King Taudia Iharuana 15:1-38
15 Israela ena king Ieroboama* ena lohia lagani namba 27 ai, Iuda ena king Amasaia+ ena natuna Asaraia*+ be king ai ia lao.+
2 Iena mauri lagani be 16 neganai, king ai ia lao, bona lagani 52 lalonai Ierusalema ai ia lohia. Iena sinana ena ladana be Iekolaia, ia be Ierusalema amo.
3 Ia be Iehova ena vairanai kara maoromaoro ia badinaia noho, iena tamana Amasaia ia karaia bamona.+
4 To, ataiai gabudia* idia kokia lasi,+ bona unuseniai taunimanima be boubou gaudia idia do bouboulaia bona gabua bouboudia edia kwalahu be edia dirava dekenai idia daekau noho.+
5 Iehova ese lepera gorerena amo king ia hahisia, bona ia be lepera tauna+ ela bona ia mase. Ia be ruma idauna ta ai ia noho,+ unai nega ai iena natuna Iotama+ be king ena ruma ena gaukara ia naria, bona unai tano taudia ia hahemaoro henia.+
6 Asaraia ena sivarai ibounai,+ ia karaia gaudia ibounai, be Iuda ena king taudia edia buka lalonai idia torea, ani?
7 Bena Asaraia be ia mase* bona ena sene taudia idia guria gabuna ai idia guria,+ unai be Davida Ena Siti ai. Bona iena natuna Iotama be king ai ia lao.
8 Iuda ena king Asaraia+ ena lohia lagani namba 38 ai, Ieroboama ena natuna Sekaraia+ be Samaria dekenai Israela ia lohiaia, bona hua 6 lalonai ia lohia.
9 Ia ese Iehova ena matana ai kara dika ia karaia, ena sene taudia hegeregerena. Ia ese Nebata ena natuna Ieroboama ena kara dikadia ibounai, Israela taudia ia hakaua idia karaia kara dikadia unai, amo ia raka-siri lasi.+
10 Bena Iabese ena natuna Salumu be palani ia karaia ia hamasea totona, bona Ibileama+ dekenai ia hamasea.+ Unai murinai ia be king ai ia lao.
11 Sekaraia ena sivarai ibounai be Israela ena king taudia edia buka lalonai idia torea.
12 Unai be Iehova ese Iehu dekenai ia gwauraia herevana ia hamomokania, ia gwau: “Emu natudia edia uru iboudiai 4+ be Israela ena terona ai do idia helai.”+ Bona unai hegeregerena ia vara.
13 Iabese ena natuna Salumu be Iuda ena king Usaia*+ ena lohia lagani namba 39 ai ia lohia, bona hua ta lalonai Samaria ai ia lohia.
14 Bena Gadi ena natuna Menahemo be Tirisa+ amo Samaria dekenai ia daekau lao, bona unuseniai Iabese ena natuna Salumu ia hamasea.+ Unai murinai, ia be king ai ia lao.
15 Salumu ena sivarai ibounai bona ia karaia palani ena sivarai be Israela ena king taudia edia buka lalonai idia torea.
16 Unai nega ai Menahemo be Tirisa amo ia mai bona Tipisa siti ia hadikaia, bona unai siti lalonai idia noho taudia ibounai ia hamasedia bona ena badina tanodia ia hadikaia, badina idia ese ia totona siti ena geiti idia kehodia lasi. Oibe, ia ese siti ia hadikaia bona edia rogorogo hahine edia bogana ia utua kehoa.
17 Iuda ena king Asaraia ena lohia lagani namba 39 ai, Gadi ena natuna Menahemo be Israela ia lohiaia, bona Samaria dekenai lagani 10 lalonai ia lohia.
18 Ia be Iehova ena matana ai kara dika ia karaia noho. Bona ena mauri dinadia ibounai lalonai ia ese Nebata ena natuna Ieroboama ena kara dikadia ibounai, Israela taudia ia hakaua idia karaia kara dikadia unai, amo ia raka-siri lasi.+
19 Asuria ena king Pulu+ be Israela tano ia tuari henia, bona Menahemo ese Pulu dekenai 1,000 siliva talent* ia henia, unai amo Pulu ese Menahemo do ia durua ena basileia ia lohiaia noho totona.+
20 Vadaeni Menahemo be Israela ena ladana bada bona taga bada taudia amo siliva moni ia gogoa.+ Asuria ena king dekenai 50 siliva sikel* ia henia ena tatau ta ta totona. Bena Asuria ena king be Israela tanona ia rakatania bona ia giroa.
