King Taudia Iharuana 17:1-41
17 Iuda ena king Ahasa ena lohia lagani namba 12 ai, Elaha ena natuna Hosahea+ be Samaria ai Israela ia lohiaia matamaia. Ia be lagani 9 lalonai ia lohia.
2 Ia be Iehova ena vairanai kara dika ia karaia noho, to Israela ena king gunadia ese idia karaia kara dika ia hanaia lasi.
3 Asuria ena king Salamanesa ia daekau mai bona Hosahea ida ia tuari,+ bona Hosahea be ena hesiai tauna ai ia lao bona ia dekenai harihari gaudia* ia henia.+
4 To, Asuria ena king ia kamonai Hosahea be ia ia hadikaia palani ia karaia, badina Hosahea ese Aigupito ena king So+ dekenai ena hesiai taudia ia siaia lao bona Asuria ena king dekenai harihari gaudia ia abia lao lasi, lagani gunadia ai ia karaia bamona. Unai dainai Asuria ena king ese ia dogoatao bona dibura ruma lalonai ia atoa.
5 Asuria ena king be Israela tano ibounai ia tuari henia, bona Samaria dekenai ia lao bona lagani toi lalonai ia koua hagegea.
6 Hosahea ena lohia lagani namba 9 ai, Asuria ena king ese Samaria ia abia.+ Bena ia ese Israela taudia ia abia lao+ Asuria dekenai bona Hala hanua, Gosana sinavai+ badinai ia noho hanua Haboro bona Media siti haida dekenai idia noho.+
7 Unai ia vara badina Israela taudia be Iehova edia Dirava, Aigupito dekenai king Farao ena siahu henunai amo idia ia hakaua siri Diravana unai,+ ena vairanai idia kara dika. Idia ese dirava ma haida idia tomadiho henia,*+
8 idia be Iehova ese Israela taudia edia vairana amo ia lulua besedia edia kastom karadia idia badinaia, bona Israela edia king taudia ese idia atoa kastom karadia idia badinaia.
9 Israela taudia be Iehova edia Dirava vairanai ia maoro lasi karadia idia do karaia noho. Idia ese siti ibounai, siti maragidia mai edia gima kohorona amo ia lao siti badadia mai edia magu aukadia dekenai ataiai gabudia* idia do haginia noho.+
10 Idia ese ororo badadia ai bona au henunai+ nadi du helagadia bona au helagadia* idia haginia noho.+
11 Bona ataiai gabudia ibounai ai gabua bouboudia edia kwalahu be edia dirava dekenai idia do daekau noho, Iehova ese edia vairana amo ia lulua besedia idia karaia hegeregerena.+ Kara dikadia idia karaia noho Iehova idia habadua totona.
12 Iehova be idia dekenai ia gwau: “Kaivakuku do umui tomadiho henia lasi.”+ To idia ese kaivakuku dika rohorohodia idia tomadiho henia noho,+
13 Iehova ese Israela taudia bona Iuda taudia be ena peroveta taudia bona matahanai itaia taudia ibounai amo idia ia sisiba henia noho,+ ia gwau: “Emui kara dikadia umui rakatania!+ Egu oda hereva bona taravatu ibounai umui badinaia, lau ese emui sene taudia dekenai lau henia oda ibounai bona egu peroveta taudia amo umui dekenai lau siaia hadibaia herevadia hegeregerena.”
14 To idia kamonai lasi, idia be edia sene taudia, Iehova edia Dirava dekenai abidadama idia hahedinaraia lasi taudia unai, edia laloauka karadia idia badinaia noho.+
15 Idia ese ena taravatu bona edia sene taudia ida ia karaia gwaubou bona idia sisiba henia totona ia henia hadibaia herevadia idia dadaraia,+ bona anina lasi kaivakuku idia tomadiho henia noho+ bona anina lasi taudia ai idia lao,+ edia badina besedia ibounai, Iehova ese ia hamaorodia edia kara do idia tohotohoa lasi besedia unai, idia tohotohoa.+
16 Idia be Iehova edia Dirava ena oda herevadia idia dadaraia noho, bona auri amo boromakau kaivakuku rua idia karaia+ bona au helagana* idia haginia,+ bona guba gaudia dekenai idia tui diho+ bona Bala dirava idia tomadiho henia.+
17 Danu, idia ese edia natudia memero bona kekeni be lahi lalonai idia gabua,*+ lauma dikadia edia heduru amo vaira nega idia perovetalaia,+ bona toa idauidau edia anina idia tahua, bona Iehova ena vairanai kara dika idia karaia noho,* ia idia habadua totona.
18 Vadaeni Iehova be Israela taudia dekenai ia badu momokani, unai dainai ena vairana amo idia ia lulua,+ to Iuda iduhu taudia sibona ia rakatania.
19 Iuda taudia danu be edia Dirava, Iehova ena oda idia badinaia lasi.+ Idia danu be Israela taudia ese idia badinaia kastom karadia idia badinaia.+
20 Iehova ese Israela taudia ibounai ia dadaraia bona ia hahisidia bona dadidadi taudia edia imana dekenai ia atoa, ela bona ena vairana amo ibounai ia negea.
