King Taudia Iharuana 21:1-26
21 Manase+ ena mauri lagani be 12 neganai, king ai ia lao, bona lagani 55 lalonai Ierusalema ai ia lohia.+ Ena sinana be Hepisiba.
2 Manase be Iehova ena vairanai ia kara dika, Iehova ese Israela taudia edia vairana amo ia lulua lao besedia idia karaia kara dika rohorohodia ia badinaia.+
3 Ena tamana Hesekaia ese ia hadikaia ataiai gabudia* ia haginia lou,+ bona Bala totona boubou patadia bona au helagana* ta ia karaia,+ Israela ena king Ahaba ia karaia bamona.+ Bona guba gaudia ibounai dekenai ia tui diho bona ia hesiai henia.+
4 Danu ia ese Iehova ena ruma ai boubou patadia ia haginia,+ to unai ruma totona Iehova be ia gwau: “Ierusalema ai, egu ladana do ia noho.”+
5 Bona ia ese guba gaudia ibounai+ totona Iehova ena ruma ena ariara rua ai boubou patadia ia haginia.+
6 Bona ia ese ena natuna mero be lahi lalonai ia gabua.* Meamea karadia ia karaia, toa idauidau edia anina ia tahua,+ bona mase taudia edia lauma idia hereva henia taudia bona vaira nega gwauraia taudia ia abia hidi.+ Ia ese Iehova ena vairanai kara dika badadia ia karaia, Dirava ia habadua totona.
7 Manase ese ia karaia au helagana*+ ena kaivakuku be Dirava ena ruma ai ia atoa, unai ruma totona Iehova ese Davida bona ena natuna Solomona ia hamaoroa: “Inai ruma lalonai bona Ierusalema ai egu ladana do ia noho hanaihanai, inai gabu be Israela ena iduhu edia teritori ibounai amo lau abia hidi.+
8 Bona lau ese Israela taudia edia sene taudia dekenai lau henia tanona amo idia do lau kokia lou lasi,+ bema idia ese lau henia oda ibounai, egu hesiai tauna Mose amo lau henia Taravatu ibounai unai, idia badinaia namonamo.”+
9 To idia ese unai idia badinaia lasi, bona Manase ese idia ia hakaua kerere noho, bona kara dika momo idia karaia, Iehova ese Israela taudia edia vairana amo ia hadikaia ore besedia edia kara dikadia idia hereaia.+
10 Iehova be ena peroveta hesiai taudia amo ia hereva noho,+ ia gwau:
11 “Iuda ena king Manase ese inai kara dika rohorohodia ibounai ia karaia. Iena kara dikadia ese Amoro taudia edia kara dikadia ia hereaia,+ bona ia karaia kaivakuku dika rohorohodia dainai Iuda taudia ia hakaua kerere.
12 Unai dainai Israela taudia edia Dirava, Iehova, be inai bamona ia hereva: ‘Lau ese Ierusalema bona Iuda latanai dika lau mailaia,+ bona bema ta ese unai sivarai ia kamonai, ia be do ia hoa.*+
13 Bona lau ese Ierusalema latanai varo latana do lau atoa,+ Samaria dekenai lau karaia hegeregerena,+ bona levolo gauna do lau atoa, Ahaba ena bese taudia dekenai lau karaia hegeregerena,+ bona lau ese Ierusalema do lau daroa goeva, ta ese disi ia dahua, ia hagoevaia bona ia hagiroa hegeregerena.+
14 Lau ese egu taunimanima oredia do lau rakatanidia+ bona edia inai taudia edia imana ai do lau atodia, bona idia be edia inai taudia ibounai ese do idia abia mauri bona edia kohu ibounai do idia henaoa,+
15 badina egu vairanai kara dika idia karaia bona edia sene taudia be Aigupito amo idia raka-lasi negana amo ema bona hari, idia ese lau idia habadua noho.’”+
16 Danu Manase ese kerere lasi taudia edia rara bada herea ia hadihoa ela bona Ierusalema ibounai ia hahonua,+ bona danu Iehova ena vairanai kara dika ia karaia amo Iuda taudia ia hakaua idia kara dika totona.
17 Manase ena sivarai ibounai, ia karaia gaudia ibounai bona ia karaia kara dikadia edia sivarai, be Iuda ena king taudia edia buka lalonai idia torea, ani?
18 Bena Manase be ia mase* bona ena ruma ena uma gabu ai idia guria, unai be Usa umana ai.+ Bona iena natuna Amona be king ai ia lao.
19 Amona+ ena mauri lagani be 22 neganai, ia be king ai ia lao, bona lagani rua lalonai Ierusalema dekenai ia lohia.+ Iena sinana ena ladana be Mesulemete, ia be Iotoba tauna Harusu ena natuna kekeni.
20 Ia be Iehova ena vairanai kara dika ia karaia noho, iena tamana Manase ia karaia bamona.+
21 Ia be ena tamana ena kara ibounai ia badinaia noho, bona ena tamana ese ia tomadiho henidia kaivakuku dika rohorohodia ia hesiai henia bona idia dekenai ia tui diho.+
22 Vadaeni ia ese ena sene taudia edia Dirava, Iehova, ia dadaraia, bona Iehova ena dala ai ia raka noho lasi.+
23 Dokonai, Amona be ena hesiai taudia ese do idia hamasea palani idia karaia, bena ia be ena ruma ai idia hamasea.
24 To King Amona ena mase dalana idia karaia taudia ibounai be tano taudia ese idia hamasea, bona iena natuna Iosaia be king ai idia halaoa.+
25 Amona ena sivarai ibounai, bona ia karaia gaudia, be Iuda ena king taudia edia buka lalonai idia torea, ani?
26 Bena ia be Usa ena uma gabu ai idia guria,+ bona ena natuna Iosaia+ be king ai ia lao.
Futnout
^ Heb., “ena natuna be lahi lalona amo ia abia hanai.”
^ Heb., “iena taiana do idia hemaihemai.”
^ Heb., “ena sene taudia ida ia hekure.”
