King Taudia Iharuana 22:1-20
22 Iosaia+ ena mauri lagani be 8 neganai, ia be king ai ia lao, bona lagani 31 lalonai Ierusalema ai ia lohia.+ Ena sinana be Iedida, Bosikata tauna Adaia ena natuna kekeni.+
2 Iehova ena vairanai kara maorona ia karaia bona ena sene tauna Davida ena kara ibounai ia badinaia,+ bona unai dala ia rakatania lasi.
3 King Iosaia ena lohia lagani namba 18 ai, ia ese Sapana, seketere tauna, Asalaia ena natuna bona Mesulama ena tubuna, ia siaia Iehova ena ruma dekenai ia lao totona.+ King ese ia hamaoroa:
4 “Hahelaga tauna badana Hilekaia+ dekenai oi lao, bona oi hamaoroa Iehova ena ruma amo moni ibounai, iduara naria taudia ese taunimanima amo idia gogoa monina+ unai, do ia abia.+
5 Ia ese unai moni be Iehova ena ruma dekenai idia karaia gaukara idia naria taudia dekenai do ia henia, bena idia ese Iehova ena ruma ai idia gaukara taudia, dubu ena kahana haida idia hanamoa taudia unai, dekenai do idia henia.+
6 Idia be gaukara idauidau idia karaia taudia, ruma haginia taudia, bona nadi gaukara idia karaia taudia. Bona idia ese au bona nadi do idia hoia, dubu hanamoa totona.+
7 To namona be moni idia gaukaralaia dalana umui henanadailaia lasi, badina gaukara naria taudia ese idia abidadama henia.”+
8 Gabeai hahelaga tauna badana Hilekaia ese seketere tauna Sapana ia hamaoroa:+ “Lau ese Iehova ena ruma ai Taravatu bukana+ lau davaria.” Vadaeni Hilekaia ese unai buka be Sapana dekenai ia henia, bona ia duahia matamaia.+
9 Bena seketere tauna Sapana be king dekenai ia lao bona ia hamaoroa: “Emu hesiai taudia ese dubu ai ia noho moni idia gogoa, bona idia ese Iehova ena ruma ai gaukara idia naria taudia dekenai idia henia vadaeni.”+
10 Seketere tauna Sapana ese king ma ia hamaoroa: “Hahelaga tauna Hilekaia ese lau dekenai buka ta ia henia.”+ Bena Sapana ese king ena vairanai ia duahia matamaia.
11 King be Taravatu bukana lalonai idia noho hereva ia kamonai neganai, ena dabua ia darea.+
12 Vadaeni king ese hahelaga tauna Hilekaia, Sapana ena natuna Ahikama,+ Mikaia ena natuna Akaboro, seketere tauna Sapana, bona king ena hesiai tauna Asaia dekenai oda ia henia:
13 “Inai buka lalonai idia noho hereva ibounai dainai, umui lao, bona lau, inai taunimanima, bona Iuda taudia ibounai totona Iehova ena lalohadai umui tahua. Badina Iehova ena badu ita dekenai be ia bada momokani,+ badina inai buka lalonai ita totona idia torea hereva ibounai be iseda sene taudia ese idia badinaia lasi.”
14 Vadaeni hahelaga tauna Hilekaia, Ahikama, Akaboro, Sapana, bona Asaia be peroveta hahinena Hulida dekenai idia lao.+ Hulida be Salumu ena adavana, Salumu ena tamana be Tikava, Harahasa ena natuna unai. Salumu be king ena dabua atoa gabuna ia naria. Hulida be Ierusalema ena gabu matamata dekenai ia noho, unuseniai ia idia hereva henia.+
15 Hulida be idia dekenai ia gwau: “Israela ena Dirava, Iehova, be inai bamona ia hereva, ‘Lau dekenai umui ia siaia tauna umui hamaoroa:
16 “Iehova be inai bamona ia hereva, ‘Lau ese inai gabu bona iniseni idia noho taudia dekenai dika do lau mailaia, Iuda ena king ese buka ai ia duahia herevadia ibounai be do idia guguru.+
17 Badina idia ese lau idia rakatania bona dirava ma haida dekenai boubou gaudia edia kwalahu idia karaia noho,+ unai amo edia imana amo idia karaia gaudia ibounai amo lau idia habadua noho,+ inai gabu dekenai egu badu do ia bada noho bona ta ese do ia koua lasi.’”+
18 To Iuda ena king, Iehova ena lalohadai umui tahua totona umui ia siaia tauna unai, dekenai inai bamona umui hereva, ‘Oi kamonai herevadia dainai Israela ena Dirava, Iehova, be inai bamona ia gwau:
19 “Oi ese emu lalona oi giroa bona Iehova ena vairanai oi manau,+ badina oi kamonai lau ese inai gabu bona ena taunimanima totona lau gwau, idia be dika do idia davaria bona idia dainai taunimanima do idia gari dikadika, bona emu dabua oi darea+ bona egu vairanai oi taitai, lau ese unai lau kamonai danu, Iehova be unai bamona ia hereva.
20 Unai dainai lau ese oi be emu sene taudia ida do lau haboua,* bona oi be mai maino ida do idia guria, bona inai gabu ai do lau mailaia dika be do oi itaia lasi.’”’” Bena unai hereva be king dekenai idia mailaia.
Futnout
^ Inai be laulau herevana, anina be mase.