21 Ia ese Israela taudia be Davida ena bese amo ia kokia, bona idia ese Nebata ena natuna Ieroboama be king ai idia halaoa.+ To Ieroboama ese Israela taudia ia hakaua Iehova idia dadaraia bona kara dika badana idia karaia totona.
22 Bona Israela taudia be Ieroboama ia karaia kara dikadia ibounai idia badinaia noho.+ Unai kara dika idia rakatania lasi
23 ela bona Iehova ese Israela taudia be ena vairana amo ia luludia lao, unai be ena peroveta taudia amo ia hereva hegeregerena.+ Unai dainai Israela taudia be edia tano amo Asuria dekenai idia abia lao,+ bona unuseni idia noho ema bona hari.
24 Vadaeni Asuria ena king ese taunimanima be Babulonia, Kuta, Ava, Hamata, bona Separavaimi+ siti amo ia siaidia lao Samaria ena siti ai idia noho totona. Idia ese Samaria idia abia bona ena siti idia noholaia.
25 Unai taudia be unai siti ai idia noho matamaia neganai, idia ese Iehova idia gari henia* lasi. Unai dainai Iehova ese laiona be edia huanai ia siaia+ bona idia haida idia hamasea.
26 Asuria ena king idia hadibaia: “Oi abia mauri bona Samaria ena siti dekenai oi siaia lao taudia be unai tano ena Dirava tomadiho henia dalana idia diba lasi. Unai dainai ia ese edia huanai laiona ia siaidia bona idia ia hamasea noho.”
27 Vadaeni Asuria ena king ese oda ia henia, ia gwau: “Unai tano amo umui abia mauri hahelaga taudia amo ta umui siaia bona unai tano ena Dirava tomadiho henia dalana do ia hadibaia.”
28 Vadaeni Samaria amo idia abia mauri hahelaga tauna ta be Betele dekenai ia giroa lou,+ bona idia dekenai Iehova gari henia* dalana ia hadibaia matamaia.+
29 To bese ta ta be sibona edia dirava idia karaia, bona Samaria taudia ese ataiai gabudia ai idia haginia tomadiho rumadia dekenai idia atoa. Bese idauidau be edia siti ta ta ai unai bamona idia karaia.
30 Vadaeni Babulonia tatau ese Sukoto-benoto kaivakuku idia karaia, Kuta tatau ese Neregala kaivakuku idia karaia, Hamata tatau+ ese Asima kaivakuku idia karaia,
31 bona Ava taudia ese Nibihasa bona Tarataka kaivakuku idia karaia. Separavaimi taudia ese edia natudia memero be lahi dekenai idia gabua bona edia dirava Adarameleka bona Anamameleka dekenai idia henia.+
32 Ena be unai bese taudia ese Iehova idia gari henia, to edia huana amo haida idia abia hidi ataiai gabudia ai idia haginia tomadiho rumadia dekenai hahelaga taudia edia gaukara idia karaia totona.+
33 Idia ese Iehova idia gari henia, to edia dirava idia tomadiho henidia, guna idia noholaia tano ena tomadiho dalana hegeregerena.+
34 Unai nega amo ema bona hari idia be edia tomadiho dalana idia badinaia noho. Idia ta ese Iehova idia tomadiho henia lasi, bona ena taravatu ibounai, hahemaoro herevadia, bona oda herevadia idia badinaia lasi, Iehova ese Iakobo, gabeai ena ladana ia haidaua Israela, ena natuna memero dekenai ia henia herevadia unai.+
35 Iehova be idia danu gwaubou ta ia karaia neganai,+ idia ia oda henia: “Umui ese dirava ma haida umui tomadiho henia lasi, bona idia dekenai umui tui diho lasi, eiava hesiai henia lasi eiava boubou gaudia umui henia lasi.+
36 To lau, Iehova, ese egu imana siahuna bona goadana amo umui be Aigupito tanona amo lau hakaua raka-lasi.+ Lau sibona do umui gari henia be namo,+ bona lau dekenai do umui tui diho, bona lau dekenai boubou gaudia umui henia.
37 Bona umui totona lau torea hakaua herevadia, hahemaoro herevadia, Taravatu bona oda herevadia+ be nega ibounai umui badinaia namonamo bona dirava ma haida umui tomadiho henia lasi.
38 Bona umui ida lau karaia gwaubou umui laloaboio lasi,+ bona dirava ma haida umui tomadiho henia lasi.
39 To lau, Iehova emui Dirava umui gari henia, badina lau ese emui inai taudia edia imana amo umui lau hamauria.”
40 To idia kamonai lasi, bona edia tomadiho dalana gunana idia badinaia noho.+
41 Vadaeni inai bese taudia ese Iehova idia gari henia,+ to edia kaivakuku idia tomadiho henia danu. Edia natudia bona tubudia be edia sene taudia bamona idia do karaia noho ema bona hari.
Futnout
^ Inai “harihari gaudia” be reana takisi moni.
^ Heb., “gari henia.”
^ Heb., “edia natudia be lahi lalona amo idia abia hanai.”
^ Eiava “sibona idia hoihoilaia kara dika karaia totona.”
^ Eiava “tomadiho henia.”
^ Eiava “tomadiho henia.”
