King Taudia Iharuana 18:1-37
18 Israela ena king Elaha ena natuna Hosahea+ ena lohia lagani ihatoina ai, Iuda ena king Ahasa+ ena natuna Hesekaia+ be king ai ia lao.
2 Ia be king ai ia lao neganai, ena mauri lagani be 25, bona lagani 29 lalonai Ierusalema ai ia lohia. Ena sinana be Abi,* Sekaraia ena natuna.+
3 Hesekaia be Iehova ena vairanai kara maorona ia karaia noho,+ ena sene tauna Davida hegeregerena.+
4 Ia ese ataiai gabudia* ia kokia,+ nadi du helagadia ia hamakohia, bona au helagana* ia utua.+ Danu ia ese Mose ia karaia kopa gaigai ia hamakohia.+ Badina unai nega amo ia mai Hesekaia ena nega, Israela taudia ese idia gabua boubou gaudia edia kwalahu be kopa gaigai dekenai ia daekau lao bona idia gwauraia kopa gaigai ena kaivakuku.*
5 Hesekaia be Israela taudia edia Dirava Iehova ia abidadama henia.+ Iuda ena king ibounai, guna idia lohia king taudia bona Hesekaia murinai idia lohia king taudia, amo ia bamona king ta ia noho lasi.
6 Ia be Iehova ia badinaia noho+ bona ia amo ia raka-siri lasi. Iehova ese Mose dekenai ia henia oda ia badinaia noho.
7 Bona Iehova be ia ida ia noho. Ia lao gabudia ibounai dekenai mai aonega ida ia kara. Ia ese Asuria ena king ia dadaraia bona ena hesiai gaukara ia karaia lasi.+
8 Danu ia ese Filistia taudia ia halusia,+ Gasa bona ena gabu ibounai ia abia, unai be siti maragidia mai edia gima kohorona bona siti badadia mai edia magu aukadia ibounai.
9 King Hesekaia ena lohia lagani namba 4 ai, unai be Israela ena king Elaha ena natuna Hosahea+ ena lohia lagani namba 7 ai, Asuria ena king Salamanesa be Samaria tuari henia totona ia lao bona ia hagegea matamaia.+
10 Bena lagani toi murinai, Samaria idia abia.+ Hesekaia ena lohia lagani namba 6 ai, unai be Israela ena king Hosahea ena lohia lagani namba 9 ai, Samaria idia abia.
11 Vadaeni Asuria ena king ese Israela taudia be Asuria dekenai ia abidia lao,+ bona Hala hanua, Gosana sinavai badinai ia noho hanua Haboro bona Media siti haida dekenai idia noho.+
12 Unai ia vara badina idia ese edia Dirava Iehova idia kamonai henia lasi, bona ena taravatu, unai be Iehova ena hesiai tauna Mose ese idia ia henia oda herevadia ibounai, idia utua loulou.+ Idia kamonai lasi bona idia badinaia lasi.
13 Hesekaia ena lohia lagani namba 14 ai, Asuria ena king Senakeriba ia lao,+ Iuda siti mai magu aukadia ibounai ia tuari henia bona ia abia.+
14 Vadaeni Iuda ena king Hesekaia be Lakisi ai Asuria ena king dekenai hereva ia siaia ia gwau: “Lau be lau kerere. Lau oi tuari henia lasi, bona lau amo oi noia gaudia ibounai do lau henia.” Asuria ena king ese Iuda ena king Hesekaia ia noia ia dekenai 300 siliva talent* bona golo ena metau be 30 talent do ia henia.
15 Vadaeni Hesekaia ese Iehova ena ruma ai bona king ena ruma ai dava bada kohu idia noho daiutudia amo siliva ibounai ia henia.+
16 Unai nega ai Hesekaia ese Iehova ena dubu ena iduara+ bona iduara ena kahana kahana ai idia gini au, golo amo ia koudia au unai, ia kokidia+ bona Asuria ena king dekenai ia henia.
17 Asuria ena king ese Taratana,* Rabesarisi,* bona Rabesake,* bona Lakisi amo tuari orea badana ta+ be idia ida King Hesekaia dekenai ia siaidia, ia be Ierusalema ai ia noho.+ Idia be Ierusalema dekenai idia daekau lao bona dabua huria tauna ena tano ia lao henia dala badana ena atai kahana ai ia noho gohu kahirakahira idia gini.+
18 Bona king do ia raka-lasi totona idia boiboi neganai, Hilekaia ena natuna Eliakimi,+ king ena ruma bese naria tauna unai, bona seketere gaukara ia karaia tauna Sebina,+ bona rekodi torea tauna Ioa, Asapa ena natuna unai, idia raka-lasi.
