King Taudia Iharuana 2:1-25
2 Iehova ese lai badana amo Elia+ be guba* dekenai ia abia daekau gwauraia neganai,+ Elia bona Elisaia+ be Gilegala amo idia lao.+
2 Elia be Elisaia dekenai ia gwau: “Mani iniseniai oi noho, badina Iehova ese Betele dekenai lau ia siaia lao.” To Elisaia ia gwau: “Mauri Diravana Iehova ena ladanai bona oi vairanai lau gwauhamata, lau ese oi do lau rakatania lasi.” Vadaeni Betele dekenai idia lao.+
3 Bena peroveta taudia edia bese taudia be Betele ai Elisaia dekenai idia lao bona idia gwau: “Emu hadibaia tauna, emu biaguna unai, be Iehova ese hari dina oi amo do ia kokia, unai oi diba, a?”+ To ia gwau: “Unai lau diba vadaeni. Umui herevalaia lasi.”
4 Elia be ia dekenai ia gwau: “Elisaia e, mani iniseniai oi noho, badina Iehova ese lau ia siaia Ieriko dekenai do lau lao.”+ To Elisaia ia gwau: “Mauri Diravana Iehova ena ladanai bona oi vairanai lau gwauhamata, lau ese oi do lau rakatania lasi.” Vadaeni Ieriko dekenai idia lao.
5 Bena peroveta taudia edia bese taudia be Ieriko ai Elisaia dekenai idia lao bona idia gwau: “Emu hadibaia tauna, emu biaguna unai, be hari dina Iehova ese oi amo do ia kokia, unai oi diba, a?” To ia gwau: “Unai lau diba vadaeni. Umui herevalaia lasi.”
6 Elia be ia dekenai ia gwau: “Mani iniseniai oi noho, badina Iehova ese lau ia siaia Ioridane dekenai do lau lao.” To Elisaia ia gwau: “Mauri Diravana Iehova ena ladanai bona oi vairanai lau gwauhamata, lau ese oi do lau rakatania lasi.” Vadaeni idia ruaosi idia lao.
7 Bona peroveta taudia edia bese taudia 50 danu idia lao bona daudau amo idia gini bona idia ruaosi idia itaia noho, idia ruaosi be Ioridane kahirakahira idia gini.
8 Bena Elia be ena dabua* ia abia+ bona ia lokua bona ranu ia botaia, bena ranu ia parara, unai amo idia ruaosi be tano kaukauna amo idia raka hanaia.+
9 Idia raka hanaia lalonai, Elia be Elisaia dekenai ia gwau: “Dirava ese lau ia do abia lao lasi lalonai, oi totona dahaka do lau karaia be lau oi hamaoroa.” Vadaeni Elisaia ia gwau: “Mani Dirava ese oi dekenai ia henia siahu ena kahana ta be nega rua oi habadaia+ bona lau dekenai oi henia.”+
10 Elia ia gwau: “Oi noia gauna be ia auka lau henia totona. Bema oi itaia Dirava ese lau ia abia lao, vadaeni oi noia gauna be oi dekenai do ia vara. To bema oi itaia lasi, unai do ia vara lasi.”
11 Idia raka lao noho lalonai idia herevahereva, bona daudau lasi lahi bamona idia diaridiari noho tuari kariota bona hosi momo+ ese idia rua idia hapararaia, bona Elia be lai badana amo guba* dekenai ia daekau.+
12 Elisaia be unai ia itaia noho lalonai, ia boiboi: “Egu lohia e, egu lohia e!* Israela ena kariota bona ena hosi guia taudia!”+ To Elisaia ese Elia ia itaia lou lasi neganai, ia ese ena dabua ia abia bona kahana rua dekenai ia darea.+
13 Unai murinai Elia ena dabua,* ia moru gauna, ia abia isi+ bona ia giroa lou, Ioridane sinavai kahirakahira ia gini.
14 Bena ia ese Elia ena dabua* amo ranu ia botaia bona ia gwau: “Iehova, Elia ena Dirava be edeseniai?” Ia ese ranu ia botaia neganai, ranu be lauri bona idiba kahana ai idia parara, unai amo Elisaia ia raka hanaia.+
15 Ieriko ai peroveta taudia edia bese taudia ese daudau amo ia idia itaia neganai, idia gwau: “Elia ia gaukaralaia siahu be Elisaia dekenai ia hanaia.”+ Vadaeni idia lao ia idia hedavari henia bona iena vairanai idia tui diho.
16 Idia be ia dekenai idia gwau: “Emu hesiai taudia huanai tatau goadadia 50 idia noho. Mani idia lao bona emu biaguna idia tahua. Reana Iehova ena siahu* ese ia abia isi bona ororo ta latanai eiava koura lalonai ia negea.”+ To ia gwau: “Idia umui siaia lasi.”
17 To, idia ese ia dekenai idia noinoi loulou ela bona ena hemami ia dika, bena ia gwau: “Idia umui siaia.” Idia ese unai tatau 50 idia siaia, bona dina toi lalonai Elia idia tahua to idia davaria lasi.
18 Idia be Elisaia dekenai idia giroa lou neganai, ia be Ieriko ai ia noho.+ Bena idia dekenai ia gwau: “Umui lau hamaoroa umui lao lasi, ani?”
19 Unai nega ai siti ena tatau be Elisaia dekenai idia gwau: “Emai lohia ia itaia siti be gabu namona ai ia noho,+ to ranu ia dika bona tano be anina ia havaraia lasi.”
20 Bena ia gwau: “Disi maragina matamatana ta umui mailaia, bona ia lalonai damena umui atoa.” Vadaeni ia dekenai disi idia mailaia.
21 Bena ranu ia raka-lasi gabuna dekenai ia lao bona damena ia negea+ bona ia gwau: “Iehova ena hereva be inai, ‘Lau ese inai ranu lau hanamoa vadaeni. Inai ranu ese mase do ia havaraia lasi bona tano be anina do ia havaraia.’”
22 Bona unai ranu ia namo ema bona hari, Elisaia ena hereva hegeregerena.
23 Ia be unuseni amo Betele dekenai ia lao. Bona dala amo ia lao noho lalonai, memero matamatadia haida be siti amo idia raka-lasi bona ia idia kirikirilaia matamaia,+ idia gwau: “Kebere tauna e, oi daekau lao! Kebere tauna e, oi daekau lao!”
24 Vadaeni ia giroa bona idia ia itaia bona Iehova ena ladanai idia ia gwauraia dika. Bena uda amo bea hahine rua idia raka-lasi+ bona unai natudia 42 idia darea maragimaragi.+
25 Bona unuseni amo Karamele Ororo dekenai ia lao,+ bena Samaria dekenai ia giroa lou.
Futnout
^ Manu idia roho gabuna.
^ Eiava “peroveta tauna ena dabua.”
^ Manu idia roho gabuna.
^ Heb., “Egu tamana e, egu tamana e!”
^ Eiava “peroveta tauna ena dabua.”
^ Eiava “peroveta tauna ena dabua.”
^ Eiava “lai.”
