^ Eiava “bona Taravatu ena kopi ta ia henia.”
^ Reana lokua toretore ta, Dirava ena Taravatu ia noho gauna unai.
^ Heb., “Kariana taudia.”