19 Vadaeni Rabesake be idia dekenai ia gwau: “Mani Hesekaia umui hamaoroa, ‘King badana, Asuria ena king be inai bamona ia gwau: “Dahaka dainai oi laloa oi be goada?+
20 Oi be oi gwau, ‘Lau be mai egu aonega bona mai egu goada tuari totona,’ to unai be hereva kavakavadia sibona. Daika dekenai oi abidadama dainai lau oi gwau-edeede henia?+
21 Itaia, oi ese Aigupito, ia makohi vadaeni siriho, oi abidadama henia.+ Bema tau ta be heduru totona unai siriho ia dogoatao, iena imana ia gwadaia diba. Aigupito ena king Farao idia abidadama henia taudia ibounai dekenai ia be unai bamona.
22 Bona bema lau dekenai oi gwau, ‘Ai ese emai Dirava, Iehova, ai abidadama henia,’+ to iena ataiai gabudia* bona boubou patadia be Hesekaia ese ia kokidia,+ to ia ese Iuda taudia bona Ierusalema taudia ia hamaoroa, ‘Namona be Ierusalema ai inai boubou patana vairanai umui tui diho,’ ani?”’+
23 Vadaeni mani egu lohia bona king ida gwauhamata ta oi karaia: Lau ese oi dekenai hosi 2,000 do lau henia, bema oi hegeregere, inai namba hegeregerena hosi taria taudia oi haboua.+
24 Ena be Aigupito taudia ese kariota bona hosi taria tatau be oi dekenai do idia henia, to oi ese egu lohia ena hesiai taudia edia ladana maragi gavana ta oi halusia diba, a?
25 Oi laloa lau be Iehova amo gwaumaoro lau abia lasi inai tano lau hadikaia totona, a? Iehova be lau dekenai ia gwau, ‘Inai tano dekenai oi daekau lao bona oi hadikaia ore.’”
26 Unai nega ai Hilekaia ena natuna Eliakimi, Sebina,+ bona Ioa be Rabesake+ dekenai idia gwau: “Mani ai, emu hesiai taudia, be Aramia* gado dekenai oi hereva henia,+ badina unai gado ai laloparara diba. Iuda gado dekenai ai oi hereva henia lasi, magu ai idia gini tatau idia kamonai garina.”+
27 To Rabesake be idia dekenai ia gwau: “Egu lohiabada ese lau ia siaia emui lohiabada bona umui sibona dekenai inai hereva lau gwauraia totona, a? Bona magu ai idia gini tatau, umui ida sibona edia kukuri do idia ania bona edia mei do idia inua taudia unai, dekenai ia siaia danu, a?”
28 Bena Rabesake ia gini bona Iuda taudia edia gado ai ia boiboi badabada, ia gwau: “King badana, Asuria ena king, ena hereva umui kamonai.+
29 King be inai bamona ia hereva, ‘Namo lasi Hesekaia ese umui ia koia, badina ia be hegeregere lasi egu imana amo umui ia hamauria totona.+
30 Bona namo lasi Hesekaia ena hereva ese umui ia veria Iehova umui abidadama henia totona, ia gwau: “Iehova ese ita do ia hamauria momokani, bona inai siti be Asuria ena king ena imana ai do ia atoa lasi.”+
31 Hesekaia umui kamonai henia lasi, badina Asuria ena king be inai bamona ia hereva: “Lau ida maino umui karaia bona lau dekenai umui mai, bona umui ta ta be emui vain huahua bona fig huahua do umui ania bona emui ranu guri amo ranu do umui inua,
32 ela bona do lau mai bona umui be tano ta dekenai do lau abia lao, unai tano be emui tano hegeregerena,+ unuseniai witi, bali bona greips idia tubu, unai amo paraoa bona wain umui karaia diba, bona olive audia bona hani idia noho. Bena do umui mauri noho bona do umui mase lasi. Hesekaia umui kamonai henia lasi, badina ia ese umui ia koia bona ia gwau: ‘Iehova ese ita do ia hamauria.’
33 Bese idauidau taudia edia dirava ese Asuria ena king ena imana amo edia tano idia abia lou, a?
34 Hamata+ bona Arapada edia dirava idauidau be edeseni? Separavaimi,+ Hena, bona Iva edia dirava idauidau be edeseni? Idia ese egu imana amo Samaria idia hamauria, a?+
35 Unai bese taudia edia dirava ibounai amo daika be egu imana amo ena tano ia abia lou, unai dainai edena bamona Iehova be egu imana amo Ierusalema do ia hamauria?”’”+
36 To taunimanima be idia hereva lasi bona idia haere lasi, badina king ese idia ia oda henia: “Ia do umui haere henia lasi.”+
37 To Hilekaia ena natuna Eliakimi, king ena ruma bese ia naria tauna unai, seketere tauna Sebina, bona Asapa ena natuna Ioa, rekodi torea tauna unai, be edia dabua idia darea bona Hesekaia dekenai idia lao bona Rabesake ena hereva idia gwauraia.
Futnout
^ Abaisa ena ladana kwadogina.
^ Eiava “idia gwauraia Nehusitana.”
^ Eiava “wain bubua taudia edia biaguna.”
^ Eiava “ofesa taudia edia biaguna.”
^ Eiava “tuari biaguna badana.”
^ Eiava “Suria.”