21 Menahemo ena sivarai ibounai,+ ia karaia gaudia danu, be Israela ena king taudia edia buka lalonai idia torea, ani?
22 Bena Menahemo be ia mase,* bona ena natuna Pekahaia be king ai ia lao.
23 Iuda ena king Asaraia ena lohia lagani namba 50 ai, Menahemo ena natuna Pekahaia be Samaria ai Israela ia lohiaia, bona lagani rua lalonai ia lohia.
24 Ia be Iehova ena matana ai kara dika ia karaia noho. Bona ena mauri dinadia ibounai lalonai ia ese Nebata ena natuna Ieroboama ena kara dikadia ibounai, Israela taudia ia hakaua idia karaia kara dikadia unai, amo ia raka-siri lasi.+
25 Bena Pekahaia ena durua tauna Peka,+ Remalaia ena natuna unai, be palani ia karaia ia hamasea totona. Bona Samaria ai king ena ruma lalonai ia noho daiutu ta ai, Peka ese Pekahaia, Aragobo bona Arie ia hamasea. Peka be Gileada tatau 50 ida ia noho. Bona Pekahaia ia hamasea murinai, ia be king ai ia lao.
26 Pekahaia ena sivarai ibounai, ia karaia gaudia ibounai danu, be Israela ena king taudia edia buka lalonai idia torea.
27 Iuda ena king Asaraia ena lohia lagani namba 52 ai, Remalaia ena natuna Peka+ be Samaria ai Israela ia lohiaia, bona lagani 20 lalonai ia lohia.
28 Ia be Iehova ena matana ai kara dika ia karaia noho, bona ena mauri dinadia ibounai lalonai ia ese Nebata ena natuna Ieroboama ena kara dikadia ibounai, Israela taudia ia hakaua idia karaia kara dikadia unai, amo ia raka-siri lasi.+
29 Israela ena king Peka ena lohia negana ai, Asuria ena king Tigolata-pilesere+ ese Iono, Abele-betemaka,+ Ianoa, Kedesi,+ Hasoro, Gileada,+ bona Galilea ai idia noho Napatali tanodia ibounai ia tuari henia,+ bona unai tano taudia be Asuria dekenai ia abia lao.+
30 Bena Elaha ena natuna Hosahea+ be palani ia karaia Remalaia ena natuna Peka hamasea totona, bona ia alaia mase. Bona Usaia ena natuna Iotama+ ena lohia lagani namba 20 ai Hosahea be king ai ia lao.
31 Peka ena sivarai ibounai, ia karaia gaudia ibounai danu, be Israela ena king taudia edia buka lalonai idia torea.
32 Israela ena king, Remalaia ena natuna Peka ena lohia lagani iharuana ai, Iuda ena king Usaia+ ena natuna Iotama+ be king ai ia lao.
33 Iena mauri lagani be 25 neganai, king ai ia lao, bona Ierusalema ai lagani 16 lalonai ia lohia. Iena sinana be Ierusa, Sadoka ena natuna kekeni.+
34 Iotama be Iehova ena vairanai kara maoromaoro ia karaia noho, ena tamana Usaia hegeregerena.+
35 To, ataiai gabudia idia kokia lasi, bona unuseniai taunimanima be boubou gaudia idia do bouboulaia bona gabua bouboudia edia kwalahu be edia dirava dekenai idia daekau noho.+ Ia ese Iehova ena ruma ena Ataiai Geiti ia haginia.+
36 Iotama ena sivarai ibounai, ia karaia gaudia ibounai danu, be Iuda ena king taudia edia buka lalonai idia torea, ani?
37 Unai nega lalonai Iehova ese Suria ena king Resini bona Remalaia ena natuna Peka+ ia siaia Iuda idia tuari henia totona.+
38 Bena Iotama be ia mase* bona ena sene taudia idia guria gabuna ai idia guria, unai be ena sene tauna Davida Ena Siti ai. Bona ena natuna Ahasa be king ai ia lao.
Futnout
^ Anina be “Iehova ese Ia Durua.” 2Ki 15:13;2Si 26:1-23;Isa 6:1; bona Sek 14:5 ai iena ladana be Usaia.
^ Inai be, Ieroboama Iharuana.
^ Heb., “ena sene taudia ida ia hekure.”
^ Asaraia ena ladana ma ta.
^ Heb., “ena sene taudia ida ia hekure.”
^ Heb., “ena sene taudia ida ia hekure.”
